Dementia: ಭಾರತದಲ್ಲಿ 60 ವರ್ಷಕ್ಕಿಂತ ಮೇಲ್ಪಟ್ಟ 1 ಕೋಟಿಗೂ ಹೆಚ್ಚು ಜನರಿಗೆ ಮರೆವಿನ ಕಾಯಿಲೆ!

ಈ ಸಂಶೋಧನೆಯ ಬಗ್ಗೆ ‘ನ್ಯೂರೋಪಿಡೆಮಿಯಾಲಜಿ’ ಜರ್ನಲ್‌ನಲ್ಲಿ ವರದಿ ಪ್ರಕಟವಾಗಿದ್ದು, ಈ ಬಗ್ಗೆ ಭಾರತದಲ್ಲಿ ಸಂಶೋಧನೆಗಾಗಿ ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನದೊಂದಿಗೆ 31,477 ಹಿರಿಯ ವಯಸ್ಕರನ್ನು ಭೇಟಿಯಾಗಿ ಮಾಹಿತಿ ಸಂಗ್ರಹಿಸಲಾಗಿದೆ.

60 ವರ್ಷ ಅಥವಾ ಅದಕ್ಕಿಂತಲೂ ಮೇಲ್ಪಟ್ಟ ವಯೋಮಾನದ 1.08 ಕೋಟಿ ಜನರಲ್ಲಿ ಶೇ 8.44ರಷ್ಟು ಜನರು ಮರೆವಿನ ಕಾಯಿಲೆಯಿಂದ ಬಳಲುತ್ತಿದ್ದಾರೆ ಎಂದು ಅಧ್ಯಯನದ ಮೂಲಕ ತಿಳಿದು ಬಂದಿದೆ.

ಇನ್ನು ಅಮೆರಿಕ, ಬ್ರಿಟನ್‌ನಲ್ಲಿನ ಜನರು ಎದುರಿಸುತ್ತಿರುವ ಮರೆವಿನ ಕಾಯಿಲೆ ಪ್ರಮಾಣಕ್ಕೆ ಹೋಲಿಸಿದರೆ ಭಾರತದ ಪ್ರಮಾಣ ಹೆಚ್ಚೇ ಇದೆ ಎಂದು ಅಧ್ಯಯನದಲ್ಲಿ ತಿಳಿದು ಬಂದಿದೆ.

ವಯೋವೃದ್ಧರು, ಮಹಿಳೆಯರು, ಗ್ರಾಮೀಣ ಪ್ರದೇಶಗಳಲ್ಲಿ ವಾಸಿಸುವವರಲ್ಲಿ ಈ ಕಾಯಿಲೆ ಹೆಚ್ಚಾಗಿ ಕಾಣಿಸಿಕೊಂಡಿದೆ ಎಂದು ವರದಿಯ ಸಹ ಲೇಖಕ ಹಾವೋಮಿಯಾವೊ ಜಿನ್‌ ಅವರು ಹೇಳಿದ್ದಾರೆ.

ಈ ಅಧ್ಯಯನಕ್ಕಾಗಿ ಇಂಗ್ಲೆಂಡ್‌ನ ಸರ್ರೇ ವಿಶ್ವವಿದ್ಯಾಲಯ, ಅಮೆರಿಕದ ಸದರನ್‌ ಕ್ಯಾಲಿಫೋರ್ನಿಯಾ ವಿಶ್ವವಿದ್ಯಾಲಯ, ಮಿಶಿಗನ್‌ ವಿಶ್ವವಿದ್ಯಾಲಯ, ಭಾರತದ ಏಮ್ಸ್‌ ಸಂಸ್ಥೆಗಳು ಜಂಟಿಯಾಗಿ ಎಐ ಕಲಿಕಾ ಮಾದರಿಯನ್ನು ಅಭಿವೃದ್ಧಿಪಡಿಸಿದ್ದವು.

ಇನ್ನು ಈ ಅಧ್ಯಯನದ ಪ್ರಕಾರ ಮರೆವಿನ ಕಾಯಿಲೆಗೆ ಸೂಕ್ತ ರೋಗ ಯಾವುದೆಂದು ಪತ್ತೆ ಹಚ್ಚಲಾಗಿಲ್ಲ. ಆದರೆ ಮರೆವಿನ ಕಾಯಿಲೆ ಇರುವುದನ್ನು ಮಾತ್ರ ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನದ ಮೂಲಕ ಪತ್ತೆ ಹಚ್ಚಲಾಗಿದೆ.

ಸಾಮಾನ್ಯವಾಗಿ ವಯಸ್ಸಾಗಿರುವುದು, ಜೀವನದಲ್ಲಿ ಜಿಗುಪ್ಸೆ, ಮಕ್ಕಳ ನಿರ್ಲಕ್ಷ್ಯ, ಮನೆಯಲ್ಲೇ ಇರುವುದು, ದೇಹ ಸ್ಪಂದನೆಯಲ್ಲಿ ಇಳಿಮುಖ ಮುಂತಾದ ಕಾರಣಗಳಿಂದ ಮರೆವಿನ ಕಾಯಿಲೆ ಉಂಟಾಗಿರುವ ಸಾಧ್ಯತೆ ಇದೆ ಅಂತಾನೂ ಹೇಳಲಾಗ್ತಿದೆ. ಆದರೆ ನಿಖರ ಕಾರಣ ತಿಳಿದುಬಂದಿಲ್ಲ.