Scribbling: ಏನಿದು ಸ್ಕ್ರಿಬ್ಲಿಂಗ್? ಮಗು, ವ್ಯಕ್ತಿಯ ಜೀವನದಲ್ಲಿ ಹೇಗೆ ಪ್ರಯೋಜನಕಾರಿ?

ಚಿತ್ರಗಳು ಮತ್ತು ಸಾಲುಗಳು ಮಗುವಿನ ಬೆಳವಣಿಗೆಗೆ ಸಾಕಷ್ಟು ಕೊಡುಗೆ ನೀಡಿವೆ. ಮಗು ಪೆನ್ನು, ಪೆನ್ಸಿಲ್ ಮತ್ತು ಬಳಪವನ್ನು ಕೈಯಲ್ಲಿ ತೆಗೆದುಕೊಂಡು ಕಾಗದ, ಗೋಡೆಯ ಮೇಲೆ ಉಜ್ಜುತ್ತದೆ. ಹೀಗೆ ಮಗು ಚಿತ್ರೀಕರಿಸುವ ಅಂಶವನ್ನೇ ಸ್ಕ್ರಿಬ್ಲಿಂಗ್ ಎಂದು ಕರೆಯುತ್ತಾರೆ. ಇದು ಮಗುವಿನ ಒಟ್ಟಾರೆ ಬೆಳವಣಿಗೆಯಲ್ಲಿ ಬಹಳ ಮುಖ್ಯ ಪಾತ್ರವನ್ನು ವಹಿಸುತ್ತದೆ.

ಸ್ಕ್ರಿಬ್ಲಿಂಗ್ ಮಕ್ಕಳ ಮಾನಸಿಕ ಆರೋಗ್ಯಕ್ಕೆ ಪ್ರಯೋಜನಕಾರಿಯಾಗಿದೆ. ಸ್ಕ್ರಿಬ್ಲಿಂಗ್ ಬಗ್ಗೆ ಪೋಷಕರಿಗೆ ಅರಿವು ಮೂಡಿಸಲು ಅಂತರರಾಷ್ಟ್ರೀಯ ಸ್ಕ್ರಿಬ್ಲಿಂಗ್ ದಿನವನ್ನು ಸಹ ಆಚರಿಸಲಾಗುತ್ತದೆ. ಮಕ್ಕಳಿಗೆ ದಯೆ, ಕಲೆ ಹಾಗೂ ಉತ್ತಮ ವ್ಯಕ್ತಿತ್ವವನ್ನು ಅಭಿವೃದ್ಧಿಪಡಿಸಲು ಸ್ಕ್ರಿಬಲ್ ಅಗತ್ಯವಾಗಿದೆ. ಇದು ಮಕ್ಕಳಲ್ಲಿ ಸೃಜನಶೀಲತೆ ಮತ್ತು ಉತ್ತಮ ಗುಣಗಳನ್ನು ಉತ್ತೇಜಿಸುತ್ತದೆ.

ಸ್ಕ್ರಿಬ್ಲಿಂಗ್ ಯಾಕೆ ಮುಖ್ಯವಾಗುತ್ತದೆ ಎಂಬುದು ನಿಮಗೆ ತಿಳಿದಿರಬೇಕು. ಮನುಷ್ಯನ ಮೆದುಳು ಬಹಳ ಸಂಕೀರ್ಣವಾಗಿದೆ. ಜಾಗೃತ ಮನಸ್ಸು, ಉಪಪ್ರಜ್ಞೆ ಮತ್ತು ಪ್ರಜ್ಞಾಹೀನ ಮನಸ್ಸನ್ನು ರೂಪಿಸುತ್ತದೆ ಅಂತಾರೆ ತಜ್ಞರು. ಸ್ಕ್ರಿಬ್ಲಿಂಗ್ ಅನ್ನು ಡೂಡ್ಲಿಂಗ್ ಎಂದೂ ಕರೆಯುತ್ತಾರೆ.

ಸ್ಕ್ರಿಬ್ಲಿಂಗ್ ಉಪಪ್ರಜ್ಞೆ ಮತ್ತು ಸುಪ್ತ ಮನಸ್ಸಿನ ಪ್ರತಿಫಲಿತ ನಡವಳಿಕೆ. ಸಭೆಯ ಕೊಠಡಿ, ಕಾಯುವ ಕೊಠಡಿ, ತರಗತಿ ಅಥವಾ ಇನ್ನಾವುದೇ ಸ್ಥಳದಲ್ಲಿ ಪೆನ್ನು ಮತ್ತು ಕಾಗದ ಮೇಲೆ ತೋಚಿದ್ದನ್ನು ಗೀಚುವುದು. ಇದು ಯಾವ ರೂಪ, ಆಕಾರ ಬೇಕಾದ್ರೂ ಇರಬಹುದು. ಇದರಲ್ಲಿ ಮನಸ್ಸಿಗೆ ಬಂದದ್ದನ್ನು ಬರೆಯಲಾಗುತ್ತದೆ.

