Heart Attack: ಹೃದಯಾಘಾತ ಹೆಚ್ಚಾಗಿ ಆಗಿರುವುದು ಈ ದಿನವೇ ಅಂತೆ: ಕಾರಣ ಇಲ್ಲಿದೆ..!

ಒಬ್ಬ ಮನುಷ್ಯನಿಗೆ ಹೃದಯಾಘಾತ ಯಾವಾಗ ಬರುತ್ತದೆ ಎಂದು ಯಾರೂ ಊಹಿಸಲಾರರು. ಹೃದಯಾಘಾತವಾದಾಗ ಸರಿಯಾದ ಸಮಯಕ್ಕೆ ಸರಿಯಾಗಿ ಚಿಕಿತ್ಸೆ ಸಿಗದೇ ಹೋದಲ್ಲಿ ಆ ವ್ಯಕ್ತಿ ಬದುಕುಳಿಯುವುದು ತುಂಬಾ ಕಷ್ಟ. 

ಹೃದಯಾಘಾತ ಆಗುವ ಮುನ್ನ ಸಾಕಷ್ಟು ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ ಎಂದು ವೈದ್ಯರು ಹೇಳುತ್ತಲೇ ಇರುತ್ತಾರೆ. ಆದರೂ ಸಹ ತುಂಬಾ ಸಲ ಹೃದಯಾಘಾತ ಆಗಲಿದೆ ಎಂದೂ ಸಾಕಷ್ಟು ಮಂದಿಗೆ ಗೊತ್ತಾಗುವುದೇ ಇಲ್ಲ. ಈ ಕುರಿತಾಗಿ ಈಗ ತಜ್ಞರು ಒಂದು ವಿಷಯವನ್ನು ಕಂಡು ಹಿಡಿದಿದ್ದಾರೆ.

ವಾರದಲ್ಲಿ ಸೋಮವಾರವೇ ಹೆಚ್ಚಾಗಿ ಹೃದಯಾಘಾತವಾಗುತ್ತದೆ ಎಂದು  ಸ್ವೀಡನ್​ ವಿಜ್ಞಾನಿಗಳು ಹೇಳಿದ್ದಾರೆ. ಸ್ವೀಡನ್ ತಜ್ಞರು ಒಂದು ಲಕ್ಷ 56 ಸಾವಿರ ಮಂದಿಯನ್ನು ಸಮೀಕ್ಷೆಗೆ ಒಳಪಡಿಸಿದ್ದು, ಸಂಶೋಧನೆ ಮಾಡಿದ್ದಾರಂತೆ. ಇದನ್ನು ಅಮೆರಿಕದ ಹಾರ್ಟ್​ ಜರ್ನಲ್​ನಲ್ಲಿ ಪ್ರಕಟಿಸಲಾಗಿದೆಯಂತೆ.

ಅವರ ಈ ಸಂಶೋಧನೆಗೆ ಕಾರಣವನ್ನೂ ಕೊಟ್ಟಿದ್ದಾರೆ. ವಾರದ ಆರಂಭದಲ್ಲಿ ತುಂಬಾ ಒತ್ತಡ ಇರುತ್ತದೆಯಂತೆ. ಈ ಕಾರಣದಿಂದಲೇ ಆ ದಿನವೇ ತುಂಬಾ ಜನರಲ್ಲಿ ಇದು ಕಾಣಿಸಿಕೊಂಡಿದೆ ಅನ್ನೋದನ್ನು ಕಂಡು ಹಿಡಿದಿದ್ದಾರೆ.  

ಸೋಮವಾರ ಹೃದಯಾಘಾತ ಆಗುವುದಕ್ಕೆ ಕಾರಣ ಒತ್ತಡ ಆಗಿದ್ದು, ರಜಾ ದಿನಗಳಲ್ಲಿ ಹೃದಯಾಘಾತ ಆಗುವ ಸಾಧ್ಯತೆ ತುಂಬಾ ಕಡಿಮೆ ಇದೆ ಎಂದೂ ಈ ಅಧ್ಯಯನದಿಂದ ತಿಳಿದು ಬಂದಿದೆಯಂತೆ.  

ಒತ್ತಡದ ಜೊತೆಗೆ ಹೃದಯಾಘಾತಕ್ಕೆ ಮತ್ತಷ್ಟು ಕಾರಣಗಳು ಇವೆಯಂತೆ. ದೇಹದಲ್ಲಿ ಕೊಲೆಸ್ಟ್ರಾಲ್​ ಹೆಚ್ಚಾಗಿ ಶೇಖರಣೆ  ಆಗುವುದು, ರಕ್ತದ ಒತ್ತಡ ಹೆಚ್ಚಾಗುವುದು ಹಾಗೂ ಸಕ್ಕರೆ ಕಾಯಿಲೆ ಇರುವುದರಿಂದಲೂ ಹೃದಯಾಘಾತಕ್ಕೆ ಪ್ರಮುಖ ಕಾರಣವಾಗುತ್ತದೆ  ಎಂದು ತಜ್ಞರು ತಿಳಿಸಿದ್ದಾರೆ.