Monsoon: ಮಳೆಗಾಲದಲ್ಲಿ ಸೋಮಾರಿತನ ಕಾಡುತ್ತಿದ್ಯಾ? ರಕ್ತದಲ್ಲಿ ಕಬ್ಬಿಣದ ಅಭಾವವೇ ಇದಕ್ಕೆ ಕಾರಣ ಅಂತಾರೆ ವೈದ್ಯರು

ಹೊರಗೆ ಮೋಡ ಕವಿಯುತ್ತಿದ್ದಂತೆ ಒಳಗೆ ತಣ್ಣಗೆ ಇಣುಕುವ ಸೋಮಾರಿತನ. ಆದ್ರೆ ಕೆಲವೊಮ್ಮೆ ದೇಹದಲ್ಲಿ ಕಬ್ಬಿಣದ ಕೊರತೆ ಉಂಟಾಗೋದ್ರಿಂದಲೂ ಹೀಗಾಗುತ್ತದಂತೆ. ಕಬ್ಬಿಣ ಅನೇಮಿಯಾವನ್ನು ಗುಣಪಡಿಸುತ್ತದೆ, ರೋಗನಿರೋಧಕ ಶಕ್ತಿ ಹೆಚ್ಚಿಸುತ್ತದೆ. ದೇಹಕ್ಕೆ ಶಕ್ತಿ ನೀಡುತ್ತದೆ, ದೇಹದ ತಾಪಮಾನವನ್ನು ನಿಯಂತ್ರಣದಲ್ಲಿ ಇಡುತ್ತದೆ. ಹಾಗಾಗಿ ಮಳೆ ಬರುವ ಸಂದರ್ಭದಲ್ಲಿ ದೇಹಕ್ಕೆ ಸೂಕ್ತ ಪ್ರಮಾಣದಲ್ಲಿ ಕಬ್ಬಿಣದ ಅವಶ್ಯಕತೆ ಇರುತ್ತದೆ.

ಹಸಿರು ತರಕಾರಿಗಳು, ಸೊಪ್ಪು ಇವುಗಳಲ್ಲೆಲ್ಲಾ ಕಬ್ಬಿಣ ಹೇರಳವಾಗಿ ಇರುತ್ತದೆ. ಕೇವಲ ಕಬ್ಬಿಣದ ಅಂಶ ಮಾತ್ರವಲ್ಲದೇ ಫೈಬರ್ ಕೂಡಾ ಉತ್ತಮ ಪ್ರಮಾಣದಲ್ಲಿ ದೇಹಕ್ಕೆ ದೊರೆಯುವಂತೆ ನೋಡಿಕೊಳ್ಳಬೇಕು. ಹಾಗಾಗಿ ತರಕಾರಿ ಮತ್ತು ಹಣ್ಣುಗಳನ್ನು ತಪ್ಪದೇ ಸೇವಿಸಬೇಕು.

ಡ್ರೈ ಫ್ರೂಟ್ಸ್ ಕಬ್ಬಿಣವನ್ನು ಹೇರಳವಾಗಿ ಹೊಂದಿರುತ್ತವೆ. ದಿನಕ್ಕೆ ಕನಿಷ್ಟ 5-6 ಒಣ ಹಣ್ಣುಗಳನ್ನು ತಿನ್ನುವ ಅಭ್ಯಾಸ ರೂಢಿಸಿಕೊಳ್ಳಿ. ಬಾದಾಮಿಯನ್ನು ನೆನೆಸಿ ತಿನ್ನುವುದು ಒಳ್ಳೆಯದು. ಅದೇ ರೀತಿ ಒಣದ್ರಾಕ್ಷಿ, ಗೋಡಂಬಿ, ಪಿಸ್ತಾ ಇವೆಲ್ಲವೂ ಆರೋಗ್ಯಕ್ಕೆ ಪ್ರಯೋಜನಕಾರಿ.

ಕಾಳುಗಳನ್ನು ಯಥೇಚ್ಛವಾಗಿ ಬಳಸಿ. ಹಸಿಯಾಗಿ, ನೆನೆಸಿ, ಬೇಯಿಸಿ ಅಥವಾ ಮೊಳಕೆ ಬರಿಸಿ ಹೇಗಾದರೂ ಸರಿ...ಕಾಳುಗಳನ್ನು ಸೇವಿಸುವುದರಿಂದ ಪೋಷಕಾಂಶಗಳ ದೊಡ್ಡ ಖನಿಜವೇ ನಿಮಗೆ ಸಿಕ್ಕಂತಾಗುತ್ತದೆ ಎನ್ನುತ್ತಾರೆ ತಜ್ಞರು.

ನೀವು ಮಾಂಸಾಹಾರಿಯಾಗಿದ್ದರೆ ಮೀನು, ಏಡಿ, ಸೀಗಡಿ ರೀತಿಯ ಜಲಚರಗಳನ್ನು ಸೇವಿಸಿ. ಇವು ಒಮೆಗಾ 3 ಯನ್ನು ಹೇರಳವಾಗಿ ಹೊಂದಿರುತ್ತವೆ. ಹಾಗಾಗಿ ಆರೋಗ್ಯಕ್ಕೆ ಬಹಳ ಪೂರಕವಾಗಿರುತ್ತದೆ. ಉಳಿದ ಮಾಂಸಾಹಾರಗಳಿಗಿಂತ ಇವು ಅತ್ಯುತ್ತಮ ಎನ್ನಲಾಗಿದೆ.

ಡಾರ್ಕ್ ಚಾಕೊಲೇಟ್​ನಲ್ಲಿ ಶೇಕಡಾ 55ರಷ್ಟು ಕೊಕೊ ಇರುತ್ತದೆ. ಇದು ಕಬ್ಬಿಣದ ಅತ್ಯುತ್ತಮ ಮೂಲ ಕೂಡಾ ಹೌದು. ಚಾಕೊಲೇಟ್ ನ್ನು ನೆಮ್ಮದಿಯಾಗಿ ತಿಂದು ಅದರಿಂದ ಆರೋಗ್ಯವನ್ನೂ ಪಡೆಯಬಹುದು ಎಂದರೆ ಅದಕ್ಕಿಂತ ಖುಷಿಯ ವಿಚಾರ ಇನ್ಯಾವುದಿದೆ?