Non Veg Starters: ಸ್ಪೈಸಿ ಆ್ಯಂಡ್ ಟೇಸ್ಟಿ ಮಟನ್ ಲಿವರ್ ಫ್ರೈ ರೆಸಿಪಿ ನಿಮಗಾಗಿ

ಮಾಂಸವನ್ನು ಸೇವಿಸುವುದರಿಂದ ಹೆಚ್ಚಿನ ಪ್ರೋಟೀನ್ ಸಿಗುತ್ತದೆ. ಮೂಳೆಗಳು ಗಟ್ಟಿಯಾಗಿರುತ್ತವೆ ಎನ್ನಲಾಗುತ್ತದೆ. ಮಾಂಸಾಹಾರಿ ಆಹಾರದಲ್ಲಿ ಪ್ರೋಟೀನ್ ಮತ್ತು ಕ್ಯಾಲ್ಸಿಯಂ ಸಾಕಷ್ಟಿದೆ.

ನಾನ್​ವೆಜ್ ಪ್ರಿಯರಿಗೆ ಮಟನ್ ಅಂದ್ರೆ ತುಂಬಾ ಇಷ್ಟ. ಮಟನ್​ನಲ್ಲಿ ತರಹೇವಾರಿ ಭಕ್ಷ್ಯಗಳಿದೆ. ಧಮ್ ಮಟನ್ ಪಲಾವ್, ಮಟನ್ ಸಾಂಬಾರ್, ಮಟನ್ ಫ್ರೈ, ಮಟನ್ ಚಿಲ್ಲಿ, ಮಟನ್ ಚಾಪ್ಸ್, ಬೋಟಿ, ತಲೆಮಾಂಸ, ಮಟನ್ ಕೈಮಾ ಹೀಗೆ ನಾನಾ ಖಾದ್ಯಗಳನ್ನು ಎಲ್ಲರೂ ಸವಿದಿರುತ್ತೀರಿ. ಆದರೆ ನಾವಿಂದು ನಿಮಗೆ ಮನೆಯಲ್ಲಿಯೇ ಮಟನ್ ಲಿವರ್ ಫ್ರೈ ಅನ್ನು ಸುಲಭವಾಗಿ ಮಾಡುವುದು ಹೇಗೆ ಎಂದು ಹೇಳಿಕೊಡುತ್ತೇವೆ.

ಮಟನ್ ಲಿವರ್ ಫ್ರೈ ಮಾಡಲು ಬೇಕಾಗುವ ಸಾಮಾಗ್ರಿಗಳು: ಮಟನ್ ಲಿವರ್ – 1/4 ಕೆಜಿ, ಈರುಳ್ಳಿ – 1, ಎಣ್ಣೆ – ಕೊತ್ತಂಬರಿ, ಬ್ಲಾಕ್ ಪೆಪ್ಪರ್ ರ್ಪಡರ್– 1/2 ಚಮಚ, ಅರಿಶಿನ ಪುಡಿ – ಚಿಟಿಕೆ, ಖಾರದ ಪುಡಿ – 1 ಚಮಚ, ನಿಂಬೆ ಹಣ್ಣು– 1, ಶುಂಠಿ – ಬೆಳ್ಳುಳ್ಳಿ ಪೇಸ್ಟ್, ಉಪ್ಪು – ರುಚಿಗೆ ತಕ್ಕಷ್ಟು.

ಮಟನ್ ಲಿವರ್ ಫ್ರೈ ಮಾಡುವ ವಿಧಾನ: ಮೊದಲಿಗೆ ಬಾಣಲಿಯನ್ನು ಒಲೆಯ ಮೇಲೆ ಇಟ್ಟು, ಅದಕ್ಕೆ ಎಣ್ಣೆ ಹಾಕಿ. ಅದು ಬಿಸಿಯಾದ ಬಳಿಕ ಉದ್ದುದ್ದಕ್ಕೆ ಕತ್ತರಿಸಿದ ಈರುಳ್ಳಿ ಹಾಕಿ ಗೋಲ್ಡನ್ ಬ್ರೌನ್ ಬರುವವರೆಗೂ ಉರಿಯಿರಿ.

ನಂತರ ಅದಕ್ಕೆ ಶುಂಠಿ, ಬೆಳ್ಳುಳ್ಳಿ ಪೇಸ್ಟ್ ಹಾಕಿ, ಹಸಿ ವಾಸನೆ ಹೋಗುವ ತನಕ ಕೈಯಾಡಿಸಿ. ನಂತರ ತೊಳೆದ ಮಟನ್ ಲಿವರ್ ಹಾಕಿ. ಬಣ್ಣ ಬದಲಾಗುವವರೆಗೆ ಫ್ರೈ ಮಾಡಿ.

ಲಿವರ್ ಬಣ್ಣ ಬದಲಾಗುತ್ತಿದ್ದಂತೆಯೇ ಅದಕ್ಕೆ ಅರಿಶಿನ ಪುಡಿ, ರುಚಿಗೆ ತಕ್ಕಷ್ಟು ಉಪ್ಪು, ಖಾರದ ಪುಡಿ, ಬ್ಲಾಕ್ ಪೆಪ್ಪರ್ ಪೌಡರ್ ಹಾಕಿ ಮಿಕ್ಸ್ ಮಾಡಿ. ಬಾಣಲೆ ಮೇಲೆ ಪ್ಲೇಟ್ ಮುಚ್ಚಿ 3-4 ನಿಮಿಷ ಕಾಲ ಬೇಯಲು ಬಿಡಿ.

ಮಸಾಲೆಯೊಂದಿಗೆ ಲಿವರ್ ಬೆಂದ ನಂತರ ಅದಕ್ಕೆ ಕೊತ್ತಂಬರಿ ಸೊಪ್ಪು, ನಿಂಬೆ ಹಣ್ಣಿನ ರಸ ಸೇರಿಸಿದರೆ ಬಿಸಿ, ಬಿಸಿಯಾದ ಮಟನ್ ಲಿವರ್ ಫ್ರೈ ಸವಿಯಲು ಸಿದ್ಧ. (Disclaimer: ಈ ಲೇಖನವು ಅಂತರ್ಜಾಲದಲ್ಲಿ ಲಭ್ಯವಿರುವ ವರದಿಗಳು, ಮಾಹಿತಿಯನ್ನು ಆಧರಿಸಿದೆ. news18ಗೂ ಇದಕ್ಕೂ ಸಂಬಂಧವಿಲ್ಲ ಮತ್ತು ನ್ಯೂಸ್ 18 ಇದಕ್ಕೆ ಜವಾಬ್ದಾರಿಯಲ್ಲ)