Dog Foods In Summer: ಮನುಷ್ಯರಿಗೆ ಮಾತ್ರ ಅಲ್ಲ, ನಾಯಿಗಳಿಗೂ ಬೇಸಿಗೆ ಪರಿಣಾಮ ಬೀರಬಹುದು! ಈ ರೀತಿಯ ಆಹಾರ ಕೊಟ್ರೆ ಉತ್ತಮ

ಕಾಲ ಬದಲಾದಂತೆ ವಾತಾವರಣ ಬದಲಾಗೋದು ಸಾಮಾನ್ಯ. ಅದ್ರಲ್ಲೂ ಚಳಿಗಾಲದಿಂದ ಬೇಸಿಗೆ ಕಾಲಕ್ಕೆ ಬದಲಾದಾಗ ಮಾನವರ ದೇಹದ ಮೇಲೆ ಬಹಳಷ್ಟು ಪರಿಣಾಮ ಬೀರುತ್ತದೆ. ಆದರೆ ಈಗ ಇದರ ಪರಿಣಾಮ ಪ್ರಾಣಿಗಳ ಮೇಲೂ ಬೀರಬಹುದು. ಆದರೆ ಬೇಸಿಗೆಯಲ್ಲಿ ನಿಮ್ಮ ಮನೆಯ ನಾಯಿಮರಿಗಳಿಗೆ ಯಾವ ರೀತಿಯ ಆಹಾರ ಕೊಟ್ರೆ ಈ ಲೇಖನದಲ್ಲಿದೆ ಓದಿ.

ಬೇಸಿಗೆ ಕಾಲ ಆರಂಭವಾಗಿದೆ. ಬಿಸಿಲಿನ ಬೇಗೆಗೆ ಮನುಷ್ಯ ಸೇರಿದಂತೆ ಪ್ರಾಣಿ-ಪಕ್ಷಿಗಳು ದಂಗಾಗಿ ಹೋಗಿವೆ. ಅದರಲ್ಲೂ ನಾಯಿಮರಿಗಳು ಬೇಸಿಗೆಯಲ್ಲಿ ಹಲವು ರೀತಿಯ ಸಮಸ್ಯೆಗಳನ್ನು ಎದುರಿಸುತ್ತವೆ. ತಾಪಮಾನದ ಏರಿಕೆಯಿಂದ ಹಸಿವು ಕೂಡ ಕಡಿಮೆಯಾಗಬಹುದು. ಹಾಗಾಗಿ ಈ ಕಾಲದಲ್ಲಿ ನಾಯಿಮರಿಗಳಿಗೆ ಸೂಕ್ತ ಡಯೆಟ್‌ ಕ್ರಮ ಅನುಸರಿಸುವ ಜೊತೆಗೆ, ದೇಹವನ್ನು ತಂಪಾಗಿರುವಂತೆ ನೋಡಿಕೊಳ್ಳುವುದು ಸಹ ಮುಖ್ಯ.

ನೀರು ಕುಡಿಸುತ್ತಿರಬೇಕು: ತಾಪಮಾನ ಏರಿಕೆಯಾದ ತಕ್ಷಣ ನಿಮ್ಮ ಮನೆಯ ಮುದ್ದು ನಾಯಿಮರಿಗೆ ಬಾಯಾರಿಕೆ ಜಾಸ್ತಿಯಾಗುತ್ತಿದೆ. ಈ ಸಂದರ್ಭದಲ್ಲಿ ಹೆಚ್ಚಿನ ಮಟ್ಟದ ನೀರನ್ನು ಕುಡಿಸಬೇಕು. ಸ್ವಚ್ಛ ಹಾಗೂ ತಾಜಾ ನೀರು ಅದರ ಗೂಡಿನಲ್ಲಿ ಬಾಯಿಗೆ ಸಿಗುವಂತೆ ಇರಿಸಬೇಕು. ಇದರಿಂದ ಅವುಗಳಿಗೆ ದೇಹಕ್ಕೆ ಆಯಾಸವಾಗುವುದಿಲ್ಲ. ಅಲ್ಲದೆ ದೇಹದ ತಾಪಮಾನವನ್ನು ನಿಯಂತ್ರಿಸಲು ಹಾಗೂ ಶಕ್ತಿ ಮಟ್ಟವನ್ನು ಹೆಚ್ಚಿಸಿಕೊಳ್ಳಲು ಸಹ ಸಾಧ್ಯವಾಗುತ್ತದೆ.

ನೀರಿನಂಶ ಹೆಚ್ಚಿರುವ ಆಹಾರಗಳನ್ನು ನೀಡಿ: ತಾಪಮಾನ ಹೆಚ್ಚಾದಾಗ ನಾಯಿಗಳಿಗೆ ಹಸಿವು ಆಗುವುದು ಕಡಿಮೆ. ಹಾಗಾಗಿ ತಾಜಾ ಆಹಾರವನ್ನು ಕಡಿಮೆ ಪ್ರಮಾಣದಲ್ಲಿ ನೀಡಿ. ಆದರೆ ಪೋಷಕಾಂಶಯುಕ್ತ ಆಹಾರಗಳನ್ನು ಆಗಾಗ ನೀಡಬೇಕು. ಇದರಿಂದ ಅವುಗಳ ಆರೋಗ್ಯ ಸ್ಥಿರವಾಗಿರುತ್ತದೆ. ಕಡಿಮೆ ಕ್ಯಾಲೊರಿ ಇರುವ, ನೀರಿನಂಶ ಹೆಚ್ಚಿರುವ ಆಹಾರ ಪದಾರ್ಥಗಳನ್ನು ನೀಡುವುದರಿಂದ ನಾಯಿಮರಿಗಳು ಆರೋಗ್ಯವಾಗಿರುವಂತೆ ಮಾಡ್ಬಹುದು..

