ಹೀಗೆ ಮಾಡಿದ್ರೆ ನಿಮ್ಮ ಸಂಗಾತಿ ಹೆಚ್ಚು ರೊಮ್ಯಾಂಟಿಕ್ ಆಗಿರುತ್ತಾರಂತೆ..!

ಬಂದು ಬಿಡು ನೀನೊಮ್ಮೆ ಪ್ರವಾಹದಂತೆ..ನನ್ನ ಅಷ್ಟೂ ವಿರಹಗಳು ತೊಯ್ದು ಹೋಗಲಿ... ಒಂದೇ ಸಮನೆ..ಒಂದೇ ಸಮನೆ. ಯಾರೋ ಭಗ್ನ ಪ್ರೇಮಿಯೊಬ್ಬರು ಬರೆದ ಈ ಸಾಲು ಸಾಕು ಮುರಿದು ಬಿದ್ದ ಪ್ರೀತಿಯ ಆಳದ ನೋವನ್ನು ತಿಳಿಯಲು. ಹೌದು, ಸಾಮಾನ್ಯವಾಗಿ ಪ್ರೀತಿಗೆ ಕಣ್ಣಿಲ್ಲ ಎಂದೇಳ್ತೀವಿ. ಆದರೆ ಪ್ರೀತಿ ಎಂಬುದು ಕುರುಡಲ್ಲ ಎಂಬುದು ಕೂಡ ಅಷ್ಟೇ ಸತ್ಯ.

ಏಕೆಂದರೆ ನಾವು ಮಾಡುವ ಸಣ್ಣ ಪುಟ್ಟ ತಪ್ಪುಗಳೇ ಸಂಗಾತಿಯಿಂದ ದೂರ ಮಾಡಿಬಿಡುತ್ತದೆ. ಅದು ತುಂಬಾ ಅತೀ ಸಣ್ಣ ತಪ್ಪು ಕೂಡ ಆಗಿರಬಹುದು. ಹೀಗಾಗಿಯೇ ಪ್ರೇಮಲೋಕದಲ್ಲಿ ತೇಲಾಡಿದರೂ ಸಂಗಾತಿಯ ಮನಗೆಲ್ಲುವಲ್ಲಿ ಮಾತ್ರ ಅನೇಕರು ಸೋತು ಬಿಡುತ್ತಾರೆ.

ಯುವ ತಲೆಮಾರಿನ ಖಿನ್ನತೆಗೆ ಒಂದು ಕಾರಣ ಸಿಗದ ಪ್ರೀತಿ ಎಂಬುದನ್ನು ಸಮೀಕ್ಷೆಯಿಂದ ಬಹಿರಂಗವಾಗಿದೆ. ಇಂತಹ ಖಿನ್ನತೆಯನ್ನು ಹೋಗಲಾಡಿಸಲೆಂದೇ ಅಧ್ಯಯನ ತಂಡವೊಂದು ಹೊಸ ಸಮೀಕ್ಷೆಯನ್ನು ನಡೆಸಿದೆ.

ವಾಸ್ತವವಾಗಿ, ಹೆಚ್ಚಿನ ಹುಡುಗರಿಗೆ ಗೆಳತಿಯರನ್ನು ಹೇಗೆ ಸಂತೋಷಪಡಿಸುವುದು ಎಂಬುದು ತಿಳಿದಿಲ್ಲ.

ಅದೇನೇ ಹೇಳಿದರೂ ಅರ್ಥವಾಗುತ್ತಿಲ್ಲ. ಅವಳನ್ನು ಮೆಚ್ಚಿಸಲು ಸಾಧ್ಯವಾಗುತ್ತಿಲ್ಲ ಎಂದು ಅನೇಕ ತರುಣರು ಕೊರಗುತ್ತಿರುತ್ತಾರೆ. ಇಂತಹ ನೋವಿಗೆ ಸಮೀಕ್ಷೆಯಿಂದಾದರೂ ಉತ್ತರ ಸಿಗಲಿ ಎಂಬುದು ಅಧ್ಯಯನ ತಂಡದ ಆಶಯ.

ಫಿಲಡೆಲ್ಫಿಯಾದ ಡ್ರೆಕ್ಸೆಲ್ ವಿಶ್ವವಿದ್ಯಾಲಯ ಮತ್ತು ಪೆನ್ಸಿಲ್ವೇನಿಯಾ ವಿಶ್ವವಿದ್ಯಾಲಯದ ಜಂಟಿಯಾಗಿ ರೊಮ್ಯಾಂಟಿಕ್ ನಡೆಯ ಬಗ್ಗೆ ಒಂದು ಅಧ್ಯಯನ ನಡೆಸಿದೆ.

ಈ  ಅಧ್ಯಯನದಲ್ಲಿ ಸರಿಯಾಗಿ ಆಹಾರ ಸೇವಿಸುವ ಮಹಿಳೆಯರು ಹಸಿವಿನಿಂದ ಕೂಡಿರುವ ಮಹಿಳೆ/ಹುಡುಗಿಯರಿಗಿಂತ ಹೆಚ್ಚು ರೊಮ್ಯಾಂಟಿಕ್ ಆಗಿರುತ್ತಾರೆ ಎಂಬುದು ಕಂಡು ಬಂದಿದೆ.

