Child Police: ಐದೇ ವರ್ಷಕ್ಕೆ ಪೊಲೀಸ್ ಆದ ಬಾಲಕ! ಈತನಿಗೆ ಸಿಗುತ್ತೆ ಸಖತ್ ಸಂಬಳ, ಸರ್ಕಾರಿ ಸವಲತ್ತು!

ಛತ್ತೀಸ್‌ಗಢದಲ್ಲಿ 5 ವರ್ಷದ ನಮನ್‌ ರಾಜ್​ವಾಡೆ ಎಂಬ ಬಾಲಕ ಪೊಲೀಸ್ ಕೆಲಸ ಪಡೆದುಕೊಂಡಿದ್ದಾರೆ. ಸರ್ಗುಜಾ ಜಿಲ್ಲೆಯ 5 ವರ್ಷದ ನಮನ್ ಇಂದು ಮಕ್ಕಳ ಕಾನ್‌ಸ್ಟೇಬಲ್​  ಆಗಿ ನೇಮಕಗೊಂಡಿದ್ದಾರೆ. ಪೊಲೀಸ್ ವರಿಷ್ಠಾಧಿಕಾರಿ (ಎಸ್‌ಪಿ) ಭಾವನಾ ಗುಪ್ತಾ ಅವರು ನಮನ್‌ಗೆ ನೇಮಕಾತಿ ಪತ್ರವನ್ನು ನೀಡಿದ್ದಾರೆ.

ಎರಡು ವರ್ಷಗಳ ಹಿಂದೆ ಸೆಪ್ಟೆಂಬರ್ 3, 2021 ರಂದು, ನಮನ್ ತಂದೆ  ರಾಜ್‌ಕುಮಾರ್ ರಾಜ್‌ವಾಡೆ  ಕಾನ್‌ಸ್ಟೇಬಲ್ ಆಗಿದ್ದು, ರಸ್ತೆ ಅಪಘಾತದಲ್ಲಿ ನಿಧನರಾಗಿದ್ದರು. ಮೃತ ಕಾನ್‌ಸ್ಟೇಬಲ್ ಪತ್ನಿ ಹಾಗೂ ಪುತ್ರ ನಮನ್‌ನನ್ನು ಅಗಲಿದ್ದರು.

ಅವರ ಸಾವಿನ ಬಗ್ಗೆ ಸ್ವತಃ ಅನುಕಂಪ ವ್ಯಕ್ತಪಡಿಸಿದ್ದ ಎಸ್ಪಿ ಭಾವನಾ ಗುಪ್ತಾ, ರಾಜ್‌ಕುಮಾರ್ ರಾಜ್‌ವಾಡೆ ಅವರ 5 ವರ್ಷದ ಪುತ್ರ ನಮನ್ ರಾಜ್‌ವಾಡೆಯನ್ನು ಮಕ್ಕಳ ಕಾನ್‌ಸ್ಟೇಬಲ್ ಆಗಿ ಅನುಕಂಪದ ನೇಮಕಾತಿ ನೀಡಿದ್ದಾರೆ. ನೇಮಕಾತಿ ಸಂದರ್ಭದಲ್ಲಿ ನಮನ್ ಅವರ ತಾಯಿ ಕೂಡ ಬಾಲಕನ ಜೊತೆಯಲ್ಲಿದ್ದರು.

ಸರ್ಗುಜಾ ಎಸ್ಪಿ ಭಾವನಾ ಗುಪ್ತಾ ಮಾತನಾಡಿ, ನೌಕರರು ಆಕಸ್ಮಿಕವಾಗಿ ಮರಣ ಹೊಂದಿದಲ್ಲಿ ಅನುಕಂಪದ ನೇಮಕಾತಿಗೆ ಅವಕಾಶವಿದೆ, ಆದರೆ ಮನೆಯಲ್ಲಿ ವಯಸ್ಕ ಸದಸ್ಯರಿಲ್ಲದ ಕಾರಣ 5 ವರ್ಷದ ಮಗನಿಗೆ ಅನುಕಂಪದ ನೇಮಕಾತಿ ನೀಡಲಾಗಿದೆ ಎಂದು ತಿಳಿಸಿದರು.

ನಮನ್ ರಾಜ್​ವಾಡೆಯನ್ನು ಮಕ್ಕಳ ಕಾನ್ಸ್‌ಟೇಬಲ್ ಆಗಿ ನೇಮಕ ಮಾಡಲಾಗಿದ್ದು, ಆತ ಕಾನ್​ಸ್ಟೇಬಲ್​ಗಳು ಪಡೆಯುವ  ವೇತನ ಮತ್ತು ಭತ್ಯೆಗಳನ್ನು ಪಡೆಯುತ್ತಾನೆ ಎಂದು ಎಸ್​ಪಿ ಮಾಹಿತಿ ನೀಡಿದ್ದಾರೆ.

ನಿಯಮದಂತೆ, ನಮನ್ 18 ವರ್ಷಗಳನ್ನು ಪೂರ್ಣಗೊಳಿಸಿದ ತಕ್ಷಣ ಪೂರ್ಣ ಸ್ಥಾನಮಾನವನ್ನು ಪಡೆಯಲಿದ್ದಾನೆ. ಅದಾಗ್ಯೂ  ನಿಯಮಾನುಸಾರ ಹಾಜರಾತಿ ಮತ್ತಿತರ ಕೆಲಸಕ್ಕೆ ಬಾಲಕ ಇಲಾಖೆಗೆ ಬರಬೇಕಾಗುತ್ತದೆ ಎಂದು ತಿಳಿಸಿದ್ದಾರೆ.

ಪೊಲೀಸ್ ವರಿಷ್ಠಾಧಿಕಾರಿ ಭಾವನಾ ಗುಪ್ತಾ ಐದು ವರ್ಷದ ಮಗುವಿಗೆ ನೇಮಕಾತಿ ಪತ್ರ ನೀಡುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ. ಈ ವೀಡಿಯೋದಲ್ಲಿ ಭಾವನಾ ಗುಪ್ತಾ ನಮನ್ ಜೊತೆ ಮಾತನಾಡುತ್ತಿರುವುದು ಮತ್ತು ನೇಮಕಾತಿ ಪತ್ರವನ್ನು ನೀಡುತ್ತಿರುವುದು ಕಂಡುಬಂದಿದೆ.