Sun Charged Water ಎಂದರೇನು? ಇದು ವಿಟಮಿನ್ ಡಿ ಕೊರತೆಯನ್ನು ನಿವಾರಿಸುತ್ತದೆಯೇ?

ಸನ್ ಚಾರ್ಜ್ಡ್ ವಾಟರ್ ಅಂದರೆ ಬೆಳಗಿನ ಸೂರ್ಯನ ಬಿಸಿಲಿನಲ್ಲಿ ಇರಿಸಿ, ಬಿಸಿ ಮಾಡಿದ ನೀರು. ಇದು ಹಲವು ಆರೋಗ್ಯ ಪ್ರಯೋಜನಗಳನ್ನು ನೀಡುತ್ತದೆ ಅಂತಾರೆ ತಜ್ಞರು. ನೀರು ಮತ್ತು ಸೂರ್ಯನ ಬೆಳಕಿನ ನಡುವಿನ ಸಂಬಂಧವು ಆರೋಗ್ಯಕ್ಕೆ ಸಾಕಷ್ಟು ಪ್ರಯೋಜನ ನೀಡುತ್ತದೆ ಎಂದೇ ಹೇಳಲಾಗುತ್ತದೆ. ಹೀಗಾಗಿ ಬೆಳಗ್ಗೆ ಸೂರ್ಯನಿಗೆ ಅರ್ಘ್ಯ ನೀಡುವ ಪದ್ಧತಿಯಿದೆ.

ಬೆಳಗ್ಗೆ ಸೂರ್ಯನಿಗೆ ಅರ್ಘ್ಯ ಅಂದ್ರೆ ಸೂರ್ಯನಿಗೆ ನೀರನ್ನು ಅರ್ಪಿಸಿದರೆ ಇದು ಆತ್ಮ ಮತ್ತು ಮನಸ್ಸು ಚೈತನ್ಯಗೊಳಿಸುತ್ತದೆ. ಜೊತೆಗೆ ವಿಟಮಿನ್ ಡಿ ಕೊರತೆ ನಿವಾರಿಸುತ್ತದೆ ಎನ್ನಲಾಗುತ್ತದೆ. ನಿಜವಾಗಿಯೂ ಸನ್ ಚಾರ್ಜ್ಡ್ ನೀರು ವಿಟಮಿನ್ ಡಿ ಕೊರತೆಯನ್ನು ನಿವಾರಿಸುತ್ತದೆಯೇ? ಇದರ ಬಗ್ಗೆ ತಜ್ಞರು ಏನು ಹೇಳುತ್ತಾರೆ ನೋಡೋಣ.

ಇಂತಹ ಅನೇಕ ನೈಸರ್ಗಿಕ ವಿಷಯಗಳ ಬಗ್ಗೆ ಆಯುರ್ವೇದದಲ್ಲಿ ಉಲ್ಲೇಖವಿದೆ. ಇದು ನಮ್ಮ ಆರೋಗ್ಯಕ್ಕೆ ತುಂಬಾ ಪ್ರಯೋಜನಕಾರಿ. ಸನ್ ಚಾರ್ಜ್ಡ್ ನೀರನ್ನು ಕುಡಿದರೆ ಹಲವು ಪೋಷಕಾಂಶಗಳು ದೇಹವನ್ನು ಸೇರುತ್ತವೆ. ಆಯುರ್ವೇದದ ಪ್ರಕಾರ, ಸೂರ್ಯನ ಬೆಳಕು ನೀರಿನ ಮೇಲೆ ಬಿದ್ದರೆ ಅದು ತನ್ನ ಆಣ್ವಿಕ ರಚನೆಯನ್ನು ಬದಲಾವಣೆ ಮಾಡುತ್ತದೆ. ಅದನ್ನು ಜೀವಜಲವಾಗಿ ಪರಿವರ್ತಿಸುತ್ತದೆ.

ಸನ್ ಚಾರ್ಜ್ಡ್ ವಾಟರ್ ನ್ನು ಆಯುರ್ವೇದವು ಸೂರ್ಯ ಚಿಕಿತ್ಸೆ ವಿಧಾನ ಅಥವಾ ಸೌರೀಕೃತ ನೀರಿನ ಆರೋಗ್ಯಕರ ಆಯುರ್ವೇದ ವಿಧಾನ ಎಂದು ಕರೆಯುತ್ತಾರೆ. ಆಯುರ್ವೇದವು ಶುದ್ಧ ನೀರನ್ನು ಕುಡಿಯಲು ಶಿಫಾರಸು ಮಾಡುತ್ತದೆ. ಈ ಚಿಕಿತ್ಸೆ ವಿಧಾನವನ್ನು ಅಥರ್ವಣ ವೇದದಲ್ಲಿ ಸೂರ್ಯ ಕಿರಣ ಚಿಕಿತ್ಸೆ ವಿಧಾನ ಎಂದು ವರ್ಗೀಕರಿಸಲಾಗಿದೆ. ಇದು ಸೂರ್ಯನ ಕಿರಣಗಳಿಂದ ಚಿಕಿತ್ಸೆ ನೀಡುವ ವಿಧಾನವಾಗಿದೆ.

