Asthma Care: ಉದ್ಯೋಗಸ್ಥ ಮಹಿಳೆಯರು ಅಸ್ತಮಾ ಕಾಯಿಲೆ ನಿಯಂತ್ರಣಕ್ಕೆ ಹೀಗೆ ಕ್ರಮ ತೆಗೆದುಕೊಳ್ಳಿ

ಅಸ್ತಮಾ ಒಂದು ದೀರ್ಘಕಾಲದ ಉಸಿರಾಟದ ಕಾಯಿಲೆ ಆಗಿದೆ. ಇಂದಿನ ದಿನಗಳಲ್ಲಿ ಮಾನಿನ್ಯದ ಪರಿಣಾಮ ಪ್ರಪಂಚದಾದ್ಯಂತ ಲಕ್ಷಾಂತರ ಜನರು ಅಸ್ತಮಾ ಕಾಯಿಲೆಯಿಂದ ಬಳಲುತ್ತಿದ್ದಾರೆ. ಆಸ್ತಮಾ ಇಂದು ಚಿಕ್ಕ ಮಕ್ಕಳು, ಹದಿಹರೆಯದವರು, ವಯಸ್ಸಾದವರು ಹೀಗೆ ಎಲ್ಲಾ ವರ್ಗದ ಜನರನ್ನು ಕಾಡುತ್ತಿದೆ. ಆಸ್ತಮಾ ಕಾಯಿಲೆಯು ಮಹಿಳೆಯರು ಮತ್ತು ಪುರುಷರ ಮೇಲೆ ಭಿನ್ನವಾಗಿ ಪ್ರಭಾವ ಬೀರುತ್ತದೆ.

ವಾಸ್ತವದಲ್ಲಿ ಮಹಿಳೆಯರು ದೀರ್ಘಕಾಲದ ಆಸ್ತಮಾ ಕಾಯಿಲೆಯ ಹೆಚ್ಚಿನ ಅಪಾಯ ಹೊಂದಿದ್ದಾರೆ. ಜೊತೆಗೆ ಮಹಾನಗರಗಳಲ್ಲಿ ವಾಸಿಸುವ ಉದ್ಯೋಗಸ್ಥ ಮಹಿಳೆಯರು ಹೆಚ್ಚಿನ ಸಮಸ್ಯೆ ಎದುರಿಸಬೇಕಾಗುತ್ತದೆ ಅಂತಾರೆ ತಜ್ಞರು. ಹಾಗಾಗಿ ಅಸ್ತಮಾ ಕಾಯಿಲೆಯ ಅಪಾಯ ಮತ್ತು ಅದನ್ನು ಹೇಗೆ ತಡೆಯುವುದು ಎಂಬ ಬಗ್ಗೆ ತಿಳಿವಳಿಕೆ ಹೊಂದುವುದು ತುಂಬಾ ಮುಖ್ಯ.

ವಾಯುಮಾಲಿನ್ಯವು ಇತರೆ ನಗರಗಳು ಅಥವಾ ಪಟ್ಟಣಗಳಿಗಿಂತ ಮಹಾನಗರಗಳಲ್ಲಿ ಹೆಚ್ಚಾಗಿ ಕಂಡು ಬರುತ್ತದೆ. ಇದಕ್ಕೆ ವಾಯು ಮಾಲಿನ್ಯವು ಮುಖ್ಯ ಕಾರಣವಾಗಿದೆ. ಗರ್ಭಾವಸ್ಥೆ ಮತ್ತು ಋತುಬಂಧವು ಅಸ್ತಮಾ ರೋಗ ಲಕ್ಷಣ ಹೆಚ್ಚಿಸುವ ಸಾಧ್ಯತೆ ಇದೆ ಅಂತಾರೆ ತಜ್ಞರು. ಮಹಿಳೆಯರು ತಮ್ಮ ಜೀವನದುದ್ದಕ್ಕೂ ಹಾರ್ಮೋನುಗಳ ಬದಲಾವಣೆ ಅನುಭವಿಸುತ್ತಾರೆ.

ಪ್ರೌಢಾವಸ್ಥೆಗೆ ತಲುಪಿದಾಗ, ಮುಟ್ಟಿನ ಸಮಯದಲ್ಲಿ, ಗರ್ಭಾವಸ್ಥೆ ಮತ್ತು ಋತುಬಂಧದ ಸಮಯದಲ್ಲಿ ಹಾರ್ಮೋನುಗಳ ಬದಲಾವಣೆ ಉಂಟಾಗುತ್ತವೆ. ಆಗ ಇದು ಶ್ವಾಸಕೋಶದ ಕಾರ್ಯದ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಹೆಚ್ಚು. ಇದು ಆಸ್ತಮಾ ರೋಗ ಲಕ್ಷಣಗಳ ತೀವ್ರತೆ ಹೆಚ್ಚಿಸಬಹುದು. ಅದರಲ್ಲೂ ಉದ್ಯೋಗಸ್ಥ ಮಹಿಳೆಯರು ಆಸ್ತಮಾ ಕಾಯಿಲೆ ಬಗ್ಗೆ ವಿಶೇಷ ಕಾಳಜಿ ವಹಿಸಬೇಕಾಗುತ್ತದೆ.

