Peruvian Mummy: 800 ವರ್ಷ ಹಳೆಯ ಮಮ್ಮಿಯನ್ನು ಫುಡ್‌ ಡೆಲಿವರಿ ಬ್ಯಾಗ್‌ನಲ್ಲಿ ಇಟ್ಕೊಂಡು ಓಡಾಡ್ತಿದ್ದವ ಅರೆಸ್ಟ್‌!

ವ್ಯಕ್ತಿಯೊಬ್ಬ ಪೆರುವಿನಲ್ಲಿ ಕಳೆದ ಮೂವತ್ತು ವರ್ಷಗಳಿಂದ ಸುಮಾರು 800 ವರ್ಷಗಳಷ್ಟು ಹಳೆಯದಾದ ಮಮ್ಮಿಯನ್ನು ಬಚ್ಚಿಟ್ಟಿರುವ ಸಂಗತಿ ತಡವಾಗಿ ಬೆಳಕಿಗೆ ಬಂದಿದೆ.

ಅಚ್ಚರಿಯ ವಿಷಯ ಅಂದ್ರೆ ತಾನು ಬಚ್ಚಿಟ್ಟಿದ್ದ ಮಮ್ಮಿಯನ್ನು ಆ ಯುವಕ ತನ್ನ ಗರ್ಲ್‌ಫ್ರೆಂಡ್ ಎಂದು ತಿಳಿದುಕೊಂಡಿದ್ದನಂತೆ. ಈ ವಿಚಾರವನ್ನು ಪೊಲೀಸರು ಆತನನ್ನು ವಿಚಾರಣೆಗೆ ಒಳಪಡಿಸಿದಾಗ ಬಾಯ್ಬಿಟ್ಟಿದ್ದಾನೆ ಎನ್ನಲಾಗಿದೆ.

ಆ ಮಮ್ಮಿಯನ್ನು ತಾನು ಬಚ್ಚಿಟ್ಟುಕೊಂಡಿರುವುದು ಮಾತ್ರವಲ್ಲದೇ ಅದು ಹಾಳಾಗದಂತೆ ಫುಡ್‌ ಡೆಲಿವರಿಗೆ ಬಳಸಲಾಗುವ ಐಸೊಥರ್ಮಲ್ ಬ್ಯಾಗ್‌ನಲ್ಲಿ ಸಂರಕ್ಷಿಸಿ ಇಟ್ಡಿದ್ದ ಎಂದು ಪೊಲೀಸರು ಹೇಳಿದ್ದಾರೆ.

ಪೆರುವಿನ 26 ವರ್ಷದ ಜೂಲಿಯೊ ಸೀಸರ್ ಬರ್ಮೆಜೊ ಬಂಧಿತ ವ್ಯಕ್ತಿಯಾಗಿದ್ದು ಈ ಮಮ್ಮಿಗೆ ಆತ ಜುವಾನಿಟಾ ಎಂದು ಹೆಸರಿಟ್ಟಿದ್ದಲ್ಲದೇ ಅದನ್ನು ತನ್ನ ‘ಆಧ್ಯಾತ್ಮಿಕ ಗೆಳತಿ’ ಎಂದು ಕರೆದಿದ್ದಾನೆ. ಅಲ್ಲದೇ, ‘ಜುವಾನಿಟಾ ನನ್ನ ಜೊತೆ ನನ್ನ ಮನೆಯಲ್ಲೇ ಇರುತ್ತಾಳೆ. ನಾನು ಆಕೆಯನ್ನು ಚೆನ್ನಾಗಿ ನೋಡಿಕೊಳ್ಳುತ್ತಿದ್ದೇನೆ. ಆಕೆ ನನ್ನ ಜೊತೆಯೇ ಮಲಗುತ್ತಾಳೆ’ ಎಂದು ಜೂಲಿಯೊ ಸೀಸರ್ ಬರ್ಮೆಜೊ ತನಿಖೆ ವೇಳೆ ಪೊಲೀಸರ ಬಳಿ ಹೇಳಿಕೊಂಡಿದ್ದಾನೆ.

ಸುಮಾರು 30 ವರ್ಷಗಳ ಹಿಂದೆ ಬರ್ಮೆಜೊ ತಂದೆ ಈ ಮಮ್ಮಿಯನ್ನು ಮನೆಗೆ ತಂದಿದ್ದರು. ಆದರೆ ಅದನ್ನು ಸರ್ಕಾರ ವಶಪಡಿಸಿಕೊಳ್ಳಬಹುದು ಎಂಬ ಭಯದಿಂದ ಮೂರು ದಶಕಗಳಿಂದ ಬಚ್ಚಿಟ್ಟಿದ್ದ ಎಂದು ಪೊಲೀಸರಿಗೆ ಹೇಳಿದ್ದಾನೆ. ಜೂಲಿಯೊ ಸೀಸರ್ ಬರ್ಮೆಜೊ ಮಾನಸಿಕ ಅಸ್ವಸ್ಥೆಯಿಂದ ಬಳಲುತ್ತಿರುವ ಸಾಧ್ಯತೆಯೂ ಇದೆ ಎಂದು ವಿಚಾರಣೆ ನಡೆಸುತ್ತಿರುವ ಪೊಲೀಸರು ಅನುಮಾನ ಪಟ್ಟಿದ್ದಾರೆ.

ಸಂಸ್ಕೃತಿ ಸಚಿವಾಲಯದ ಪ್ರಕಾರ, ಹಿಸ್ಪಾನಿಕ್ ಪೂರ್ವದ ಅವಶೇಷವು ರಕ್ಷಿತ ಮಮ್ಮಿಯು ವಯಸ್ಕ ಪುರುಷ ವ್ಯಕ್ತಿಯದ್ದಾಗಿದ್ದು, ಬಹುಶಃ ಪುನೋದ ಪೂರ್ವ ಪ್ರದೇಶದಲ್ಲಿ ಪತ್ತೆಯಾಗಿದೆ. ಲಿಮಾದಿಂದ ಆಗ್ನೇಯಕ್ಕೆ ಸುಮಾರು 1,300 ಕಿಲೋಮೀಟರ್ ದೂರದಲ್ಲಿರುವ, ಪೆರುವಿಯನ್ ಆಂಡಿಸ್‌ನಲ್ಲಿ ಪುನೋ ಪ್ರದೇಶ ಬರುತ್ತದೆ.

ಕಳೆದ ಶನಿವಾರ ಪುನೊ ನಗರದ ಉದ್ಯಾನವನದಲ್ಲಿ ಗಸ್ತು ತಿರುಗುತ್ತಿದ್ದಾಗ, ಬರ್ಮೆಜೊ ಅವರ ಬ್ಯಾಗ್‌ನಲ್ಲಿ ಪೊಲೀಸರು ಅವಶೇಷಗಳನ್ನು ಪತ್ತೆ ಮಾಡಿದ್ದರು. ಕೂಡಲೇ ಬರ್ಮೆಜೊನನ್ನು ವಶಕ್ಕೆ ಪಡೆದುಕೊಂಡ ಪೊಲೀಸರು, ಆತನ ಬಳಿ 800 ವರ್ಷಗಳಷ್ಟು ಹಳೆಯ ಮಮ್ಮಿ ಇರುವುದನ್ನು ಗುರುತಿಸಿದ್ದರು.