Hand Hygiene Day: ನಿಮ್ಮ ಮಗು ಸರಿಯಾಗಿ ಕೈ ತೊಳೆಯೋದಿಲ್ವಾ? ಕಂದಮ್ಮ ಕ್ಲೀನ್ ಆಗಿರೋಕೆ ಹೀಗೆ ಮಾಡಿ

ಮಕ್ಕಳು ತುಂಬಾ ಆಟೋಟಗಳಲ್ಲಿ ಸಮಯ ಕಳೆಯುತ್ತಾರೆ. ಅವರಿಗೆ ಸ್ವಚ್ಛತೆಗಿಂತ ಆಟೋಟವೇ ಮುಖ್ಯವಾಗುತ್ತದೆ. ನೆಲ, ಮಣ್ಣು, ಬಾಗಿಲು, ಹೊರಗಿನ ಗೋಡೆ, ಲಿಫ್ಟ್‌, ಹ್ಯಾಂಡ್ ರೈಲ್‌, ವಾಹನ ಹೀಗೆ ಎಲ್ಲಾ ವಸ್ತುಗಳನ್ನು ಮುಟ್ಟುತ್ತಾರೆ. ಇದರಿಂದಾಗಿ ಮಕ್ಕಳು ಬೇಗ ಸೋಂಕಿಗೆ ತುತ್ತಾಗುತ್ತಾರೆ.

ಕೈಗಳ ಮೂಲಕ ಸೂಕ್ಷ್ಮ ಬ್ಯಾಕ್ಟೀರಿಯಾಗಳು ಮುಖ, ಕಣ್ಣು ಮತ್ತು ಬಾಯಿಗೆ ಹೋಗುತ್ತವೆ. ಹೀಗಾಗಿ ಮಕ್ಕಳಿಗೆ ಬಾಲ್ಯದಿಂದಲೇ ಕೈ ತೊಳೆಯುವ ಅಭ್ಯಾಸ ರೂಢಿಸಿ. ಇಂದು ವಿಶ್ವ ಕೈಗಳ ನೈರ್ಮಲ್ಯ ದಿನ. ಈ ದಿನದ ಮೂಲಕ ಮಕ್ಕಳಲ್ಲಿ ಕೈ ತೊಳೆಯುವ ಅಭ್ಯಾಸ ಮತ್ತು ಜಾಗೃತಿ ಮೂಡಿಸಲಾಗುತ್ತದೆ.

ಚಿಕ್ಕ ಮಕ್ಕಳು ಹೆಚ್ಚಾಗಿ ಅನೇಕ ಕಡೆಗಳಲ್ಲಿ, ಜಾಗ, ವಸ್ತುಗಳನ್ನು ಮುಟ್ಟುತ್ತಾರೆ. ದಿನದ 24 ಗಂಟೆಯೂ ಮಕ್ಕಳ ಮೇಲೆ ಕಣ್ಣಿಡುವುದು, ಕಾಯುವುದು ತುಂಬಾ ಕಷ್ಟ. ಬಾಲ್ಯದಿಂದಲೇ ಅವರಲ್ಲಿ ಉತ್ತಮ ಮತ್ತು ಆರೋಗ್ಯಕರ ಅಭ್ಯಾಸ ಬೆಳೆಸುವುದು ಅವಶ್ಯಕ. ಕೈ ತೊಳೆಯುವುದು ರೂಢಿಸಿ, ಆರೋಗ್ಯ ಸಂಬಂಧಿ ಸಮಸ್ಯೆಗಳಿಂದ ರಕ್ಷಿಸಿ.

ಪ್ರತಿ ವರ್ಷ ಮೇ 5 ಅನ್ನು ವಿಶ್ವ ಕೈ ನೈರ್ಮಲ್ಯ ದಿನವನ್ನಾಗಿ ಆಚರಿಸಲಾಗುತ್ತದೆ. ಕೈಗಳ ನೈರ್ಮಲ್ಯವನ್ನು ಉತ್ತೇಜಿಸುವ ಮೂಲಕ ಸೋಂಕು ಮತ್ತು ಸೂಕ್ಷ್ಮಜೀವಿಗಳ ಹರಡುವಿಕೆ ತಡೆಗಟ್ಟುವುದು ಈ ದಿನದ ಮುಖ್ಯ ಉದ್ದೇಶ. ಸಾಮಾಜಿಕ ಜಾಲತಾಣಗಳಲ್ಲಿ ಬ್ಯಾನರ್, ಪೋಸ್ಟರ್ ಗಳ ಮೂಲಕ ಜಾಗೃತಿ ಮೂಡಿಸಲಾಗುತ್ತದೆ. ಕೈ ತೊಳೆಯದೇ ಇರುವುದು ಹಲವು ಆರೋಗ್ಯ ಸಮಸ್ಯೆ ಉಂಟು ಮಾಡುತ್ತದೆ. ಅವುಗಳ ಬಗ್ಗೆ ತಿಳಿಯೋಣ.

