Home Remedies: ಪ್ರತಿದಿನ ಈ ಟೀಗಳನ್ನು ಕುಡಿದರೆ ಶೀತ-ಕೆಮ್ಮಿಗೆ ಗುಡ್​ ಬೈ ಹೇಳ್ಬೋದು

ಕೆಮ್ಮಿನ ಸಮಸ್ಯೆ ನಮ್ಮನ್ನ ಹೈರಾಣು ಮಾಡಿಬಿಡುತ್ತದೆ. ಇದಕ್ಕೆ ನೀವು ಚಹಾದ ಮೂಲಕ ಪರಿಹಾರ ಪಡೆಯಬಹುದು. ಚಹಾವು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ಸಹಾಯ ಮಾಡುತ್ತದೆ. ಹಾಗಾಗಿ, ಶೀತ ಹಾಗೂ ಕೆಮ್ಮಿದ್ದರೆ ನಾವು ಹೇಳುವ ಟೀಗಳನ್ನು ಕುಡಿದು ನೋಡಿ.

ಶುಂಠಿ ಟೀ
ಶುಂಠಿಯ ಆರೋಗ್ಯ ಪ್ರಯೋಜನಗಳ ಬಗ್ಗೆ ನಾವು ಯಾರಿಗೂ ಹೆಚ್ಚಾಗಿ ಹೇಳಬೇಕಿಲ್ಲ. ರೋಗನಿರೋಧಕ ಶಕ್ತಿ ಹೆಚ್ಚಿಸುವುದರಿಂದ ಹಿಡಿದು, ಜೀರ್ಣಕ್ರಿಯೆ ಸುಧಾರಿಸುವವರೆಗೆ ಈ ಶುಂಠಿ ಸಹಾಯ ಮಾಡುತ್ತದೆ. ನೀವು ನಿಮ್ಮ ಹಾಲಿನ ಟೀಗೆ ಶುಂಠಿಯನ್ನು ಸೇರಿಸಬಹುದು ಅಥವಾ ಕೇವಲ ಶುಂಠಿ ಹಾಗೂ ಜೇನುತುಪ್ಪ ಹಾಕಿ ಟೀ ನೀರಿನ ಟೀ ಮಾಡಿಕೊಳ್ಳಬಹುದು.

ಸೋಂಪು ಟೀ
ಸೋಂಪು ಕಾಳಿನಲ್ಲಿ ಹಲವಾರು ಆರೋಗ್ಯಕಾರಿ ಅಂಶಗಳಿದೆ. ಇದರಲ್ಲಿರುವ ಅಂಶಗಳು ಮಲಬದ್ಧತೆ ಸೇರಿದಂತೆ ವಿವಿಧ ಸಮಸ್ಯೆಗಳಿಗೆ ಪರಿಹಾರ ನೀಡುತ್ತದೆ. ಒಂದು ಲೋಟ ನೀರಿಗೆ , 1 ಚಮಚ ಸೋಂಪುಕಾಳು ಸೇರಿಸಿ ಚೆನ್ನಾಗಿ ಕುದಿಸಿ. ಅದಕ್ಕೆ 2 ಹನಿ ನಿಂಬೆರಸ ಸೇರಿಸಿ, ಕುಡಿಯಿರಿ.

ಬೆಳ್ಳುಳ್ಳಿ ಟೀ
ಚಳಿಗಾಲದಲ್ಲಿ ಶೀತ ಹಾಗೂ ಕೆಮ್ಮಿಗೆ ಮನೆಮದ್ದು ಯಾವುದು ಎಂದು ಕೇಳಿದರೆ ಬೆಳ್ಳುಳ್ಳಿ ಹೆಸರು ಲಿಸ್ಟ್ನಲ್ಲಿ ಇರುತ್ತದೆ. ಇದು ತಲೆನೋವು ಸೇರಿದಂತೆ ಚಳಿಗಾಲದ ಸಮಸ್ಯೆಗಳನ್ನು ಹೋಗಲಾಡಿಸಲು ಸಹಾಯ ಮಾಡುತ್ತದೆ. ಒಂದು ಲೋಟ ನೀರನ್ನು ಚೆನ್ನಾಗಿ ಕುದಿಸಿ, ನಂತರ ಅದಕ್ಕೆ 2 ಬೆಳ್ಳುಳ್ಳಿ ಎಸಳು ಹಾಕಿ, 15 ನಿಮಿಷ ಬಿಡಿ. ನಂತರ ಸೋಸಿ ಕುಡಿಯಿರಿ.

