High Blood Pressure: ತಲೆನೋವು ಬಂದಾಗೆಲ್ಲಾ ನಿಮ್ಗೆ ಈ ರೀತಿ ಆಗ್ತಿದ್ರೆ ರಕ್ತದೊತ್ತಡ ಹೆಚ್ಚಾಗಿದೆ ಎಂದೇ ಅರ್ಥ, ಎಚ್ಚರ!

ಅಧಿಕ ರಕ್ತದೊತ್ತಡ ಅಥವಾ High Blood Pressure ಇತ್ತೀಚಿನ ದಿನಗಳಲ್ಲಿ ಸರ್ವೇಸಾಮಾನ್ಯ ಸಮಸ್ಯೆ ಎನ್ನುವಂತಾಗಿದೆ. ಭಾರತದಲ್ಲಿ ಉಂಟಾಗುವ ಶೇಕಡಾ 63ರಷ್ಟು ಸಾವುಗಳಿಗೆ ಸಾಂಕ್ರಾಮಿಕವಲ್ಲದ ಕಾರಣಗಳೇ ಕಾರಣ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಕೂಡಾ ಹೇಳಿದೆ. ಅಧಿಕ ರಕ್ತದೊತ್ತಡ ಇದರಲ್ಲೊಂದು. ಅನೇಕ ಹೃದಯ ಸಂಬಂಧಿ ಸಮಸ್ಯೆಗಳಿಗೆ ಹೈ ಬಿಪಿ ಮೂಲ ಕಾರಣ ಎನ್ನಲಾಗಿದೆ.

ಸಾಮಾನ್ಯವಾಗಿ ಬಿಪಿ ಅಥವಾ ರಕ್ತದೊತ್ತಡ 120/80 ಗಿಂತ ಕಡಿಮೆ ಇದ್ದರೆ ಅದನ್ನು ನಾರ್ಮಲ್ ಎಂದು ಭಾವಿಸಲಾಗುತ್ತದೆ. ಇದಕ್ಕಿಂತ ಹೆಚ್ಚಿದ್ದರೆ ಆಗ ಅದನ್ನು ಹೈ ಬಿಪಿ ಅಥವಾ ಅಧಿಕ ರಕ್ತದೊತ್ತಡ ಎನ್ನಲಾಗುತ್ತದೆ. ಇದೊಂಥರಾ ಸೈಲೆಂಟ್ ಕಿಲ್ಲರ್. ಯಾವುದೇ ಮುನ್ಸೂಚನೆ ಕೊಡದೆ ನೇರವಾಗಿ ಹೃದಯಕ್ಕೇ ಲಗ್ಗೆ ಇಟ್ಟುಬಿಡುತ್ತದೆ.

ನಿಮಗೇ ಅರಿಯದಂತೆ ನಿಮ್ಮ ದೇಹದೊಳಗೆ ಹೈ ಬಿಪಿ ಸಾಕಷ್ಟು ಹಾನಿ ಮಾಡಿಬಿಟ್ಟಿರುತ್ತದೆ. ಒಂದೇ ಒಂದು ಸಣ್ಣ ಲಕ್ಷಣವೂ ಇಲ್ಲದಂತೆ ಒಳಗೊಳಗೆ ಭಾರೀ ಹಾನಿ ಉಂಟು ಮಾಡುವ ಅಪಾಯಕಾರಿ ಸಮಸ್ಯೆ ಇದು.

ಅಧಿಕ ರಕ್ತದೊತ್ತಡಕ್ಕೆ ನಿರ್ದಿಷ್ಟವಾಗಿ ಇಂಥದ್ದೇ ರೋಗಲಕ್ಷಣ ಅಂತ ಇಲ್ಲ. ಏನಿದ್ದರೂ ನೀವೇ ಆಗಾಗ ಪರೀಕ್ಷಿಸಿಕೊಂಡರೆ ತಿಳಿಯುತ್ತದೆ ಅಷ್ಟೇ. ಒಂದು ವೇಳೆ ಹೈ ಬಿಪಿ ಇದೆ ಎಂದರೆ ನಿಮಗೆ ಹೃದಯ ಸಂಬಂಧಿ ಸಮಸ್ಯೆ ಖಂಡಿತಾ ಬರುತ್ತದೆ ಎಂದು ನೀವು ತಿಳಿಯಬೇಕು, ಅದು ಬಾರದಂತೆ ಮೊದಲೇ ಮುನ್ನೆಚ್ಚರಿಕೆ ವಹಿಸಿ ತಡೆಯಬೇಕು.