ಉದ್ಯೋಗಸ್ಥ ಮಹಿಳೆಯರು ಅಸ್ತಮಾ ಕಾಯಿಲೆಯಿಂದ ಬಳಲುತ್ತಿದ್ದರೆ ಈ ವಿಷಯಗಳನ್ನು ನೆನಪಿಡಬೇಕು. ಮೊದಲು ವಾಯು ಮಾಲಿನ್ಯದಿಂದ ನಿಮ್ಮನ್ನು ನೀವು ರಕ್ಷಿಸಿಕೊಳ್ಳಿ. ನಗರ ಪ್ರದೇಶಗಳಲ್ಲಿ ಅದರಲ್ಲೂ ಮೆಟ್ರೋಪಾಲಿಟನ್ ಸಿಟಿಯಲ್ಲಿ ಮಾಲಿನ್ಯ ತುಂಬಿ ತುಳುಕಾಡುತ್ತಿದೆ. ವಾಹನಗಳು ಮತ್ತು ಕಾರ್ಖಾನೆಗಳಿಂದ ಹೊರಬರುವ ಹೊಗೆಯು ಉಬ್ಬಸ ಮತ್ತು ಉಸಿರಾಟ ತೊಂದರೆ, ಅಸ್ತಮಾಗೆ ಕಾರಣವಾಗಿದೆ. ಮೂಗನ್ನು ಕವರ್ ಮಾಡಿಕೊಳ್ಳುವ ಮೂಲಕ ಹೊಗೆ, ಧೂಳಿನಿಂದ ರಕ್ಷಣೆ ಪಡೆಯಿರಿ.

ಕೀಟನಾಶಕ ಬಳಕೆ ತಪ್ಪಿಸಿ. ಇದು ಆಸ್ತಮಾದ ಅಪಾಯ ಹೆಚ್ಚಿಸುತ್ತದೆ. ಕೀಟನಾಶಕ ಸಿಂಪಡಣೆ ಮತ್ತು ಅಂತಹ ಪ್ರದೇಶದಲ್ಲಿ ಕೆಲಸ ಮಾಡುವ ಮಹಿಳೆಯರಿಗೆ ಹೆಚ್ಚಿನ ಅಪಾಯವಿದೆ. ಕೀಟನಾಶಕ ಸಿಂಪಡಿಸುವಾಗ ಕಚೇರಿ ಅಥವಾ ಮನೆಯೊಳಗೆ ಇರಬೇಡಿ. ಅಲರ್ಜಿಯಾಗುವ ಅಂಶಗಳಿಂದ ರಕ್ಷಣೆ ಪಡೆಯಿರಿ. ಅಲರ್ಜಿ ಸಂಬಂಧಿ ಪರಿಸ್ಥಿತಿ, ಎಸ್ಜಿಮಾದಿಂದ ರಕ್ಷಣೆ ಪಡೆಯಿರಿ.

ಬೊಜ್ಜು ನಿಯಂತ್ರಿಸಿ. ಸ್ಥೂಲಕಾಯ ಹೊಂದಿದವರಲ್ಲಿ ಆಸ್ತಮಾ ಹೆಚ್ಚಾಗಿ ಕಂಡು ಬರುತ್ತದೆ. ಇದು ದೇಹದಲ್ಲಿ ಉರಿಯೂತ ಉಂಟು ಮಾಡುತ್ತದೆ. ಶ್ವಾಸನಾಳದಲ್ಲಿ ಊತ ಮತ್ತು ಕಿರಿಕಿರಿ ಉಂಟು ಮಾಡುತ್ತದೆ. ಹಾಗಾಗಿ ವ್ಯಾಯಾಮ ಮತ್ತು ಯೋಗ ಮಾಡಿ. ಧೂಮಪಾನ, ಮದ್ಯಪಾನ ಎರಡನ್ನೂ ತಪ್ಪಿಸಿ. ಸಿಗರೇಟ್ ಹೊಗೆ ವಾಯುಮಾರ್ಗಗಳನ್ನು ಕಿರಿಕಿರಿಗೊಳಿಸುತ್ತದೆ.

ಮನೆಯ ಹೊರಗೆ ಅಥವಾ ಕಾರಿನಲ್ಲಿ ಧೂಮಪಾನ ಮಾಡಿದರೂ ಸಹ ದೀರ್ಘಕಾಲದ ಹೊಗೆ ಮತ್ತು ರಾಸಾಯನಿಕಗಳು ನಿಮಗೆ ಸಾಖಷ್ಟು ಹಾನಿ ಮಾಡುತ್ತವೆ. ಗರ್ಭಾವಸ್ಥೆಯಲ್ಲಿ ಸಿಗರೇಟ್ ಸೇದುವುದು ಮಗುವಿನ ಆರೋಗ್ಯಕ್ಕೆ ಹಾನಿಕರ. ಇದರಿಂದ ಮಗುವಿಗೆ ಆಸ್ತಮಾ ಅಪಾಯ ಹೆಚ್ಚು. ಹಾಗಾಗಿ ಧೂಮಪಾನ ಮತ್ತು ಮದ್ಯಪಾನ ಮಾಡುವುದನ್ನು ತಪ್ಪಿಸಿ.