Ganapati Temple: ಪ್ರಯಾಣಿಕರ ಜೀವ ಕಾಯುವ ಸುಳ್ಯ ಗಡಿಯ ಗಣಪ!

ಕರಾವಳಿ ಜಿಲ್ಲೆಗಳ ಗಡಿ ದಾಟಿ ಹೋಗಬೇಕಾದರೆ ಹಲವು ದೇಗುಲ, ದೈವಸ್ಥಾನಗಳು ಕಾಣಸಿಗುತ್ತವೆ. ಇಂತಹ ದೇಗುಲ, ಗುಡಿಗಳಿಗೆ ವಾಹನದಲ್ಲಿ ತೆರಳುವ ಸವಾರರೇ ಭಕ್ತರು. ಚಿಕ್ಕಮಗಳೂರು ಕಡೆಗೆ ತೆರಳುವವರು ಅಣ್ಣಪ್ಪ ಸ್ವಾಮಿ ದೇಗುಲದ ಬಳಿ ವಾಹನ ಬದಿಗೆ ಸರಿಸಿ, ಗಾಡಿಯಿಂದ ಕೆಳಗೆ ಇಳಿದು ಅಣ್ಣಪ್ಪ ಸ್ವಾಮಿ ದರ್ಶನ ಪಡೆದು ಮುಂದೆ ಸಾಗುತ್ತಾರೆ. ಅಂತಹದ್ದೇ ಇನ್ನೊಂದು ತಾಣ ಮಂಗಳೂರು-ಮಡಿಕೇರಿ ಸಂಪರ್ಕಿಸುವ ಗಡಿ ಭಾಗದಲ್ಲೂ ಇದೆ.

ಹೀಗೆ ದಕ್ಷಿಣ ಕನ್ನಡ-ಚಿಕ್ಕಮಗಳೂರು ಸಂಪರ್ಕಿಸುವ ಚಾರ್ಮಾಡಿ ಘಾಟ್ನಲ್ಲಿ ಅಣ್ಣಪ್ಪ ಸ್ವಾಮಿ ದೇವಸ್ಥಾನವಿದ್ದು, ಚಾರ್ಮಾಡಿ ಘಾಟ್ ರಕ್ಷಿಸುತ್ತಿರುವುದು ಅಣ್ಣಪ್ಪ ಸ್ವಾಮಿ ಎಂದು ಜನ ನಂಬಿಕೊಂಡು ಬಂದಿದ್ದಾರೆ. ಚಿಕ್ಕಮಗಳೂರು ಕಡೆಗೆ ತೆರಳುವವರು ಅಣ್ಣಪ್ಪ ಸ್ವಾಮಿ ದೇಗುಲದ ಬಳಿ ವಾಹನ ಬದಿಗೆ ಸರಿಸಿ, ಗಾಡಿಯಿಂದ ಕೆಳಗೆ ಇಳಿದು ಅಣ್ಣಪ್ಪ ಸ್ವಾಮಿ ದರ್ಶನ ಪಡೆದು ಮುಂದೆ ಸಾಗುತ್ತಾರೆ. ಅಂತದ್ದೇ ಇನ್ನೊಂದು ಪವಿತ್ರ ತಾಣ ಈ ಗುಡಿ.

ಹೌದು, ಚಾರ್ಮಾಡಿ ಅಣ್ಣಪ್ಪ ದೇಗುಲದಂತೆಯೇ ದಕ್ಷಿಣ ಕನ್ನಡದ ಸುಳ್ಯ ಹಾಗೂ ಕೊಡಗಿನ ಮಡಿಕೇರಿ ಸಂಪರ್ಕಿಸುವ ಗಡಿಯಾದ ಕೊಯನಾಡಿನಲ್ಲಿ ಗಣಪತಿ ದೇವರ ಪುಟ್ಟ ಗುಡಿಯಿದ್ದು, ಪ್ರಯಾಣದ ವೇಳೆ ವಿಘ್ನ ಎದುರಾಗದಂತೆ ಜನ ಕಡ್ಡಾಯವಾಗಿ ಇಲ್ಲಿ ನಮಿಸಿ ಮುಂದೆ ಸಾಗುವ ವಾಡಿಕೆಯಿದೆ.

ಈ ಕೊಯನಾಡು ಸುಳ್ಯ - ಮಡಿಕೇರಿ ಹೆದ್ದಾರಿಯಲ್ಲಿ ಸಿಗುವ ದಕ್ಷಿಣ ಕನ್ನಡ ಜಿಲ್ಲೆಯ ಕೊನೆಯ ಊರು ಆಗಿದೆ. ಮಡಿಕೇರಿಗೆ ಪ್ರಯಾಣ ಹೊರಟವರು ಕೊಯನಾಡು ಗಣಪತಿಗೆ ನಮಿಸದಿದ್ದಲ್ಲಿ ಅದೆಷ್ಟೋ ಬಾರಿ ಸಂಕಷ್ಟ ಎದುರಿಸಿದ್ದು ಇದೆಯಂತೆ. 

ಹೌದು, ಈ ಗಣೇಶನಿಗೆ ವಂದಿಸಿ ಹೊರಟರೆ ಯಾವ ಅಡ್ಡಿ ಆತಂಕವೂ ಇಲ್ಲ ಅನ್ನುತ್ತಾರೆ ವಾಹನ ಸವಾರರು. ಅಪಘಾತಗಳನ್ನ ತಪ್ಪಿಸುವ ಈ ಗಣಪನಿಗೆ ದಿನ ನೂರಾರು ವಾಹನ ಸವಾರರು ನಮಿಸಿ ಮುಂದಕ್ಕೆ ಸಾಗುತ್ತಾರೆ. ಸಣ್ಣ ಗುಡಿಯೊಂದರಲ್ಲಿ ವಾಸವಾಗಿರುವ ಈ ಗಣಪನಿಗೆ ಎಲ್ಲ ಜಾತಿ ಧರ್ಮದವರೂ ವಂದಿಸಿ ಹೋಗೋದು ವಿಶೇಷ.

ಪ್ರಯಾಣಿಕರು ಈ ಗಣಪನಿಗೆ ನಮಿಸದೇ ಮುಂದೆ ಹೋದಲ್ಲಿ ವಾಹನ ಕೈಕೊಡುವುದಾಗಲಿ, ಇನ್ನಿತರ ಸಂಕಷ್ಟ ಎದುರಿಸುವ ಸಾಧ್ಯತೆ ಜಾಸ್ತಿಯಂತೆ. 

ಗಣಪತಿ, ಗಣನಾಥ, ವಿಘ್ನ ನಾಶಕ ಹೀಗೆ ಹಲವಾರು ಹೆಸರಿನಲ್ಲಿ ಕರೆಸಿಕೊಳ್ಳುವ ಮೋದಕ ಪ್ರಿಯ ಗಣೇಶನಿಗೆ ಮೊದಲು ಪೂಜೆ ಸಲ್ಲಿಸುವುದು ಪ್ರತೀತಿ. ಯಾವುದೇ ಒಳ್ಳೆಯ ಕೆಲಸಕ್ಕೆ ಹೊರಟರು ಗಣಪತಿ ನೆನೆದರೆ ವಿಘ್ನಗಳಿಲ್ಲದೆ ಎಲ್ಲವೂ ಸಾಂಗವಾಗಿ ನಡೆಯುತ್ತದೆ ಅನ್ನೋ ನಂಬಿಕೆ.