Ice Cream Recipe For Summer: ಈ ಹಣ್ಣುಗಳಿದ್ರೆ ಸಾಕು ಮನೆಯಲ್ಲೇ ಮಾಡಬಹುದು ಐಸ್​ ಕ್ರೀಮ್​!

ಬೇಸಿಗೆಯಲ್ಲಿ ಕೂಲ್ ಆಗಿರುವ ಪದಾರ್ಥ ಯಾವುದು ಎಂದ ತಕ್ಷಣ ಎಲ್ಲರಿಗೂ ನೆನಪಿಗೆ ಬರುವುದು ಮೊದಲು ಐಸ್ ಕ್ರೀಮ್. ಅಷ್ಟಕ್ಕೂ ಐಸ್ ಕ್ರೀಮ್ ಯಾರಿಗೆ ತಾನೇ ಇಷ್ಟವಾಗುವುದಿಲ್ಲ ಹೇಳಿ, ಪುಟ್ಟ ಮಕ್ಕಳಿಂದ ಹಿಡಿದು ದೊಡ್ಡವರವರೆಗೂ ಎಲ್ಲರೂ ಇಷ್ಟಪಡುತ್ತಾರೆ. ಇನ್ನೂ ಬೇಸಿಗೆಯಲ್ಲಿ ಐಸ್ ಕ್ರೀಮ್ ತಿನ್ನುವುದರಿಂದ ನಿಮಗೆ ಬಿಸಿಲಿನಿಂದ ರಿಲೀಫ್ ಸಿಕ್ಕಂತೆ ಆಗುತ್ತದೆ. ಆದರೆ ಅಂಗಡಿಯಲ್ಲಿ ಸಿಗುವ ಐಸ್ ಕ್ರೀಮ್ನಲ್ಲಿ ಹೆಚ್ಚಿನ ಪ್ರಮಾಣದ ಕೊಬ್ಬು ಮತ್ತು ಸಕ್ಕರೆಯ ಅಂಶ ಹೆಚ್ಚಾಗಿರುತ್ತದೆ. ಇದು ನಿಮ್ಮ ದೇಹದ ತೂಕವನ್ನು ಹೆಚ್ಚಿಸಬಹುದು.

ಅಲ್ಲದೇ ಶುಗರ್, ಬೇಸಿಗೆಯ ಅನೇಕ ಕಾಯಿಲೆಗಳು ಎದುರಾಗುತ್ತದೆ. ಹಾಗಾಗಿ ಕೆಲ ಹಣ್ಣುಗಳು ಮತ್ತು ಜೇನುತುಪ್ಪ, ಖರ್ಜೂರ, ಬೆಲ್ಲದಂತಹ ನೈಸರ್ಗಿಕ ಪದಾರ್ಥಗಳನ್ನು ಬಳಸಿಕೊಂಡು ನೀವು ಮನೆಯಲ್ಲಿಯೇ ಐಸ್ ಕ್ರೀಮ್ ತಯಾರಿಸಬಹುದು. ಅದು ಹೇಗಪ್ಪಾ ಅಂತೀರಾ ಈ ರೆಸಿಪಿ ನಿಮಗಾಗಿ.

ಆಪಲ್ ಐಸ್ ಕ್ರೀಮ್: ಈ ಐಸ್ ಕ್ರೀಮ್ ಮಾಡಲು ಬೇಕಾಗುವ ಸಾಮಾಗ್ರಿಗಳು, ಆಪಲ್ – 2, ಕೆನೆ ಗಟ್ಟಿದ ಹಾಲು - 500 ಮಿಲಿ, ಗಟ್ಟಿ ಹಾಲು - 50 ಮಿಲಿ, ಬಾದಾಮಿ - 20 ಗ್ರಾಂ, ಕತ್ತರಿಸಿದ ಗೋಡಂಬಿ - 20 ಗ್ರಾಂ, ಸಕ್ಕರೆ - 50 ಗ್ರಾಂ, ಪುದೀನ ಎಲೆಗಳು

