Court: 80 ವರ್ಷಗಳ ಕಾನೂನು ಹೋರಾಟದಲ್ಲಿ 93ರ ಅಜ್ಜಿಗೆ ಜಯ! ಕೊನೆಯುಸಿರೆಳೆಯುವ ಮುನ್ನವೇ ಸಿಕ್ತು ನ್ಯಾಯ!

ಎಂಟು ದಶಕಗಳಿಂದ ಎಳೆದುಕೊಂಡು ಬಂದಿದ್ದ ಆಸ್ತಿ ವಿವಾದವೊಂದರ ಪ್ರಕರಣಕ್ಕೆ ಬಾಂಬೆ ಹೈಕೋರ್ಟ್​ ಅಂತ್ಯವಾಡಿದೆ. ದಕ್ಷಿಣ ಮುಂಬೈನ ಎರಡು ಫ್ಲಾಟ್‌ಗಳನ್ನು ಅದರ ಮಾಲೀಕರಾದ 93 ವರ್ಷದ ಮಹಿಳೆಗೆ ಹಸ್ತಾಂತರಿಸುವಂತೆ ಹೈಕೋರ್ಟ್ ಮಹಾರಾಷ್ಟ್ರ ಸರ್ಕಾರಕ್ಕೆ ನಿರ್ದೇಶನ ನೀಡಿದೆ.

ಫ್ಲಾಟ್‌ಗಳು ದಕ್ಷಿಣ ಮುಂಬೈನ ರೂಬಿ ಮ್ಯಾನ್ಷನ್‌ನ ಮೊದಲ ಮಹಡಿಯಲ್ಲಿದ್ದು, ಒಂದು 500 ಚದರ ಅಡಿ, ಮತ್ತೊಂದ 600 ಚದರ ಅಡಿ ಅಳತೆಯನ್ನು ಹೊಂದಿದೆ. ಮಾರ್ಚ್ 28, 1942 ರಂದು ಖಾಸಗಿ ಆಸ್ತಿಗಳನ್ನು ಸ್ವಾಧೀನ ಪಡಿಸಿಕೊಳ್ಳುವ ನಿಯಮದಡಿ ಬ್ರಿಟಿಷರು ಹಲವು ಆಸ್ತಿಗಳನ್ನು ವಶಕ್ಕೆ ಪಡೆದುಕೊಂಡಿದ್ದರು. ಆಗ ಭಾರತೀಯರ ಹಲವರ ಸಂಪತ್ತುಗಳು ಬ್ರಿಟೀಷರ ಕೈಸೇರಿತ್ತು.

ಇದೇ ಕಾಯ್ದೆಯಡಿ ಮುಂಬೈ ಮೂಲದ 93 ವರ್ಷದ ಮಹಿಳೆ ಎಲೈಸ್ ಡಿಸೋಜಾ ಅವರ ಮನೆ ಕೂಡ ಬ್ರೀಟಿಷರ ಕೈ ಸೇರಿತ್ತು. ಆಗ ಅವರಿಗೆ ಕೇವಲ 12 ವರ್ಷ ವಯಸ್ಸು. ಅಲ್ಲಿಂದ ತಮ್ಮ ಸ್ವಂತ ಮನೆಯನ್ನು ಪಡೆಯಲು ಕಾನೂನಿನಾತ್ಮಕ ಹೋರಾಟ ನಡೆಸಿದ್ದರು. ಇದೀಗ ಈ ಪ್ರಕರಣ ಇದೀಗ ಇತ್ಯರ್ಥಗೊಂಡು ತೀರ್ಪು ಹೊರಬಿದ್ದಿದೆ.