ಅತಿ ಸೂಕ್ಷ್ಮವಾಗಿ ಗಮನಿಸದ ಹೊರತು ಹೈ ಬಿಪಿ ಅಪಾಯಗಳು ತಿಳಿಯುವ ಸಾಧ್ಯತೆ ಬಹಳ ಕಡಿಮೆ. ಕೆಲವೊಮ್ಮೆ 180/120ರಷ್ಟರ ಮಟ್ಟಿಗೆ ಬಿಪಿ ಹೆಚ್ಚುತ್ತದೆ. ಇಷ್ಟೊಂದು ಏರಿಕೆಯಾದಾಗ ವಿಪರೀತ ತಲೆನೋವಿನ ಜೊತೆಗೆ ಮೂಗಿನಲ್ಲಿ ರಕ್ತ ಬರುತ್ತದೆ. ತಲೆನೋವು ಮತ್ತು ಮೂಗಿನಲ್ಲಿ ರಕ್ತ ಬಂದರೆ ನೀವು ಕೂಡಲೇ ಆಸ್ಪತ್ರೆಗೆ ದೌಡಾಯಿಸಬೇಕು ಎಂದೇ ಅರ್ಥ.

ಒಂದು ವೇಳೆ ವ್ಯಕ್ತಿಯ ರಕ್ತದೊತ್ತಡದಲ್ಲಿ ಏನಾದರೂ ಏರುಪೇರಿದ್ದರೆ ಅದು ಕೂಡಲೇ ಅವರ ನಡಿಗೆಯಲ್ಲೇ ತಿಳಿಯುತ್ತದೆ. ಮೆಟ್ಟಿಲು ಹತ್ತುವಾಗ ಅವರು ಬಹಳ ಪ್ರಯಾಸಪಡುತ್ತಾರೆ. ನಡೆಯುವಾಗ, ಭಾರದ ವಸ್ತುಗಳನ್ನು ಎತ್ತುವಾಗಲೂ ಬಹಳ ಕಷ್ಟಪಡುತ್ತಾರೆ. ಆತಂಕ, ತಲೆನೋವು, ಕಣ್ಣುಕತ್ತಲೆ ಬಂದಂತೆ ಆಗುವುದು ಇವರಿಗೆ ಸಹಜ ಲಕ್ಷಣಗಳು.

ಉತ್ತಮ ದೈಹಿಕ ಆರೋಗ್ಯ ಇರುವವರಿಗೆ ಅಧಿಕ ರಕ್ತದೊತ್ತಡವನ್ನು ಹತೋಟಿಯಲ್ಲಿ ಇಟ್ಟುಕೊಳ್ಳುವುದು ಸುಲಭ. ಹೆಚ್ಚು ತೂಕ ಇಲ್ಲದಂತೆ ನೋಡಿಕೊಳ್ಳುವುದು, ಸರಿಯಾದ ಸಮಯಕ್ಕೆ ಉತ್ತಮ ಆಹಾರ ಸೇವನೆ ಮಾಡುವುದು, ದೈಹಿಕ ವ್ಯಾಯಾಮ, ನೆಮ್ಮದಿಯ ಬದುಕು ಇವೆಲ್ಲವುದರ ಜೊತೆಗೆ ಹೆಚ್ಚು ಸಕ್ಕರೆ, ಉಪ್ಪು ಇರದ ಆಹಾರ ಸೇವನೆ ಕೂಡಾ ರಕ್ತದೊತ್ತಡವನ್ನು ಹತೋಟಿಯಲ್ಲಿ ಇಟ್ಟುಕೊಳ್ಳಲು ಸಹಕಾರಿ.