Mango Pickle: ಕರಾವಳಿ, ಮಲೆನಾಡು ಸ್ಟೈಲಲ್ಲಿ ಖಾರ ಖಾರ ಉಪ್ಪಿನಕಾಯಿ ಮಾಡ್ಬೇಕಾ? ಬಾಯಲ್ಲಿ ನೀರ್ ಬಿಡ್ಬೇಡಿ, ಈ ಟಿಪ್ಸ್ ಫಾಲೋ ಮಾಡಿ!

ಇದೀಗ ಮಾವಿನ ಕಾಯಿ ಬಿಡುವ ಸಮಯ. ಹಳ್ಳಿ ಕಡೆಯಲ್ಲಿ ಈ ಉಪ್ಪಿನಕಾಯಿಯನ್ನು ಮನೆಯಲ್ಲಿಯೇ ಹಾಕ್ತಾರೆ. ಇನ್ನು ನಗರಗಳಂತಹ ಪ್ರದೇಶಗಳಲ್ಲಿ ರೆಡಿಮೇಡ್​ ಉಪ್ಪಿನಕಾಯಿಯನ್ನು ಕೊಂಡುಕೊಳ್ಳುತ್ತಾರೆ.

ಸಣ್ಣ ಮಾವಿನಕಾಯಿಯನ್ನು ಮಿಡಿ ಅಂತ ಹೇಳ್ತಾರೆ. ಈ ಮಿಡಿಯಿಂದಲೂ ಮಾವಿನ ಕಾಯಿಯ ಉಪ್ಪಿನಕಾಯಿಯನ್ನು ಹಾಕ್ಬೋದು ಮತ್ತು ದೊಡ್ಡ ಮಾವಿನ ಕಾಯಿಯಿಂದ ಕೂಡ ಉಪ್ಪಿನಕಾಯಿಯನ್ನು ಹಾಕ್ಬೋದು. ಹಾಗಾದ್ರೆ ಮಲೆನಾಡು ಸ್ಟೈಲ್​ನ ಮಾವಿನ ಕಾಯಿ ಉಪ್ಪಿನಕಾಯಿ ಹಾಕವ ಶೈಲಿಯನ್ನು ತಿಳಿಯೋಣ ಬನ್ನಿ.

ಇದಕ್ಕೆ ಬೇಕಾಗುವ ಸಾಮಾಗ್ರಿಗಳು: ಹುಳಿ ಮಾವಿನಕಾಯಿ – 5 ರಿಂದ 6(ಮಧ್ಯಮ ಗಾತ್ರದ್ದು, ಉಪ್ಪು- 1/2 ಕಪ್ , ಬ್ಯಾಡಗಿ ಮೆಣಸಿನಕಾಯಿ – 25, ಮೆಂತ್ಯೆ – 3 ಚಮಚ, ಸಾಸುವೆ – 10 ಚಮಚ, ಎಣ್ಣೆ- 1 ಕಪ್, ಇಂಗು – 1/4 ಚಮಚ, ಜೀರಿಗೆ- 1 ಚಮಚ, ಅರಿಶಿಣ- 1 ಚಮಚ.

ಮಾವಿನ ಕಾಯಿಯನ್ನು ತೊಳೆದು ಚೆನ್ನಾಗಿ ಒರೆಸಿಕೊಳ್ಳಬೇಕು, ನಂತರ ನಿಮಗೆ ಬೇಕಾದ ಗಾತ್ರದಲ್ಲಿ ಮಾವಿನ ಕಾಯಿಯನ್ನು ಕಟ್​ ಮಾಡಿಕೊಳ್ಳಿ. ನೀವು ಉಪ್ಪಿನಕಾಯಿಯನ್ನು ಇಡಲು ಒಂದು ಜಾಡಿಯನ್ನು ಇಎಬೇಕು, ಅದ್ರಲ್ಲಿ ನೀರಿನಾಂಶ ಇರಲೇಬಾರದು. ಜಾಡಿಗೆ ಮಾವಿನಕಾಯಿ ಹೋಳುಗಳನ್ನು ಹಾಕಿ ಅದರ ಮೇಲೆ ಒಂದು ಲೇಯರ್ ಉಪ್ಪು ಹಾಕಿ. ಹೀಗೆ ಒಂದರ ಮೇಲೊಂದರಂತೆ ಮಾವಿನಕಾಯಿ ಮತ್ತು ಉಪ್ಪನ್ನು ಹಾಕಿ ಗಟ್ಟಿಯಾಗಿ ಮುಚ್ಚಳವನ್ನು ಮುಚ್ಚಿ ಎರಡರಿಂದ ಮೂರು ದಿನಗಳವರೆಗೆ ಇಡಬೇಕು.