ಆಪಲ್ ಐಸ್ ಕ್ರೀಮ್ ಮಾಡುವ ವಿಧಾನ: ಮೊದಲು ತಾಜಾ ಸೇಬನ್ನು ತೆಗೆದುಕೊಂಡು ಅದರ ಸಿಪ್ಪೆ ಮತ್ತು ಬೀಜಗಳನ್ನು ತೆಗೆಯಿರಿ. ನಂತರ ಐಸ್ ಕ್ರೀಮ್ ಮಾಡಲು, ಒಲೆ ಮೇಲೆ ಹಾಲನ್ನು ಮಧ್ಯಮ ಉರಿಯಲ್ಲಿ ಕುದಿಸಿ. ಅದು ಮುಕ್ಕಾಲು ಭಾಗವಾದಾಗ ಅದಕ್ಕೆ ಸಕ್ಕರೆ ಸೇರಿಸಿ ಮತ್ತು ಸ್ವಲ್ಪ ಸಮಯ ಮತ್ತೆ ಕುದಿಯಲು ಬಿಡಿ. ಈಗ, ಹಾಲು ಗಟ್ಟಿ ಆಗುತ್ತದೆ.

ನಂತರ ಇದಕ್ಕೆ ಕತ್ತರಿಸಿದ ಬಾದಾಮಿ ಮತ್ತು ಗೋಡಂಬಿ ಸೇರಿಸಿ ಇನ್ನೊಂದರೆಡು ನಿಮಿಷ ಕುದಿಸಿ. ಬಳಿಕ ಸ್ಟವ್ ಆಫ್ ಮಾಡಿ. ಐಸ್ ಕ್ರೀಮ್ ಮಿಶ್ರಣವನ್ನು ಸ್ವಲ್ಪ ತಣ್ಣಗಾಗಲು ಬಿಡಿ. ನಂತರ ಐಸ್ ಕ್ರೀಮ್ ಮಿಶ್ರಣಕ್ಕೆ ಸೇಬು ತುರಿದು ಮಿಕ್ಸ್ ಮಾಡಿ, ಪ್ಲೇಟ್ ಮುಚ್ಚಿ 3-4 ಗಂಟೆಗಳ ಕಾಲ ಅದನ್ನು ಫ್ರಿಜ್ನಲ್ಲಿಡಿ. ಇದೀಗ ಆಪಲ್ ಐಸ್ ಕ್ರೀಮ್ ಅನ್ನು ಹೊರತೆಗೆದು ಅದರ ಮೇಲೆ ಪುದೀನಾದ ಮೂಲಕ ಅಲಂಕರಿಸಿದರೆ, ರುಚಿಕರವಾದ ಆಪಲ್ ಐಸ್ ಕ್ರೀಮ್ ಸವಿಯಲು ಸಿದ್ಧ.

ಬ್ಲೂಬೆರ್ರಿ ಐಸ್ ಕ್ರೀಮ್: ಟೇಸ್ಟಿ ಬ್ಲೂಬೆರ್ರಿ ಐಸ್ ಕ್ರೀಮ್ ಮಾಡಲು ಬೇಕಾಗುವ ಸಾಮಾಗ್ರಿಗಳು, ಬ್ಲೂಬೆರ್ರಿ - 4 ಕಪ್, ನಿಂಬೆ ಸಿಪ್ಪೆ - 1 ಟೀಸ್ಪೂನ್, ನಿಂಬೆ ರಸ – 1, ಮೊಟ್ಟೆಯ ಬಿಳಿಭಾಗ – 2, ಪುಡಿ ಮಾಡಿದ ಐಸ್ ಕ್ಯೂಬ್- 2.

ಬ್ಲೂಬೆರ್ರಿ ಐಸ್ ಕ್ರೀಮ್ ಮಾಡುವ ವಿಧಾನ : ಬೌಲ್‌ನಲ್ಲಿ ಬ್ಲೂಬೆರ್ರಿ, ನಿಂಬೆ ಸಿಪ್ಪೆ, ನಿಂಬೆ ರಸ ಮತ್ತು ಮೊಟ್ಟೆಯ ಬಿಳಿಭಾಗವನ್ನು ಮಿಕ್ಸ್ ಮಾಡಿ. ನಂತರ ಇವೆಲ್ಲವನ್ನು ಚೆನ್ನಾಗಿ ಮ್ಯಾಶ್ ಮಾಡಿ. ಬಳಿಕ ಎಲ್ಲಾ ಪದಾರ್ಥಗಳನ್ನು ಮಿಕ್ಸರ್ಗೆ ಹಾಕಿ ಚೆನ್ನಾಗಿ ರುಬ್ಬಿಕೊಳ್ಳಿ. ನಂತರ ದೊಡ್ಡ ಬಟ್ಟಲಿಗೆ ಈ ಮಿಶ್ರಣವನ್ನು ಸುರಿದು. ಫ್ರಿಜ್‌ನಲ್ಲಿ ಒಂದು ಗಂಟೆಗಳ ಕಾಲ ತಣ್ಣಗಾಗಲು ಇಡಿ. ಇದೀಗ ಕೂಲ್ ಆಗಿರುವ ಬ್ಲೂಬೆರ್ರಿ ಐಸ್ ಕ್ರೀಮ್ ಅನ್ನು ತಿನ್ನಿ.