ನಿಯಮಿತವಾಗಿ ಕೈ ತೊಳೆಯುವುದು, ಕೈ ನೈರ್ಮಲ್ಯ ನಿರ್ಲಕ್ಷಿಸುವುದು ಸಾಲ್ಮೊನೆಲೋಸಿಸ್, ಅತಿಸಾರ ಮತ್ತು ಇತರ ಜೀರ್ಣಕಾರಿ ಸಮಸ್ಯೆಗೆ ಕಾರಣವಾಗುತ್ತದೆ. ಕೈಯಲ್ಲಿರುವ ಬ್ಯಾಕ್ಟೀರಿಯಾ ಮತ್ತು ಸೂಕ್ಷ್ಮಾಣುಗಳು ಬಾಯಿಯ ಮೂಲಕ ಹೊಟ್ಟೆ ಪ್ರವೇಶಿಸಿ, ಅಸ್ವಸ್ಥತೆ ಉಂಟು ಮಾಡುತ್ತವೆ. ಹಾಗಾಗಿ ಮಕ್ಕಳಿಗೆ ಕೈ ನೈರ್ಮಲ್ಯದ ಸರಿಯಾದ ಮಾರ್ಗದರ್ಶನ ನೀಡುವುದು ಅವಶ್ಯಕ.

ಆರೋಗ್ಯಕರ ಚರ್ಮ ಮತ್ತು ಕಣ್ಣುಗಳಿಗೆ ಕೈ ತೊಳೆಯುವುದು ಅತ್ಯಗತ್ಯ. ಮಕ್ಕಳಲ್ಲಿ ಕೈ ತೊಳೆಯುವ ಅಭ್ಯಾಸವನ್ನು ಬೆಳೆಸುವುದು ಅವಶ್ಯಕ. ಈ ಅಭ್ಯಾಸವು ಮಕ್ಕಳ ಕೈಯಲ್ಲಿ ಬ್ಯಾಕ್ಟೀರಿಯಾ ಮತ್ತು ಸೂಕ್ಷ್ಮಜೀವಿಗಳನ್ನು ಬೆಳೆಯದಂತೆ ತಡೆಯುತ್ತದೆ. ಚರ್ಮ ಮತ್ತು ಕಣ್ಣುಗಳ ಅಲರ್ಜಿ ಉಂಟು ಮಾಡುವ ಬ್ಯಾಕ್ಟೀರಿಯಾ ತಡೆಯುತ್ತದೆ. ಉಸಿರಾಟದ ತೊಂದರೆ ತಪ್ಪಿಸಲು ಕೈ ತೊಳೆಯುವುದು ಮುಖ್ಯ.

ಅನೇಕ ಸೂಕ್ಷ್ಮಜೀವಿಗಳು ಮತ್ತು ಬ್ಯಾಕ್ಟೀರಿಯಾಗಳು ಮಕ್ಕಳ ಕೈಯಲ್ಲಿ ಇರುತ್ತವೆ. ಇವು ಮೂಗಿನ ಮೂಲಕ ಉಸಿರಾಟದ ಅಂಗಗಳನ್ನು ಪ್ರವೇಶಿಸಿ, ತೊಂದರೆ ಉಂಟು ಮಾಡಬಹುದು. ಕೈ ತೊಳೆಯುವ ಅಭ್ಯಾಸವು ಸೂಕ್ಷ್ಮಜೀವಿಗಳನ್ನು ಉಸಿರಾಟದ ಪ್ರದೇಶಕ್ಕೆ ಪ್ರವೇಶಿಸುವುದನ್ನು ತಡೆಯುತ್ತದೆ. ಮಕ್ಕಳ ಆರೋಗ್ಯ ಮತ್ತು ಯೋಗಕ್ಷೇಮ ಸುಧಾರಿಸುತ್ತದೆ.

ಮಕ್ಕಳನ್ನು ಕೈ ತೊಳೆಯಲು ಹೀಗೆ ಪ್ರೋತ್ಸಾಹಿಸಿ. ಚಿಕ್ಕ ವಯಸ್ಸಿನಲ್ಲಿ ಮಕ್ಕಳಿಗೆ ಕೈ ತೊಳೆಯುವ ಮತ್ತು ಧನಾತ್ಮಕ ವಿಷಯಗಳ ಬಗ್ಗೆ ತಿಳಿಸಿ. ಊಟ ಮಾಡುವ ಮೊದಲು ಕೈ ತೊಳೆಯುವ ಬಗ್ಗೆ ಹೇಳಿ ಕೊಡಿ. ದೊಡ್ಡವರು ಊಟಕ್ಕೆ ಮೊದಲು ಕೈ ತೊಳೆಯುವುದನ್ನು ತೋರಿಸಿ, ವಿವರಿಸಿ. ಕೈ ತೊಳೆಯುವಾಗ ಮಕ್ಕಳಿಗೆ ಹಾಡು, ಎಣಿಕೆ ಮೂಲಕ ಮಜವಾಗಿ ಕೈ ತೊಳೆಯುವುದನ್ನು ರೂಢಿಸಿ.