Dakshina Kannada: ತಿಂಗಳಿಗೆ 5 ಸಾವಿರ ಆದಾಯವಾದ್ರೂ ಇವ್ರ ಬಳಿಯಿದೆ ಹಳೆ ಸಾಮಗ್ರಿಗಳ ನೂರಾರು ಕಲೆಕ್ಷನ್‌!

ಹಳೆಯ ಗ್ರಾಮಫೋನ್, ಝೆರಾಕ್ಸ್ ಯಂತ್ರ, ಬ್ಯಾಟರಿ ಟಾರ್ಚ್, ಚಿಮಣಿ ದೀಪ, ರೇಡಿಯೋ, ಟೇಪ್ ರೆಕಾರ್ಡರ್, ದೇಶ ವಿದೇಶದ ಕರೆನ್ಸಿ ನೋಟು ಹೀಗೆ ಒಂದೊಂದೂ ಅಪರೂಪದ ಹಳೆಯ ವಸ್ತುಗಳು!

ಇಂದಿನ ತಲೆಮಾರಿಗೆ ವಿಶೇಷ ಅನುಭವ ನೀಡುವ ಈ ವಸ್ತುಗಳು ಕೆಲವು ದಶಕಗಳ ಹಿಂದೆ ಸಾಮಾನ್ಯ ನಾಗರಿಕರು ಬಳಸುತ್ತಿದ್ದ ವಸ್ತುಗಳೇ ಆಗಿದ್ದವು. ಆದರೆ ಮುಂದಿನ ತಲೆಮಾರಿಗೂ ಇದನ್ನು ಪರಿಚಯಿಸುವ ನಿಟ್ಟಿನಲ್ಲಿ ದಕ್ಷಿಣ ಕನ್ನಡ ಜಿಲ್ಲೆಯ ಹಳೆಯ ವಸ್ತುಗಳ ಸಂಗ್ರಹಿಸುವ ಹವ್ಯಾಸ ಹೊಂದಿರುವ ವ್ಯಕ್ತಿಯೊಬ್ಬರು ಗಮನ ಸೆಳೆದಿದ್ದಾರೆ.

ಹೌದು, ವಸ್ತು ಸಂಗ್ರಹಗಳ ಈ ವಿಶೇಷ ಆಸಕ್ತಿ ಹೊಂದಿರುವ ಇವರ ಹೆಸರು ಹಳ್ಳಿಮನೆ ಹೈದರಾಲಿ. ಮೂಲತಃ ಬೆಳ್ತಂಗಡಿಯ ಕೊಯ್ಯುರಿನವರು. ನರ್ಸರಿಯೊಂದರಲ್ಲಿ ಕೆಲಸ ಮಾಡುವ ಹೈದರ್ ತಮ್ಮ ದುಡಿಮೆಯ ಇಪ್ಪತ್ತು ಪ್ರತಿಶತವನ್ನ ವಸ್ತು ಸಂಗ್ರಹಕ್ಕಾಗಿಯೇ ಮೀಸಲಿಡುತ್ತಾರೆ.

ಹೈದರ್ ಅವರು ಚಿಕ್ಕಂದಿನಿಂದಲೇ ವಸ್ತು ಸಂಗ್ರಹದ ಬಗ್ಗೆ ಆಸಕ್ತಿ ಹೊಂದಿದ್ದರು, ಲಕ್ಷ್ಮೀ ಎಂಬ ಶಿಕ್ಷಕಿಯೋರ್ವರ ಪ್ರೇರಣೆಯಿಂದ ಶುರುವಾದ ಸಂಗ್ರಹದ ಕೆಲಸಕ್ಕೆ ಇದೀಗ ಐವತ್ತೆರಡು ವರ್ಷವಾಗಿದೆ.

ತಿಂಗಳಿಗೆ 5 ಸಾವಿರ ದುಡಿಯುವ ಹೈದರ್ ತಮ್ಮ ಜೊತೆ ತಮ್ಮ ಮಗಳಾದ ಪಟ್ಟಿಮುತ್ತು ರಜಿಯಾ ಆಲಿಯಾಳ ಜೊತೆಗೂಡಿ ವಸ್ತು ಸಂಗ್ರಹ ಮಾಡುತ್ತಿದ್ದಾರೆ. ಹೈದರ್ ಅವರ ಮಗಳು ಕೂಡ ತಮ್ಮ ಸ್ಕಾಲರ್ಶಿಪ್ ಹಣವನ್ನ ವಸ್ತು ಸಂಗ್ರಹಕ್ಕಾಗಿಯೇ ಮೀಸಲಿಟ್ಟಿದ್ದಾರಂತೆ.

ಇವರ ಸಂಗ್ರಹದಲ್ಲಿರುವ ಹಳೆಯ ಗ್ರಾಮಫೋನ್, ಝೆರಾಕ್ಸ್ ಯಂತ್ರ, ಬ್ಯಾಟರಿ ಟಾರ್ಚ್, ಚಿಮಣಿ ದೀಪ, ರೇಡಿಯೋ, ಟೇಪ್ ರೆಕಾರ್ಡರ್, ದೇಶ ವಿದೇಶದ ಕರೆನ್ಸಿ ನೋಟುಗಳ ಕಣ್ಮನ ಸೆಳೆಯುತ್ತವೆ.

ಒಂದಲ್ಲಾ ಒಂದು ಕಾಲದಲ್ಲಿ ಬಳಸುತ್ತಿದ್ದ ಝೆರಾಕ್ಸ್ ಮಷಿನ್ ಹೀಗಿತ್ತಂತೆ ನೋಡಿ! ಇದು ಸದ್ಯ ಹಳ್ಳಿಮನೆ ಹೈದರಾಲಿ ಅವರ ಸಂಗ್ರಹದಲ್ಲಿ ಜೋಪಾನವಾಗಿದೆ.

ಇಂತಹ ಕಾಯಿನ್ ಬಾಕ್ಸ್, ಹಳೆಯ ಫೋನ್​ಗಳು ಇತ್ತೀಚಿಗೆ ಕಣ್ಮರೆಯಾಗುತ್ತಿವೆ. ಹೀಗಾಗಿ ದಕ್ಷಿಣ ಕನ್ನಡ ಜಿಲ್ಲೆಯ ಹೈದರಾಲಿ ಅವರ ಸಂಗ್ರಹದಲ್ಲಿರುವ ಈ ಅಪರೂಪದ ವಸ್ತುಗಳು ಕುತೂಹಲ ಮೂಡಿಸುತ್ತವೆ.