Ugadi: ನಾವಿರೋದು 2022ರಲ್ಲಿ ಅಲ್ಲ, 2079ರಲ್ಲಿ! ಹಿಂದೂ ಕ್ಯಾಲೆಂಡರ್‌ನಲ್ಲಿದೆ ಕುತೂಹಲಕಾರಿ ಮಾಹಿತಿ

ಹಿಂದೂ ಪುರಾಣಗಳ ಪ್ರಕಾರ ಯುಗಾದಿ ಎಂದರೆ ಬ್ರಹ್ಮನು ಬ್ರಹ್ಮಾಂಡವನ್ನು ಸೃಷ್ಟಿ ಮಾಡಿದ ದಿನ. ಈ ದಿನ ಪ್ರಕೃತಿಯಲ್ಲಿ ಸಹ ಹಲವಾರು ಬದಲಾವಣೆಗಳಾಗುತ್ತದೆ. ಯುಗಾದಿಯನ್ನು ವಿಶೇಷ ಹಬ್ಬ ಎನ್ನಬಹುದು.

ಚಳಿಯ ನಂತರ ವಸಂತಕಾಲದ ಆರಂಭ ಮತ್ತು ಸೌಮ್ಯವಾದ ಹವಾಮಾನದ ಬದಲಾವಣೆಯ ಸಂಕೇತ ಈ ಯುಗಾದಿ, ಕುಟುಂಬಸ್ಥರು ಎಲ್ಲರೂ ಜೊತೆಗೊಡಿ ಈ ಹಬ್ಬವನ್ನು ಸಂಭ್ರಮ ಸಡಗರದಿಂದ ಆಚರಣೆ ಮಾಡುತ್ತಾರೆ.

ಸಾಮಾನ್ಯವಾಗಿ ನಾವು ಇದು ಯಾವ ಇಸವಿ ಎಂದರೆ 2022 ಎನ್ನುತ್ತೇವೆ. ಆದರೆ ಹಿಂದೂ ಕ್ಯಾಲೆಂಡರ್​ ಪ್ರಕಾರ ನಾವು ಬಹಳಷ್ಟು ಮುಂದಿದ್ದೇವೆ.  ನೀವು ಈ ಪೂಜೆಯ ಸಮಯದಲ್ಲಿ ಶಾಲಿವಾಹನ ಶಕೆ , ವಿಕ್ರಮ ನಾಮ ಸಂವತ್ಸರ  ಎನ್ನುವುದನ್ನ ಕೇಳಿರುತ್ತೇವೆ.

ಈ 2022 ಎಂಬುದು ಹಿಂದೂ ಕ್ಯಾಲೆಂಡರ್ ಪ್ರಕಾರ ವಿಕ್ರಮ ನಾಮ ಸಂವತ್ಸರ 2079. ಹೌದು ನಾವು ಬರೋಬ್ಬರಿ 57 ವರ್ಷಗಳಷ್ಟು ಮುಂದಿದ್ದೇವೆ.

ಹೌದು, ಇದು ಆಶ್ಚರ್ಯವಾದರೂ ಸತ್ಯ. ನಾವಿರುವ ವರ್ಷಕ್ಕೂ ನಮ್ಮ ಹಿಂದೂ ಕ್ಯಾಲೆಂಡರ್​ ವರ್ಷಕ್ಕೂ ಅಜಗಜಾಂತರ ವ್ಯತ್ಯಾಸವಿದೆ.

ಯುಗಾದಿಯನ್ನು ಚಂದ್ರಮಾನ-ಸೌರಮಾನ ಹೀಗೆ ಎರಡು ಬಗೆಯಲ್ಲಿ ಆಚರಿಸುವ ಪದ್ಧತಿ ಇದೆ. ಚಂದ್ರನ ಚಲನೆಯನ್ನು ಗುರುತಿಸಿ ಮಾಡುವ ಪದ್ಧತಿಗೆ ಚಂದ್ರಮಾನ ಯುಗಾದಿ ಎನ್ನುತ್ತಾರೆ.  ಸೂರ್ಯ ಮೇಷರಾಶಿಗೆ ಬಂದಾಗ ಸೌರಮಾನ ಯುಗಾದಿಯನ್ನು ಆಚರಿಸುತ್ತಾರೆ. ದಕ್ಷಿಣ ಭಾರತೀಯರು ಚಾಂದ್ರಮಾನವನ್ನು ಅನುಸರಿಸಿ ಚೈತ್ರಶುದ್ಧ ಪಾಡ್ಯಮಿಯಂದು ಯುಗಾದಿ ಆಚರಣೆ ಮಾಡಲಾಗುತ್ತದೆ.

ಹಿಂದೂ ಕ್ಯಾಲೆಂಡರ್​ ಪ್ರಕಾರ ಈ ಹಬ್ಬದ ವಸಂತ ಋತು ಆರಂಭವಾಗುತ್ತದೆ. ಮರಗಳು, ಗಿಡಗಳು ಚಿಗುರು ಒಡೆಯುತ್ತದೆ. ಶಾಸ್ತ್ರ, ಗ್ರಂಥಗಳಲ್ಲಿ ಯುಗಾದಿಯನ್ನು ಕುರಿತು ಹೇಳಲಾಗಿದೆ. ಶ್ರೀರಾಮನು ರಾವಣನನ್ನು ಸಂಹರಿಸಿ ಬಂದಾಗ ಅಯೋಧ್ಯೆಯಲ್ಲಿ ಶ್ರೀರಾಮಚಂದ್ರನ ಪಟ್ಟಾಭಿಷೇಕವಾದ ದಿನ. ಅಲ್ಲದೆ ಮಹಾಭಾರತದಲ್ಲಿ ಬರುವ ಚೀದಿರಾಜ್ಯದ ಅರಸು ವಸುವಿನ ಉಗ್ರ ತಪಸ್ಸಿಗೆ ಮೆಚ್ಚಿದ ಇಂದ್ರನು ವೈಜಯಂತಿ ಮಾಲೆಯನ್ನು ಅವನಿಗೆ ಕೊಟ್ಟು, ಚಿನ್ನದ ಕಲಶವುಳ್ಳ ಚಕ್ರಾಧಿಪತ್ಯದ ಧ್ವಜವನ್ನು ರಾಜನ ತಲೆಯ ಮೇಲೆ ಇಟ್ಟಿರುವ ದಿನ ಎಂದು ಸಹ ಹೇಳಲಾಗುತ್ತದೆ.

ಈ ದಿನ ಪಂಚಾಂಗ  ಕೇಳುವುದರಿಂದ ಮಾನವನ ಆಯುಷ್ಯ ಹೆಚ್ಚಾಗುತ್ತದೆ. ರೋಗ-ಪಾಪಗಳು ನಾಶವಾಗಿ ಗಂಗಾ ಸ್ನಾನ ಮಾಡಿದಷ್ಟು ಫಲ ಸಿಗುತ್ತದೆ  ಎನ್ನಲಾಗುತ್ತದೆ. ಅಲ್ಲದೇ ವರ್ಷದ ಕಷ್ಟ-ನಷ್ಟ, ಮಳೆ-ಬೆಳೆ ವಿಚಾರವನ್ನು ಮೊದಲೇ ತಿಳಿದುಕೊಳ್ಳಬಹುದು.