ಡಿಸೋಜಾ ಕುಟುಂಬ ಭಾರತೀಯರ ರಕ್ಷಣಾ ಕಾಯಿದೆ ಅಡಿ ತಮ್ಮ ಮನೆ ಹಿಂತಿರುಗಿಸಬೇಕು ಎಂದು ಬ್ರಿಟಿಷ್ ಸರ್ಕಾರವನ್ನು ಮನವಿ ಮಾಡಿದ್ದರು. ಇದರ ಪ್ರಕಾರ ಬ್ರಿಟಿಷ್ ಸರ್ಕಾರ 1946ರಲ್ಲಿ ಡಿಸೋಜಾ ಕುಟುಂಬಕ್ಕೆ ಮನೆ ಹಿಂತಿರುಗಿಸಲು ಆದೇಶ ನೀಡಿತ್ತು. ಆದರೂ ಡಿಸೋಜ ಕುಟುಂಬಕ್ಕೆ ಮನೆ ಸಿಕ್ಕಿರಲಿಲ್ಲ. ಹಲವು ಬಾರಿ ಮನವಿ ಮಾಡಿದರೂ ಮನೆ ಸಿಕ್ಕಿರಲಿಲ್ಲ. ಡಿಸೋಜಾ ಕುಟುಂಬ ಬೇರೆಡೆಗೆ ಸ್ಥಳಾಂತರಗೊಂಡಿದ್ದರೂ, ಅವರ ಕಾನೂನಿನಾತ್ಮಕ ಹೋರಾಟ ಮಾತ್ರ ನಿಲ್ಲಿಸಲಿಲ್ಲ.

ಮನವಿಯನ್ನು 1940 ರ ದಶಕದಲ್ಲಿ ರಿಕ್ವಿಸಿಷನ್ ಆರ್ಡರ್ ಅಡಿಯಲ್ಲಿ ಫ್ಲಾಟ್‌ನ ಪ್ರಸ್ತುತ ನಿವಾಸಿಗಳು ಡಿಎಸ್ ಲಾಡ್ ಎಂಬುವವರು ಕಾನೂನುಬದ್ಧ ಉತ್ತರಾಧಿಕಾರಿಯಾಗಿದ್ದು, ಆಲಿಸ್ ಡಿಸೋಜಾ ಅವರ ಅರ್ಜಿಯನ್ನು ವಿರೋಧಿಸಿದ್ದರು. ಆದರೆ ಡಿಸೋಜಾ ಅವರು ಪಟ್ಟು ಬಿಡದೆ ಪೋಷಕರು ನಿಧನರಾದ ಬಳಿಕವೂ ಹೋರಾಟ ಮುಂದುವರಿಸಿದ್ದರು.

ಕಟ್ಟಡದಲ್ಲಿನ ಇತರ ಫ್ಲಾಟ್‌ಗಳ ಸ್ವಾಧೀನವನ್ನು ಅದರ ನಿಜವಾದ ಮಾಲೀಕರಿಗೆ ಹಿಂತಿರುಗಿಸಲಾಗಿದೆ, ನಮಗೆ ಮಾತ್ರ ನೀಡಿಲ್ಲ. ಈ ಬಗ್ಗೆ ಹಲವು ಅಧಿಕಾರಿಗಳನ್ನು ಭೇಟಿ ಮಾಡಿ ತಮ್ಮ ಮನೆ ವಾಪಸ್ ಕೊಡಿಸಬೇಕೆಂದು ಮನವಿ ಮಾಡಿದ್ದರು. ಸರ್ಕಾರಕ್ಕೂ ಹಲವು ಅರ್ಜಿಗಳನ್ನು ನೀಡಿದರೂ ಯಾವುದೇ ಪ್ರಯೋಜನವಾಗಲಿಲ್ಲ. ಇತ್ತ ಸರ್ಕಾರ ಈ ಪ್ಲಾಟ್​ಗಳನ್ನು ನಿವೃತ್ತ ಸರ್ಕಾರಿ ನೌಕರರಿಗೆ ನೀಡಿತ್ತು.

ಇದೀಗ 8 ದಶಗಳ ನಂತರ ಬಾಂಬೆ ಹೈಕೋರ್ಟ್ , ಎಲೈಸ್ ಡಿಸೋಜಾಗೆ ಮನೆ ಹಿಂತಿರುಗಿಸಲು ಸರ್ಕಾರ ಸೂಚನೆ ನೀಡಿದೆ. ಸರ್ಕಾರ ಯಾವುದೇ ಸಮಸ್ಯೆಯಾಗದಂತೆ ಡಿಸೋಜಾಗೆ ಮನೆ ಹಿಂತಿರುಗಿಸಬೇಕೆಂದು ಸೂಚಿಸಿದೆ.