ಮೂರನೇ ದಿನಕ್ಕೆ ಮಾವಿನಕಾಯಿ ಉಪ್ಪಿನೊಂದಿಗೆ ಚೆನ್ನಾಗಿ ಬೆರೆತು ನೀರಿನಂಶ ಕೆಳಗೆ ಶೇಖರಣೆಯಾಗಿರುತ್ತದೆ. ನಂತರ ಮಾವಿನಕಾಯಿ ಹೋಳುಗಳನ್ನು ಜಾಡಿಯಿಂದ ತೆಗೆದು ಒಂದು ತಟ್ಟೆಯಲ್ಲಿ ಹಾಕಿಡಿ. ಜಾಡಿಯಲ್ಲಿರುವ ಉಪ್ಪಿನ ನೀರನ್ನು ತೆಗೆದು ಅದಕ್ಕೆ ಮತ್ತೊಂದು ಕಪ್ ನೀರು ಸೇರಿಸಿ ಚೆನ್ನಾಗಿ ಕುದಿಸಿ. ನೀರು ಅರ್ಧದಷ್ಟು ಇಂಗಿದ ನಂತರ ಆರಲು ಬಿಡಿ.

ಒಂದು ಬಾಂಡಲಿಯಲ್ಲಿ ಸಾಸಿವೆ, ಮೆಂತ್ಯೆ ಮತ್ತು ಜೀರಿಗೆಯನ್ನು ಹಾಕಿ ಕೆಂಪಾಗುವ ತನಕ ಚೆನ್ನಾಗಿ ಹುರಿದು ತೆಗೆಯಬೇಕು. ಆಮೇಲೆ 4 ಚಮಚ ಎಣ್ಣೆ ಹಾಕಿ ಬ್ಯಾಡಗಿ ಮೆಣಸಿನಕಾಯಿಯನ್ನು ಹುರಿಯಿರಿ. ಕೊನೆಯಲ್ಲಿ ಸ್ವಲ್ಪ ಇಂಗು ಹಾಕಿ ಬಿಸಿ ಮಾಡಿ ತೆಗೆದು ಎಲ್ಲಾ ಮಸಾಲೆ ಪದಾರ್ಥಗಳು ತಣ್ಣಗಾಗಲು ಬಿಡಿ.

ನಂತರ ಮಿಕ್ಸಿ ಜಾರ್‍ಗೆ ಹುರಿದಿಟ್ಟುಕೊಂಡ ಪದಾರ್ಥಗಳನ್ನು ಹಾಕಿ ಪುಡಿ ಮಾಡಿಕೊಳ್ಳಿ. ಬಾಣಲೆಗೆ ಎಣ್ಣೆ ಹಾಕಿ, ಸ್ವಲ್ಪ ಸಾಸಿವೆ ಮತ್ತು ಪುಡಿ ಮಾಡಿದ ಮಿಶ್ರಣ ಹಾಕಿ ಚೆನ್ನಾಗಿ ಕಲಸಿ. ನಂತರ ಮಾವಿನಕಾಯಿ ಹೋಳು ಮತ್ತು ಕುದಿಸಿದ ನೀರನ್ನು ಹಾಕಿ ತಿರುವಿ. ನೀರು ಇಂಗಿದ ನಂತರ ಒಲೆಯಿಂದ ಇಳಿಸಿ ತಣ್ಣಗಾದ ನಂತರ ಒಂದು ಡಬ್ಬದಲ್ಲಿ ಹಾಕಿ ಗಟ್ಟಿಯಾಗಿ ಮುಚ್ಚಳವನ್ನು ಮುಚ್ಚಿ ಎರಡು ದಿನಗಳ ನಂತರ ಬಳಸಿ.

ಇಷ್ಟು ಮಾಡಿದ್ರೆ ನೀವು ಮಳೆಗಾಲ ಫುಲ್​ ಈ ಉಪ್ಪಿನಕಾಯಿ ಊಟಕ್ಕೆ ಹಾಕೊಂಡು ತಿನ್ನಬಹುದು. ಸಖತ್​ ಟೇಸ್ಟಿ ಹಾಗೂ ಖಾರವಾಗಿ ಕೂಡ.