ಕ್ಯಾಮೊಮೈಲ್ ಟೀ
ಕ್ಯಾಮೊಮೈಲ್ ಟೀ ಬಗ್ಗೆ ಹಲವಾರು ಜನರಿಗೆ ಗೊತ್ತಿಲ್ಲ. ನಿಮಗೆ ಈ ಹೂವು ಮಾರುಕಟ್ಟೆಯಲ್ಲಿ ಸಿಗದಿದ್ದರೂ ಸಹ, ಅದರ ಟೀ ಬ್ಯಾಗ್ಗಳು ಸಿಗುತ್ತದೆ. ನೀವು ಕ್ಯಾಮೊಮೈಲ್ ಟೀ ಜೊತೆ ಸ್ವಲ್ಪ ನಿಂಬೆ ರಸ ಹಾಗೂ ಜೇನುತುಪ್ಪ ಸೇರಿಸಿ ಕುಡಿಯುವುದು ಕೆಮ್ಮು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ.

ತುಳಸಿ ಟೀ
ತುಳಸಿ ಟೀಯನ್ನು ಪ್ರತಿದಿನ ಸೇವನೆ ಮಾಡುವುದರಿಂದ ಶೀತ-ಕೆಮ್ಮು ಕಡಿಮೆ ಆಗುವುದು ಮಾತ್ರವಲ್ಲದೇ ರೋಗನಿರೋಧಕ ಶಕ್ತಿ ಹೆಚ್ಚಿಸಲು ಸಹ ಸಹಾಯ ಮಾಡುತ್ತದೆ. ತುಳಸಿಯನ್ನು ನೀರಿನಲ್ಲಿ ಕುದಿಸಿ, ಅದಕ್ಕೆ ಸ್ವಲ್ಪ ಸೋಂಪುಕಾಳು ಹಾಕಿ. ಇದನ್ನು ಚೆನ್ನಾಗಿ ಸೋಸಿ ಕುಡಿಯಿರಿ.

ಏಲಕ್ಕಿ, ಚಕ್ಕೆ ಟೀ
ಏಲಕ್ಕಿ, ಚಕ್ಕೆ ಸೇರಿದಂತೆ ವಿವಿಧ ಮಸಾಲೆಗಳು ಸಹ ನಮಗೆ ಈ ಸಮಯದಲ್ಲಿ ಪ್ರಯೋಜನ ನೀಡುತ್ತದೆ. ಏಲಕ್ಕಿ, ಚಕ್ಕೆ ಹಾಗೂ ಲವಂಗವನ್ನು ಚೆನ್ನಾಗಿ ಪುಡಿ ಮಾಡಿಕೊಳ್ಳಿ. ಇಲ್ಲದಿದ್ದರೆ ಹಾಗೆಯೇ ನೀವು ಕುದಿಯುವ ನೀರಿಗೆ ಹಾಕಿ. ಚೆನ್ನಾಗಿ ಅದನ್ನು ಕುದಿಸಿ. ನಂತರ ಅದನ್ನು ಸೋಸಿಕೊಂಡು ಕುಡಿಯಿರಿ. ನಿಮಗೆ ಬೇಕು ಎಂದರೆ ಜೇನುತುಪ್ಪ ಮತ್ತು ನಿಂಬೆ ರಸ ಹಾಕಿ.

ಗ್ರೀನ್ ಟೀ
ಗ್ರೀನ್ ಟೀ ಆ್ಯಂಟಿ ಆಕ್ಸಿಡೆಂಟ್ ಮತ್ತು ಪಾಲಿಫಿನಾಲ್‌ಗಳಿಂದ ಸಮೃದ್ಧವಾಗಿದ್ದು, ಬ್ಯಾಕ್ಟೀರಿಯಾ ವಿರುದ್ಧ ಹೋರಾಡಲು ಸಹಾಯ ಮಾಡುತ್ತದೆ. ಚಳಿಗಾಲದಲ್ಲಿ ಇದನ್ನು ಸೇವಿಸುವುದು ತೂಕ ಇಳಿಕೆ ಹಾಗೂ ಕೆಮ್ಮು ಕಡಿಮೆ ಮಾಡಲು ಸಹಕಾರಿ.