ತರಕಾರಿ ಹಾಗೂ ಹಣ್ಣುಗಳು: ಪೋಷಕಾಂಶಭರಿತ ಆಹಾರ ಪದಾರ್ಥಗಳನ್ನು ತಿನ್ನಿಸುವುದು ಬೇಸಿಗೆಯಲ್ಲಿ ಬಹಳ ಮುಖ್ಯವಾಗಿರುತ್ತದೆ. ಅಂತಹ ಆಹಾರಗಳನ್ನು ನಿಮ್ಮ ಮನೆಯ ನಾಯಿಗಳಿಗೆ ಹೆಚ್ಚಾಗಿ ನೀಡಬೇಕು. ತಾಜಾ ಹಣ್ಣು ಹಾಗೂ ತರಕಾರಿಗಳನ್ನು ಹಾಕಿ.

ಈ ರೀತಿಯ ಆಹಾರಗಳಲ್ಲಿ ಆಂಟಿ ಆಕ್ಸಿಡೆಂಟ್‌, ಮಿನರಲ್ಸ್‌ ಹಾಗೂ ವಿಟಮಿನ್‌ ಅಧಿಕವಾಗಿದ್ದು, ನಾಯಿ ಮರಿಯ ಆರೋಗ್ಯ ಸುಧಾರಣೆಗೆ ಪರಿಹಾರವನ್ನು ಬಹಳ ಬೇಗನೆ ನೀಡುತ್ತದೆ. ಕಲ್ಲಂಗಡಿ, ಬೆರಿಗಳು, ಸೌತೆಕಾಯಿಯಂತಹ ಹಣ್ಣು, ತರಕಾರಿಯನ್ನು ನೀಡಿದರೆ ಉತ್ತಮ.

ನಾಯಿಗಳನ್ನು ಕಟ್ಟುವ ಜಾಗ: ನಾಯಿಮರಿಗಳಿಗೆ ಆಹಾರ ನೀಡುವ ಮೊದಲು ಆಹಾರ ಇರಿಸುವ ಜಾಗವನ್ನು ನೋಡಿಕೊಳ್ಳಬೇಕು. ಜೊತೆಗೆ ನಾಯಿಗಳನ್ನು ಯಾವತ್ತೂ ಬೇಸಿಗೆಯ ಸಮಯದಲ್ಲಿ ಬಿಸಿಲಿನಲ್ಲಿ ಕಟ್ಟಬಾರದು. ಈ ಸಮಯದಲ್ಲಿ ಬೇರೆ ಎಲ್ಲಾದರು ನಾಯಿಯನ್ನು ಕಟ್ಟುವಾಗ, ಆ ಜಾಗದ ಸ್ವಚ್ಛತೆಯ ಬಗ್ಗೆ ಗಮನ ನೀಡಬೇಕು. ಬಿಸಿಲು ನೇರವಾಗಿ ಬೀಳುವ ಕಡೆ ಆಹಾರ ನೀಡಬಾರದು. ಸಾಧ್ಯವಾದಷ್ಟು ತಂಪಿರುವ ಜಾಗದಲ್ಲಿ ಆಹಾರ ನೀಡಿ.

ಪೌಷ್ಠಿಕ ಆಹಾರಗಳನ್ನು ನೀಡಿ: ಟರ್ಕಿ ಕೋಳಿ, ಮೊಲದ ಮಾಂಸಗಳು, ಬಾತುಕೋಳಿ ಮೊಟ್ಟೆ, ಮೀನು, ಮೊಟ್ಟೆ, ಮೊಸರು ಇವುಗಳನ್ನು ಬೇಸಿಗೆಯಲ್ಲಿ ನಾಯಿಗಳಿಗೆ ನೀಡುವುದರಿಂದ ಆರೋಗ್ಯವಾಗಿರುತ್ತದೆ. ಈ ರೀತಿಯ ಆಹಾರಗಳು ಪ್ರಾಣಿಗಳ ದೇಹವನ್ನು ತಂಪು ಮಾಡುತ್ತವೆ. ಮಾಂಸದೊಂದಿಗೆ ಡೈರಿ ಉತ್ಪನ್ನಗಳು, ಬ್ರೊಕೋಲಿ, ಕೋಸುಗೆಡ್ಡೆ, ಸೆಲರಿ, ಸೌತೆಕಾಯಿ, ಸೊಪ್ಪು, ಹಸಿರುಬಟಾಣಿ, ಕಲ್ಲಂಗಡಿ, ಸ್ಟ್ರಾಬೆರಿ, ಕರ್ಜೂರ ಇಂತಹ ಹಣ್ಣು, ತರಕಾರಿಗಳು ದೇಹವನ್ನು ತಂಪು ಮಾಡುವ ಜೊತೆಗೆ ದೇಹಕ್ಕೆ ಅಗತ್ಯ ಪೋಷಕಾಂಶಗಳನ್ನು ಸಹ ಒದಗಿಸುತ್ತವೆ.