Mysuru: ಎಲ್ಲೆಲ್ಲೂ ಮಾವಿನ ಘಮಲು, ಮೈಸೂರಿನಲ್ಲೂ ಆರಂಭವಾಯ್ತು ಹಣ್ಣಿನ ಮೇಳ

ಬೇಸಿಗೆ ಕಾಲ ಬಂತು ಎಂದರೆ ಸಾಕು ಮಾವಿನ ಹಣ್ಣಿನ ಸೀಸನ್ ಶುರುವಾದ ಹಾಗೆ. ವಿಭಿನ್ನ ರೀತಿಯ ಮಾವಿನ ಹಣ್ಣುಗಳನ್ನು ಸವಿಯಲು ಜನ ಕಾತುರದಿಂದ ಈ ಸೀಸನ್​ಗಾಗಿ ಕಾಯುತ್ತಿರುತ್ತಾರೆ. ಈ ನಡುವೆ ಮಾವಿನ ಮೇಳಗಳು ಸಹ ಜನರ ಗಮನ ಸೆಳೆದಿದ್ದು, ರಾಜ್ಯ ಅನೇಕ ಕಡೆಗಳಲ್ಲಿ ಮಾವಿನ ಮೇಳ ಆರಂಭವಾಗಿದೆ.

ಈಗಾಗಲೇ ಕೊಡಗು ಹಾಗೂ ಬೆಂಗಳೂರಿನಲ್ಲಿ ಮಾವಿನ ಮೇಳ ಆರಂಭವಾಗಿದ್ದು, ಮೈಸೂರಿನಲ್ಲಿ ಸಹ ಮಾವಿನ ಮೇಳ ಶುರುವಾಗಿದೆ. ಮೂರು ದಿನಗಳ ಕಾಲ ಬೆಳಗ್ಗೆ 10 ರಿಂದ ಸಂಜೆ 5:30 ರವರೆಗೆ ಮಾವು ಮೇಳ ನಡೆಯಲಿದ್ದು, ರಾಸಾಯನಿಕ ಮುಕ್ತ ಮಾವಿನ ಹಣ್ಣುಗಳನ್ನು ಖರೀದಿಸಲು ಉತ್ತಮ ಅವಕಾಶ ಇದಾಗಿದೆ.

ಮೈಸೂರಿನ ಕುಪ್ಪಣ್ಣ ಪಾರ್ಕ್‌ನಲ್ಲಿ ಈ ಮಾವಿನ ಮೇಳವನ್ನು ಆಯೋಜಿಸಲಾಗಿದ್ದು, ಸುಮಾರು 24 ಮಳಿಗೆಗಳನ್ನು ಈ ಬಾರಿ ಹಾಕಲಾಗಿದೆ. ಈ ಬಾರಿ ಹಣ್ಣಿನ ಇಳುವರಿ ಕಡಿಮೆ ಆಗಿರುವುದರಿಂದ ದರದಲ್ಲಿ ಕೆಲ ವ್ಯತ್ಯಾಸ ಆಗಲಿದೆ. ಆದರೆ ಉತ್ತಮ ಗುಣಮಟ್ಟದ ಹಣ್ಣುಗಳು ಸಿಗುವುದು ಗ್ಯಾರಂಟಿ.

ಇನ್ನು ಈ ಬಾರಿ ಮಾನಕೂರ, ಬಾಗನಪಲ್ಲಿ, ದಶೇರಿ, ಕಾಲಾಪ ಹಾಡ್, ಕೇಶರ್, ಸಕ್ಕರೆ ಗುತ್ತಿ, ಅಮ್ರಪಾಲಿ, ಆಮ್ಲೆಟ್, ಚೈತ್ರಪೈರಿ, ದಿಲ್‌ಪಸಂದ್ , ಸೇಲಂ, ಶಿರಸಿ ಲೋಕಲ್, ರತ್ನಗಿರಿ (ಆಲನ್ಸ್), ಬಾದಾಮಿ, ರಸಪುರಿ, ಮಲಗೋವ, ಮಲ್ಲಿಕಾ, ಸೇಂದೂರಾ, ತೋತಾಪುರಿ, ಸೇರಿದಂತೆ 40ಕ್ಕೂ ಹಚ್ಚು ವಿಧದ ಮಾವಿನ ಹಣ್ಣುಗಳನ್ನು ಗ್ರಾಹಕರು ಖರೀದಿಸಬಹುದಾಗಿದೆ.

ಸಾಮಾನ್ಯವಾಗಿ ಮಾರುಕಟ್ಟೆಗಳಲ್ಲಿ ರಾಸಾಯನಿಕಯುಕ್ತ ಮಾವಿನ ಹಣ್ಣುಗಳ ಆರ್ಭಟ ಹೆಚ್ಚಿದೆ. ಬೇಗ ಹಣ್ಣಾಗಲಿ ಎಂದು ಕೆಮಿಕಲ್​ಗಳನ್ನು ಬಳಸಲಾಗುತ್ತದೆ. ಆದರೆ ಇದು ನಮ್ಮ ಆರೋಗ್ಯಕ್ಕೆ ಹಾನಿಕಾರಕ. ಈ ದೃಷ್ಟಿಯಿಂದ ಜನರಿಗೆ ಉತ್ತಮ ಗುಣಮಟ್ಟದ ಹಾಗೂ ರಾಸಾಯನಿಕ ರಹಿತ ಹಣ್ಣುಗಳು ಸಿಗಲಿ ಎಂದು ಈ ಮೇಳ ಆಯೋಜಿಸಲಾಗಿದೆ.

ರಾಜ್ಯದ ವಿವಿಧ ಜಿಲ್ಲೆಯಿಂದ ಇಲ್ಲಿ ಮಾವು ಬೆಳೆಗಾರರು ಬರಲಿದ್ದು, ಹೆಚ್ಚಾಗಿ ಮೈಸೂರು ಭಾಗದ ರೈತರಿಗೆ ಆದ್ಯತೆ ನೀಡಲಾಗಿದೆ. ಅಲ್ಲದೇ, ಈ ಮಾವಿನಕಾಯಿಗಳನ್ನು ರಾಸಾಯನಿಕ ವಸ್ತು ಬಳಸಿ ಹಣ್ಣು ಮಾಡಲಾಗಿದ್ದಾ ಎಂದೆಲ್ಲಾ ಪರೀಕ್ಷೆ ಮಾಡಿದ ನಂತರವೇ ಮೇಳದಲ್ಲಿ ಮಾರಾಟ ಮಾಡಲು ಅವಕಾಶ ನೀಡಲಾಗುತ್ತಿದೆ.

ಇಲ್ಲಿ ಮಾರಾಟಕ್ಕೆ ಬರುವ ರೈತರಿಗೆ ಸಹ ಮೊದಲೇ ಸೂಚನೆ ನೀಡಲಾಗಿದ್ದು, ದರವನ್ನು ಸಹ ನಿಗದಿ ಮಾಡಲಾಗಿದೆ. ಇನ್ನು ಈ ಮೇಳದಲ್ಲಿ ವಿವಿಧ ಗಿಡಗಳನ್ನು ಸಹ ಮಾರಾಟ ಮಾಡಲು ಅವಕಾಶ ನೀಡಲಾಗಿದ್ದು, ರೈತರಿಗೆ ಮಾತ್ರವಲ್ಲದೇ ಗಿಡದ ಬಗ್ಗೆ ಆಸಕ್ತಿ ಇರುವವರಿಗೆ ಇದು ಒಳ್ಳೆಯ ಅವಕಾಶ ಎನ್ನಬಹುದು.