ಸ್ಕ್ರಿಬ್ಲಿಂಗ್ ನಿಮ್ಮ ಮಾನಸಿಕ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು. ಮನಸ್ಸಿಗೆ ಬಂದದ್ದನ್ನು ಗೀಚುವ ಅಭ್ಯಾಸವು ವ್ಯಕ್ತಿಯ ಅನುಭವ, ಮನಸ್ಥಿತಿ, ಆಲೋಚನೆಯ ಬಗ್ಗೆ ತಿಳಿಸುತ್ತದೆ ಅಂತಾರೆ ತಜ್ಞರು. ಸಂತೋಷ, ಆತಂಕ ಅಥವಾ ಆನಂದ ಹೀಗೆ ಎಲ್ಲವನ್ನೂ ವ್ಯಕ್ತಪಡಿಸುತ್ತವೆ. ಈ ಸ್ಕ್ರಿಬ್ಲಿಂಗ್ ಅರ್ಥಹೀನವಾಗಿಯೂ ಕಾಣಿಸಬಹುದು. ಆದರೆ ಮನಶ್ಶಾಸ್ತ್ರಜ್ಞರು ಡೂಡಲ್ ಅಥವಾ ಸ್ಕ್ರಿಬಲ್ ವ್ಯಕ್ತಿಯ ಮನಸ್ಸು ಮತ್ತು ಸ್ಥಿತಿಯನ್ನು ತಿಳಿಸುತ್ತದೆ ಅಂತಾರೆ.

ಯೋಚಿಸದೆ ಅಥವಾ ಅಜಾಗರೂಕತೆಯಿಂದ ನಿಮಗನ್ನಿಸಿದ್ದನ್ನು ಎಂದಾದ್ರೂ ಗೀಚಿದ್ದೀರಾ? ನೀವು ಬರೆದದ್ದು ನಿಮಗೆ ಅರ್ಥವಾಗಬಹುದು ಅಥವಾ ಅರ್ಥವಾಗದಿರಬಹುದು. ಅದು ನಿಖರವಾಗಿ ಸ್ಕ್ರಿಬಲ್ ಆಗಿದೆ ಅಂತಾರೆ ತಜ್ಞರು. ಮಕ್ಕಳು ಬರವಣಿಗೆ ಮತ್ತು ಚಿತ್ರಕಲೆ ಕಲಿಯಲು ಇದು ಮೊದಲ ಹೆಜ್ಜೆ.

ಮಗು ಯಾವುದೇ ಕಾಳಜಿಯಿಲ್ಲದೆ ಸ್ಕ್ರಿಬಲ್ಸ್ ಮತ್ತು ಚಿತ್ರಗಳನ್ನು ಬಿಡಿಸುತ್ತದೆ. ನಾವು ಸ್ಕ್ರಿಬ್ಲಿಂಗ್ ಅನ್ನು ಡೂಡ್ಲಿಂಗ್ ಎನ್ನುತ್ತೇವೆ. ಸ್ಕ್ರಿಬ್ಲಿಂಗ್ ವಯಸ್ಕರಿಗೆ ಅರ್ಥವಾಗದಿರಬಹುದು. ಚಿಕ್ಕ ಮಗುವಿಗೆ ಈ ಗುರುತುಗಳು ಬಹಳ ಮುಖ್ಯ. ಇದು ಅವರ ಆಲೋಚನೆಗಳನ್ನು ವ್ಯಕ್ತಪಡಿಸಲು ಒಂದು ಮಾರ್ಗವಾಗಿದೆ.

ಮಗು ಅಥವಾ ವ್ಯಕ್ತಿಯು ಒಂದೇ ಸ್ಥಳದಲ್ಲಿ ಪದೇ ಪದೇ ಡೂಡಲ್ ಮಾಡುತ್ತಿದ್ದರೆ ಅದು ಕಾಳಜಿಯ ಸಂಕೇತ. ಸಾಮಾನ್ಯವಾಗಿ ಜನರು ಒತ್ತಡದಲ್ಲಿದ್ದರೆ ಡೂಡಲ್‌ಗಳು ಬೇಸರ, ಅತೃಪ್ತಿ, ನಿಗ್ರಹಿಸಿದ ಕೋಪ ಅಥವಾ ಆತ್ಮವಿಶ್ವಾಸದ ಕೊರತೆ ಸಹ ತೋರಿಸುತ್ತವೆ. ಸ್ಕೆಚಿಂಗ್, ಡೂಡ್ಲಿಂಗ್ ಅಥವಾ ಬಣ್ಣ ಮಾಡುವುದು ಒತ್ತಡ ನಿವಾರಿಸುವ ಅಂಶವಾಗಿದೆ.