ಮ್ಯಾಂಗೋ ಹನಿ ಪಿಸ್ತಾ ಐಸ್ ಕ್ರೀಮ್: ಇದನ್ನು ಮಾಡಲು ಬೇಕಾಗುವ ಸಾಮಾಗ್ರಿಗಳು, ಅಲ್ಫಾನ್ಸೊ ಪ್ಯೂರಿ - 500 ಗ್ರಾಂ, ಸಕ್ಕರೆ - 10 ಗ್ರಾಂ, ಪಿಸ್ತಾ - 10 ಗ್ರಾಂ, ಗಟ್ಟಿ ಹಾಲು - 10 ಮಿಲಿ, ಜೇನುತುಪ್ಪ - 7 ಮಿಲಿ, ಹಾಲಿನ ಕೆನೆ - 100 ಮಿಲಿ. ಕೆನೆಗಟ್ಟಿದ ಹಾಲು - 20 ಮಿಲಿ.

ಮ್ಯಾಂಗೋ ಹನಿ ಪಿಸ್ತಾ ಐಸ್ ಕ್ರೀಮ್ ಮಾಡುವ ವಿಧಾನ: ಚಮಚದೊಂದಿಗೆ ಮಾವಿನ ತಿರುಳನ್ನು ಸಂಗ್ರಹಿಸಿ, ಸಕ್ಕರೆ ಮತ್ತು ಹಾಲಿನೊಂದಿಗೆ ಬ್ಲೆಂಡರ್ನಲ್ಲಿ ಹಾಕಿ. ಸಕ್ಕರೆ ಕರಗುವ ತನಕ ಚೆನ್ನಾಗಿ ರುಬ್ಬಿಕೊಳ್ಳಿ. ನಂತರ ಒಂದು ಬಟ್ಟಲಿನಲ್ಲಿ, ಹಾಲಿನ ಕೆನೆ, ಜೇನುತುಪ್ಪ ಮತ್ತು ಗಟ್ಟಿ ಹಾಲು ಹಾಕಿ ಒಂದು ನಿಮಿಷದವರೆಗೂ ಚೆನ್ನಾಗಿ ಮಿಕ್ಸ್ ಮಾಡಿ. ಇದಕ್ಕೆ ರುಬ್ಬಿದ ಮಿಶ್ರಣವನ್ನು ಹಾಕಿ ಚೆನ್ನಾಗಿ ಬೆರೆಸಿ.

ಬಳಿಕ ಇದನ್ನು ಫ್ರಿಜ್ನಲ್ಲಿ ಮೂರು ಗಂಟೆಗಳ ಕಾಲ ಇಟ್ಟು. ತಣ್ಣಗಾದ ಬಳಿಕ ಹೊರತೆಗೆದು . ಕತ್ತರಿಸಿದ ಪಿಸ್ತಾ ಸೇರಿಸಿ ರಾತ್ರಿಯಿಡೀ ಫ್ರಿಜ್ನಲ್ಲಿಡಿ. ಇದೀಗ ಫ್ರೆಶ್ ಮ್ಯಾಂಗೋ ಹನಿ ಪಿಸ್ತಾ ಐಸ್ ಕ್ರೀಮ್ ಅನ್ನು ಮನೆಮಂದಿಯೆಲ್ಲಾ ಕುಳಿತು ಟೇಸ್ಟ್ ಮಾಡಿ.

(Disclaimer: ಈ ಲೇಖನದಲ್ಲಿ ನೀಡಲಾಗಿರುವ ಮಾಹಿತಿಯು ಸಾಮಾನ್ಯ ಊಹೆಗಳನ್ನು ಆಧರಿಸಿದೆ. news18ಗೂ ಇದಕ್ಕೂ ಸಂಬಂಧವಿಲ್ಲ ಮತ್ತು ನ್ಯೂಸ್ 18 ಇದಕ್ಕೆ ಜವಾಬ್ದಾರಿಯಲ್ಲ)