ಸನ್ ಚಾರ್ಜ್ಡ್ ವಾಟರ್ ಅಂದರೆ ಸೂರ್ಯ ಕಿರಣ ಚಿಕಿತ್ಸೆ ವಿಧಾನದಿಂದ ಶಾಖ ಮತ್ತು ಬೆಳಕು, ನೀರು ಆಕ್ಸಿಡೀಕರಣಗೊಳ್ಳಲು ಸಹಾಯ ಮಾಡುತ್ತದೆ. ಇದು ದೇಹದಲ್ಲಿ ಶಕ್ತಿಯ ಮಟ್ಟ ಹೆಚ್ಚಿಸುತ್ತದೆ. ದೇಹದಲ್ಲಿನ ಉರಿಯೂತ ಕಡಿಮೆ ಮಾಡುತ್ತದೆ. ಸೂರ್ಯನ ಚಾರ್ಜ್ ಮಾಡಿದ ನೀರು ಕುಡಿದರೆ ಸಾಕಷ್ಟು ಆರೋಗ್ಯ ಪ್ರಯೋಜನಗಳು ಸಿಗುತ್ತವೆ.

ಸನ್ ಚಾರ್ಜ್ಡ್ ನೀರು ಕುಡಿದರೆ ದೇಹದಲ್ಲಿ ಶಕ್ತಿಯ ಮಟ್ಟ ಹೆಚ್ಚಾಗುತ್ತದೆ. ಇದು ಆಂಟಿವೈರಲ್, ಆಂಟಿಫಂಗಲ್ ಮತ್ತು ಬ್ಯಾಕ್ಟೀರಿಯಾ ವಿರೋಧಿ ಗುಣ ಹೊಂದಿದೆ. ಚರ್ಮವನ್ನು ಸ್ವಚ್ಛಗೊಳಿಸಲು ಸಹಕಾರಿ. ಕಣ್ಣುಗಳನ್ನು ತೊಳೆಯಲು ಸೂಕ್ತವಾಗಿದೆ. ಜೀರ್ಣಕ್ರಿಯೆಗೆ ಸಹಕಾರಿ. ಹಸಿವನ್ನು ಹೆಚ್ಚಿಸುತ್ತದೆ ಮತ್ತು ಜೀರ್ಣಾಂಗ ವ್ಯವಸ್ಥೆ ತೊಂದರೆ, ಹೊಟ್ಟೆಯಲ್ಲಿ ಹುಳು ಸಮಸ್ಯೆ, ಆಮ್ಲೀಯತೆ ಮತ್ತು ಹೊಟ್ಟೆಯ ಹುಣ್ಣು ಸಮಸ್ಯೆ ಹೋಗಲಾಡಿಸುತ್ತದೆ.

ಸೂರ್ಯ ಕಿರಣ ಚಿಕಿತ್ಸೆಯಿಂದ ಚರ್ಮದ ಅಲರ್ಜಿ, ದದ್ದು ಸಮಸ್ಯೆ ನಿವಾರಣೆಯಾಗುತ್ತದೆ. ಇದು ಮುಖಕ್ಕೆ ಹೊಳಪನ್ನು ನೀಡುತ್ತದೆ. ಇನ್ನು ಸೂರ್ಯ ಕಿರಣ ಚಿಕಿತ್ಸೆಯು ವಿಟಮಿನ್ ಡಿ ಕೊರತೆಯನ್ನು ನಿವಾರಿಸಲು ಕಡಿಮೆ ಸಾಧ್ಯತೆಯಿದೆ ಅಂತಾರೆ ತಜ್ಞರು. ಯಾಕಂದ್ರೆ ಸೂರ್ಯನ ಬೆಳಕು ಚರ್ಮದ ಕೊಲೆಸ್ಟ್ರಾಲ್ ತಲುಪಿ ಅಲ್ಲಿ ರಾಸಾಯನಿಕ ಕ್ರಿಯೆಗಳ ಸರಣಿಗೆ ಪ್ರಚೋದನೆ ನೀಡುತ್ತದೆ. ಇದು ವಿಟಮಿನ್ ಡಿ ಉತ್ಪತ್ತಿ ಮಾಡುತ್ತದೆ.

ಹಾಗಾಗಿ ಸೂರ್ಯ ಕಿರಣ ಚಿಕಿತ್ಸೆ ನೀರು ಸರಿಯಾಗಿ ವಿಟಮಿನ್ ಡಿ ಒದಗಿಸಲು ಸಾಧ್ಯವಾಗಲ್ಲ. ನೀರು ಚರ್ಮದಂತೆಯೇ ರಾಸಾಯನಿಕ ಪ್ರಕ್ರಿಯೆಗೆ ಒಳಗಾಗಲ್ಲ. ಹೀಗಾಗಿ ವಿಟಮಿನ್ ಡಿ ಒದಗಿಸಲು ಆಗಲ್ಲ. ಹಾಗಾಗಿ ಬೆಳಗಿನ 10 ಗಂಟೆಯೊಳಗಿನ ಬಿಸಿಲಿಗೆ ಮೈಯೊಡ್ಡುವುದು ಸರಿಯಾದ ಪ್ರಮಾಣದಲ್ಲಿ ದೇಹವು ವಿಟಮಿನ್ ಡಿ ಪಡೆಯಲು ಸಾಧ್ಯವಾಗುತ್ತದೆ. ಜೊತೆಗೆ ವಿಟಮಿನ್ ಡಿ ಸಮೃದ್ಧ ಆಹಾರ ಸೇವಿಸಿ.