ಆನ್​ಲೈನ್ ಶಾಪಿಂಗ್ ಮಾಡುವ ಮುನ್ನ ಈ ವಿಷಯ ಗಮನದಲ್ಲಿರಲಿ

ಡಿಜಿಟಲ್ ಯುಗದಲ್ಲಿ ಎಲ್ಲವೂ ಒಂದು ಕ್ಲಿಕ್ ಮೇಲೆ ನಡೆಯುತ್ತಿದೆ. ಅದು ಶಾಪಿಂಗ್ ವಿಷಯದಲ್ಲೂ ಕೂಡ. ಹೀಗಾಗಿಯೇ ಇಂದು ಆನ್‌ಲೈನ್ ಶಾಪಿಂಗ್ ಬಗ್ಗೆ ಜನರಲ್ಲಿ ದೊಡ್ಡ ಕ್ರೇಜ್ ಇದೆ. ಇದಕ್ಕೆ ಒಂದು ಕಾರಣ ಸಮಯದ ಉಳಿತಾಯ. ಎರಡನೆಯದಾಗಿ ಹಲವಾರು ವಿಭಿನ್ನ ವೆಬ್‌ಸೈಟ್‌ಗಳಿಗೆ ಭೇಟಿ ನೀಡುವ ಮೂಲಕ, ಅನೇಕ ಬ್ರ್ಯಾಂಡ್‌ಗಳು ಮತ್ತು ಆಕರ್ಷಕ ಕೊಡುಗೆಗಳ ಲಾಭಗಳನ್ನು ಪಡೆಯಬಹುದು.

ಆದರೆ ಆನ್‌ಲೈನ್‌ನಲ್ಲಿ ಶಾಪಿಂಗ್ ಮಾಡುವಾಗ ಕೆಲವು ವಿಷಯಗಳನ್ನು ಮನಸ್ಸಿನಲ್ಲಿಟ್ಟುಕೊಳ್ಳುವುದು ಬಹಳ ಮುಖ್ಯ. ಇಲ್ಲದಿದ್ದರೆ ಅದುವೇ ಒಂದು ಸಮಸ್ಯೆಗೆ ಕಾರಣವಾಗುತ್ತದೆ.

ಶಾಪಿಂಗ್ ಸೈಟ್​ನಲ್ಲಿ ಸರಕುಗಳನ್ನು ಖರೀದಿಸುವಾಗ, ಸೈಟ್ ವಿಶ್ವಾಸಾರ್ಹವಾಗಿದೆ ಎಂಬುದನ್ನು ಮೊದಲು ಖಚಿತಪಡಿಸಿಕೊಳ್ಳಿ. ಇಲ್ಲದಿದ್ದರೆ ನೀವು ಇನ್ನೊಂದು ಸೈಟ್‌ ಆಯ್ಕೆ ಮಾಡಿಕೊಳ್ಳಿ. ನೀವು ತೆಗೆದುಕೊಳ್ಳುತ್ತಿರುವ ಯಾವುದೇ ಉತ್ಪನ್ನದ ಸಂಪೂರ್ಣ ವಿವರವನ್ನು ಓದಿ. ಉತ್ಪನ್ನದ ಬಗ್ಗೆ ಎಷ್ಟು ಜನರು ಸಕಾರಾತ್ಮಕ ವಿಮರ್ಶೆಗಳನ್ನು ನೀಡಿದ್ದಾರೆ ಎಂಬುದನ್ನು ಸಹ ನೋಡಿ. ಬಳಕೆದಾರರ ವಿಮರ್ಶೆ ಸಕಾರಾತ್ಮಕವಾಗಿಲ್ಲದಿದ್ದರೆ ಆ ಉತ್ಪನ್ನವನ್ನು ಖರೀದಿಸಬೇಡಿ.