ಸಾಮಾನ್ಯ ತೂಕದ ವಿದ್ಯಾರ್ಥಿನಿಗಳನ್ನು ಒಟ್ಟುಗೂಡಿಸಿದ ಅಧ್ಯಯನ ತಂಡ 8 ಗಂಟೆಗಳ ಏನೂ ತಿನ್ನದಂತೆ ಟಾಸ್ಕ್ ತಿಳಿಸಲಾಗಿತ್ತು. ಈ ವೇಳೆ ಹುಡುಗಿಯರಿಗೆ ಹಲವು ರೀತಿಯ ಚಿತ್ರಗಳನ್ನು ತೋರಿಸಿ ಅವರ ಹಾವಭಾವ ಫೋಟೋಗಳನ್ನು ಸೆರೆ ಹಿಡಿಯಲಾಗಿತ್ತು.

ಅಷ್ಟೇ ಅಲ್ಲದೆ ಇವರ ಎಂಆರ್​ಐ ಸ್ಯ್ಕ್ಯಾನ್ ಮಾಡಿ ಪರಿಶೀಲಿಸಲಾಯಿತು. ತಮಾಷೆಯ ಸಂಗತಿಯೆಂದರೆ, 8 ಗಂಟೆಗಳ ಕಾಲ ಏನನ್ನೂ ತಿನ್ನದಿದ್ದ ಇವರು ರೋಮ್ಯಾಂಟಿಕ್ ಚಿತ್ರಕ್ಕೂ ( ದಂಪತಿಗಳು ಕೈ ಹಿಡಿದಿರುವ ಚಿತ್ರಗಳು, ಕ್ಯಾಂಡಲ್ ಲೈಟ್ ಡಿನ್ನರ್ ಇತ್ಯಾದಿ) ಹೇಗೆ ಪ್ರತಿಕ್ರಿಯಿಸಿದ್ದರೋ ಅದೇ ರೀತಿಯಾಗಿ ನಿರ್ಜೀವ ಚಿತ್ರಗಳಿಗೆ (ಸ್ಟೇಪಲ್ಸ್, ಮರಗಳು, ಬೌಲಿಂಗ್ ಬಾಲ್) ಪ್ರತಿಕ್ರಿಯೆ ನೀಡಿದ್ದರು.

ಆದರೆ ಆಹಾರ ಸೇವಿಸಿದ ಬಳಿಕ ಇವರ ಪ್ರತಿಕ್ರಿಯೆಯಲ್ಲಿ ಬದಲಾವಣೆ ಕಂಡು ಬಂದಿದ್ದವು. ಹಸಿವು ನೀಗುತ್ತಿದ್ದಂತೆ ಹೆಚ್ಚು ರೊಮ್ಯಾಂಟಿಕ್ ಆಗಿದ್ದರು. ದಂಪತಿಗಳು ಕೈ ಹಿಡಿದಿರುವ ಚಿತ್ರಗಳು, ಕ್ಯಾಂಡಲ್ ಲೈಟ್ ಡಿನ್ನರ್ ಇತ್ಯಾದಿಗಳ ಫೋಟೋವನ್ನು ನೋಡಿದಾಗ ಹಾವಭಾವ ಬದಲಾಗಿತ್ತು.

ಈ ಪ್ರಕ್ರಿಯೆ ಮೇಲೆ ನಡೆಸಿದ ವಿಶ್ಲೇಷನೆಯಲ್ಲಿ ಸಂಶೋಧಕರು ಮಹಿಳೆಯರು/ಹುಡುಗಿಯರು ಆಹಾರ ಸೇವಿಸಿದಾಗ ಹೆಚ್ಚು ಖುಷಿಯಾಗಿರುತ್ತಾರೆ. ಹಸಿದ ಹುಡುಗಿಯರ ಮೊದಲ ಗಮನ ಆಹಾರ ಎಂದು ಫಿಲಡೆಲ್ಫಿಯಾದ ಡ್ರೆಕ್ಸೆಲ್ ವಿಶ್ವವಿದ್ಯಾಲಯ ಮತ್ತು ಪೆನ್ಸಿಲ್ವೇನಿಯಾ ವಿಶ್ವವಿದ್ಯಾಲಯದ ಅಧ್ಯಯನ ತಂಡ ಅಭಿಪ್ರಾಯಪಟ್ಟಿದೆ.

ಹೀಗಾಗಿ ನಿಮ್ಮ ಸಂಗಾತಿಯನ್ನು ಮೆಚ್ಚಿಸಲು ಅವರ ಇಷ್ಟದ ಆಹಾರದತ್ತ ಹೆಚ್ಚು ಗಮನ ಹರಿಸುವುದು ಉತ್ತಮ ಎಂದು ತಿಳಿಸಿದೆ. ಏಕೆಂದರೆ ನಿಮ್ಮ ಪಾರ್ಟನರ್ ಬಯಸುವ ಆಹಾರ ಸಿಕ್ಕರೆ ಮತ್ತಷ್ಟು ರೊಮ್ಯಾಂಟಿಕ್ ಆಗಿರುತ್ತಾರೆ ಎಂಬುದು ಅಧ್ಯಯನ ತಂಡದ ಅಭಿಪ್ರಾಯ.