Relationship Tips: ನಿಮಗಿನ್ನೂ ಮದ್ವೆ ಆಗಿಲ್ವಾ? ಹಾಗಾದ್ರೆ ಈ ಗಂಭೀರವಾದ ಕಾಯಿಲೆಗೆ ಒಳಗಾಗಬಹುದು ಹುಷಾರ್!

ಮದುವೆಯೆಂಬ ವ್ಯವಸ್ಥೆಯ ಬಗ್ಗೆ ನಂಬಿಕೆ ಇಲ್ಲ ಎಂದು ಹೇಳುತ್ತಿರುವವರ ಧ್ವನಿ ಒಂದೆಡೆ ಪ್ರಬಲವಾಗುತ್ತಿರುವಂತೆಯೇ ವಿವಾಹ ಬಂಧನ ತುಂಬ ಶ್ರೇಷ್ಠವಾದುದು ಎನ್ನುವವರೂ ಬಹಳಷ್ಟು ಜನರಿದ್ದಾರೆ.

ಮನುಷ್ಯಜೀವನವನ್ನು ಧರ್ಮಾರ್ಥ-ಕಾಮ-ಮೋಕ್ಷಗಳೆಂಬ ಪುರುಷಾರ್ಥಗಳಲ್ಲಿ ಅರ್ಥೈಸಲಾಗುತ್ತದೆ. ಎಲ್ಲ ಚಿಕ್ಕ, ದೊಡ್ಡ ಬಯಕೆಗಳು ಕಾಮವಾದರೆ ಅವೆನ್ನೆಲ್ಲ ಪೂರೈಸುವ ಸಂಪನ್ಮೂಲಗಳು ಅರ್ಥ. ಈ ಅರ್ಥ, ಕಾಮಗಳು ಮಿತಿಮೀರದಂತೆ ಬಾಧಕವಾಗದಂತೆ ನಿಯಂತ್ರಿಸುವುದೇ ಧರ್ಮ. ಅರ್ಥ, ಕಾಮಗಳ ಹಂಗು ಕಳಚಿ, ವಿರಕ್ತಿ ಮೂಡಿದಾಗ ಮೋಕ್ಷ.

ಗಂಡು-ಹೆಣ್ಣು ಈ ಸಂಬಂಧದಲ್ಲಿ ಬದ್ಧರಾಗುವಾಗ, ಆಜೀವನವೂ ಪರಸ್ಪರ ಮೈತ್ರಿ-ನಿಷ್ಠೆ -ಪ್ರಾಮಾಣಿಕತೆಗಳನ್ನು ಪಾಲಿಸುತ್ತೇವೆಂದು ಪ್ರತಿಜ್ಞೆಯನ್ನು ಮಾಡುತ್ತಾರೆ. ಇದು ಗುರುಹಿರಿಯರ, ಬಂಧುಮಿತ್ರರ, ಕುಲದೇವರ ಮತ್ತು ಅಗ್ನಿಯ ಸಾಕ್ಷಿಯಾಗಿ ನಡೆಯುತ್ತದೆ.

ಆದರೆ ಮದುವೆ ಎಂಬ ಸಾಮಾಜಿಕ ಬಂಧ ಬಗ್ಗೆ ಅನೇಕ ಮಹಿಳೆಯರು ಮತ್ತು ಪುರುಷರಿಗೆ ಕೆಲವು ಅನುಮಾನಗಳಿದೆ. ಹೀಗಾಗಿ ಇಷ್ಟಪಟ್ಟು ಸಿಂಗಲ್ ಆಗಿರುವವರು ಒಂದಷ್ಟು ಮಂದಿ ಆದರೆ, ಸೂಕ್ತ ಹುಡುಗ ಅಥವಾ ಹುಡುಗಿ ಸಿಗದೇ ಒಬ್ಬಂಟಿಯಾಗಿರುವವರು ಮತ್ತಷ್ಟು ಮಂದಿ.

ಒಂಟಿಯಾಗಿರುವ ಪುರುಷರು ಜಗಳದಿಂದ ಮುಕ್ತರಾಗಿರುತ್ತಾರೆ ಎಂದು ಅನೇಕ ಮಂದಿ ಭಾವಿಸುತ್ತಾರೆ. ಸಮಾಜ ಮತ್ತು ಕುಟುಂಬದ ಕಲಹ ಸಮಸ್ಯೆಗಳಿಂದ ಮತ್ತು ಜವಾಬ್ದಾರಿಗಳಿಂದ ತುಂಬಾ ಆರಾಮವಾಗಿರುತ್ತಾರೆ. ಆದರೆ ಈ ರೀತಿ ಶಾಂತಿಯಿಂದ ಇರುವುದರಿಂದಲೇ ಮುಂದೊಂದು ದಿನ ದೊಡ್ಡ ಅಪಾಯಕ್ಕೆ ಸಿಲುಕುತ್ತಾರೆ.

ಯುರೋಪಿಯನ್ ಸೊಸೈಟಿ ಆಫ್ ಕಾರ್ಡಿಯಾಲಜಿ ಮತ್ತು ಜರ್ಮನಿಯ ಯೂನಿವರ್ಸಿಟಿ ಹಾಸ್ಪಿಟಲ್ ವುರ್ಜ್ಬರ್ಗ್ನ ಸಮಗ್ರ ಹೃದಯ ವೈಫಲ್ಯದ ಕೇಂದ್ರದ ಇತ್ತೀಚಿನ ಅಧ್ಯಯನದಲ್ಲಿ ಅವಿವಾಹಿತ ಪುರುಷರು ಹೃದ್ರೋಗದಿಂದ ಬಳಲುತ್ತಿರುವ ಸಾಧ್ಯತೆಯಿದೆ ಎಂದು ತಿಳಿಸಿದ್ದಾರೆ.

ವಿವಾಹಿತ ಪುರುಷರಿಗಿಂತ ಅವಿವಾಹಿತ ಪುರುಷರು ಚಿಕ್ಕ ವಯಸ್ಸಿನಲ್ಲಿಯೇ ಸಾಯುವ ಸಾಧ್ಯತೆ ಹೆಚ್ಚು ಎಂದು ಅಧ್ಯಯನಗಳು ಬಹಿರಂಗಪಡಿಸಿದೆ. ಅವಿವಾಹಿತ ಪುರುಷರು ಸಾಮಾಜಿಕ ಸಂವಹನದ ಕೊರತೆಯಿಂದಾಗಿ ಈ ರೀತಿಯ ಕಾಯಿಲೆಗೆ ಹೆಚ್ಚಾಗಿ ಒಳಗಾಗುತ್ತಾರೆ.

ವಿವಾಹಿತ ಪುರುಷರು ಗಂಭೀರ ಅನಾರೋಗ್ಯವನ್ನು ಎದುರಿಸಲು ಹೆಚ್ಚು ಆತ್ಮವಿಶ್ವಾಸವನ್ನು ಹೊಂದಿರುತ್ತಾರೆ ಎಂದು ಸಂಶೋಧನೆ ತಿಳಿಸಿದೆ. ಸಂಶೋಧನಾ ತಂಡದಲ್ಲಿರುವ ವೈದ್ಯರ ಗುಂಪಿನ ಪ್ರಕಾರ, ದೀರ್ಘಾವಧಿಯ ಸಮಸ್ಯೆಗಳನ್ನು ನಿರ್ವಹಿಸುವ ಜನರ ಸಾಮರ್ಥ್ಯವನ್ನು ಸಾರ್ವಜನಿಕ ಸಂಬಂಧಗಳು ಹೆಚ್ಚು ಹೆಚ್ಚಿಸುತ್ತದೆ.