ವಿತರಣೆಯ (ಡೆಲಿವರಿ) ನಂತರ ಉತ್ಪನ್ನವು ಅವಧಿ ಮೀರಿಲ್ಲ ಎಂಬುದನ್ನು ಖಚಿತಪಡಿಸಿಕೊಳ್ಳಿ. ಅದಕ್ಕೂ ಮೊದಲು ಖರೀದಿಸುವಾಗಲೇ ಅದರ ಮುಕ್ತಾಯ ದಿನಾಂಕವನ್ನು ಸಹ ಪರಿಶೀಲಿಸಿ. ಉತ್ಪನ್ನವು ಮುಕ್ತಾಯ ದಿನಾಂಕವನ್ನು ಹೊಂದಿಲ್ಲದಿದ್ದರೆ, ಅಂತಹ ವಸ್ತುಗಳನ್ನು ಖರೀದಿಸದಿರುವುದು ಉತ್ತಮ. ಮುಖ್ಯವಾಗಿ ಆಹಾರ ಪದಾರ್ಥಗಳ ಆಯ್ಕೆ ಸಮಯದಲ್ಲಿ ಇದರ ಬಗ್ಗೆ ಹೆಚ್ಚಿನ ಗಮನಹರಿಸಿ.

ಕೆಲವೊಮ್ಮೆ ಬಂಪರ್ ಆಫರ್ ನೀಡಲಾಗಿರುತ್ತದೆ. ಇದನ್ನು ನೋಡಿದ ಕೂಡಲೇ ವಸ್ತುಗಳನ್ನು ಆರ್ಡರ್ ಮಾಡಬೇಡಿ. ಅನೇಕ ಬಾರಿ ಸೈಟ್​ನಲ್ಲಿ ಕಾಣಿಸಿಕೊಂಡ ವಸ್ತುಗಳು ಕೈ ಸೇರಿದಾಗ ತುಂಬಾ ಕಳಪೆ ಗುಣಮಟ್ಟದ್ದಾಗಿದೆ ಎಂದು ತಿಳಿಯುತ್ತದೆ. ಹೀಗಾಗಿ ಇಂತಹ ಆಫರ್ ಕಾಣಿಸಿಕೊಂಡಾಗ ಇತರೆ ವೆಬ್​ಸೈಟ್​ನಲ್ಲೂ ಅದರ ಬೆಲೆ ಮತ್ತು ಇತರೆ ಮಾಹಿತಿಗಳನ್ನು ಪರಿಶೀಲಿಸಿ, ಖಚಿತಪಡಿಸಿಕೊಳ್ಳಿ.

ಉತ್ಪನ್ನವನ್ನು ಅರ್ಡರ್​ ಮಾಡುವಾಗ, ಅದರ ಎಲ್ಲಾ ನಿಯಮಗಳು ಮತ್ತು ಷರತ್ತುಗಳನ್ನು ಎಚ್ಚರಿಕೆಯಿಂದ ಪರಿಶೀಲಿಸಿ. ಸರಕುಗಳನ್ನು ನೇರ ಕಂಪನಿಯಿಂದ ವಿತರಿಸಲಾಗುತ್ತಿದೆಯೇ ಅಥವಾ ಮೂರನೇ ವ್ಯಕ್ತಿಯ ಮೂಲಕ ನಿಮ್ಮನ್ನು ತಲುಪುತ್ತಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಿ. ಏಕೆಂದರೆ ಕಳಪೆ ಸರಕುಗಳನ್ನು ಕಳುಹಿಸಿದ್ರೆ ಅದನ್ನು ಹಿಂದಿರುಗಿಸಲು ಇದರಿಂದ ಸುಲಭವಾಗಲಿದೆ. ಹಾಗೆಯೇ ಸಾಧ್ಯವಾದಷ್ಟು ಕಂಪೆನಿ ನೇರವಾಗಿ ವಿತರಿಸುವ ವಸ್ತುಗಳ ಖರೀದಿಗೆ ಹೆಚ್ಚಿನ ಆದ್ಯತೆ ನೀಡುವುದು ಉತ್ತಮ.