Morning Breakfast: ರುಚಿಗಷ್ಟೇ ಅಲ್ಲ ಆರೋಗ್ಯಕ್ಕೂ ಒಳ್ಳೆಯದು ಜೀರಾ ಪುಲಾವ್!

ಅನೇಕ ಮಂದಿಗೆ ಬಿರಿಯಾನಿ ಎಂಬ ಪದ ಕೇಳಿದ ತಕ್ಷಣ ಬಾಯಲ್ಲಿ ನೀರೂರಿಸಲು ಪ್ರಾರಂಭವಾಗುತ್ತದೆ. ಬಿರಿಯಾನಿಯಲ್ಲಿ ವಿಧ, ವಿಧವಾದ ಬಿರಿಯಾನಿಗಳಿದೆ. ಆದರೆ ಜೀರಿಗೆ ಬಳಸಿ ರುಚಿಕರವಾದ ರೈಸ್ ಮಾಡುವುದರಿಂದ ನಾಲಿಗೆಗೆ ರುಚಿ ಮಾತ್ರವಲ್ಲದೇ ಆರೋಗ್ಯಕ್ಕೆ ಸಾಕಷ್ಟು ಪ್ರಯೋಜನಗಳು ದೊರೆಯುತ್ತದೆ.

ಹೌದು ಜೀರಿಗೆ ಕ ರುಳಿನ ಕ್ಯಾನ್ಸರ್ ತಡೆಗಟ್ಟಲು ಸಹಾಯ ಮಾಡುತ್ತದೆ. ಅಷ್ಟೇ ಅಲ್ಲ, ಅಧಿಕ ರಕ್ತದೊತ್ತಡವನ್ನು ಗುಣಪಡಿಸುತ್ತದೆ. ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ಸ್ಥಿರವಾಗಿಡಲು ಮತ್ತು ಸಕ್ಕರೆ ಮಟ್ಟವನ್ನು ನಿಯಂತ್ರಿಸಲು ಸಹಾಯ ಮಾಡುತ್ತದೆ. ದೇಹದಲ್ಲಿನ ಅನಗತ್ಯ ಕೊಬ್ಬನ್ನು ಕರಗಿಸಲು ಸಹಾಯ ಮಾಡುತ್ತದೆ.

ಇಷ್ಟೇ ಅಲ್ಲದೇ ಜೀರಾ ಪುಲಾವ್ಗೆ ಯಾವುದೇ ರೀತಿಯ ಹೆಚ್ಚು ಮಸಾಲೆಗಳನ್ನು ಬಳಸುವ ಅಗತ್ಯವಿಲ್ಲ. ಹಾಗಾಗಿ ಮನೆಯಲ್ಲಿಯೇ ಬಹಳ ಸುಲಭವಾಗಿ ಜೀರಾ ಪುಲಾವ್ ಮಾಡಬಹುದು. ಅದು ಹೇಗಪ್ಪಾ ಅಂತೀರಾ ನಿಮಗಾಗಿ ಈ ರೆಸಿಪಿ.

ಜೀರಾ ಪುಲಾವ್ ಮಾಡಲು ಬೇಕಾಗಿರುವ ಸಾಮಗ್ರಿಗಳು: ಅಕ್ಕಿ - 1 ಕಪ್, ತುಪ್ಪ - 2 ಟೇಬಲ್ ಸ್ಪೂನ್, ಎಣ್ಣೆ - 2 ಟೀಸ್ಪೂನ್, ಚಕ್ಕೆ- 1, ಲವಂಗ – 4, ಏಲಕ್ಕಿ – 2, ಬಿರಿಯಾನಿ ಎಲೆಗಳು – 1, ಜೀರಿಗೆ - 1 ಚಮಚ, ಹಸಿರು ಮೆಣಸಿನಕಾಯಿ – 2, ಶುಂಠಿ ಬೆಳ್ಳುಳ್ಳಿ ಪೇಸ್ಟ್ – 1 ಟೇಬಲ್ ಸ್ಪೂನ್, ಕೊತ್ತಂಬರಿ ಸೊಪ್ಪು - 1 ಗೊಂಚಲು.

ಜೀರಾ ಪುಲಾವ್ ಮಾಡುವ ವಿಧಾನ: ಮೊದಲು ಪುಲಾವ್ ಮಾಡಲು ತೆಗೆದಿಟ್ಟುಕೊಂಡ ಅಕ್ಕಿಯನ್ನು ತೊಳೆದು ಸ್ವಚ್ಛಗೊಳಿಸಿ, ನೀರಿನಲ್ಲಿ 30 ನಿಮಿಷಗಳ ಕಾಲ ನೆನೆಸಿಡಿ. ಅಕ್ಕಿ ನೆನೆಸಿದ ನಂತರ ನೀರನ್ನು ಸೋಸಿ ಅಕ್ಕಿಯನ್ನು ಮಾತ್ರ ಇಟ್ಟುಕೊಳ್ಳಿ. ಇದಕ್ಕೆ ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಮತ್ತು ಹಸಿರು ಮೆಣಸಿನಕಾಯಿಯನ್ನು ಸೇರಿಸಿ. ಮಸಾಲೆಗಳು ಕಂದು ಬಣ್ಣ ಬರುವವರೆಗೂ ಹುರಿಯಿರಿ. ಉದ್ದವಾಗಿ ಕತ್ತರಿಸಿದ ಹಸಿರು ಮೆಣಸಿನಕಾಯಿಯನ್ನು ಸೇರಿಸುವುದು ಒಳ್ಳೆಯದು.

ಈಗ ಪುಲಾವ್ ಮಾಡಲು, ಒಲೆ ಮೇಲೆ ಕುಕ್ಕರ್ ಇಟ್ಟು ಅದಕ್ಕೆ ಎಣ್ಣೆ ಮತ್ತು ತುಪ್ಪವನ್ನು ಹಾಕಿ ಬಿಸಿ ಮಾಡಲು ಇಡಿ. ಎಣ್ಣೆ ಚೆನ್ನಾಗಿ ಕಾದ ಮೇಲೆ ಲವಂಗ, ಏಲಕ್ಕಿ, ಬಿರಿಯಾನಿ ಎಲೆ ಮತ್ತು ಜೀರಿಗೆ ಹಾಕಿ. ನೀವು ಮೊದಲೇ ಸಿದ್ಧಪಡಿಸಿಟ್ಟುಕೊಂಡ ಅಕ್ಕಿಯನ್ನು ಸೇರಿಸಿ ಮತ್ತು ಒಂದು ನಿಮಿಷ ಎಣ್ಣೆಯಲ್ಲಿ ಲಘುವಾಗಿ ಹುರಿಯಿರಿ. ಬೆರೆಸುವಾಗ ಅಕ್ಕಿ ಒಡೆಯದಂತೆ ಎಚ್ಚರಿಕೆ ವಹಿಸಬೇಕು. ಈಗ ಪ್ರತಿ ಕಪ್ ಅಕ್ಕಿಗೆ 1.5 ಕಪ್ ನೀರಿನ ದರದಲ್ಲಿ ಕುಕ್ಕರ್ಗೆ ನೀರು ಸೇರಿಸಿ. ನಂತರ ರುಚಿಗೆ ತಕ್ಕಷ್ಟು ಉಪ್ಪನ್ನು ಬೆರೆಸಿ. ಅದು ಕುದಿಯುವವರೆಗೆ ಕಾಯಿರಿ.

ಕುದಿಯುವ ವೇಳೆ, ಕುಕ್ಕರ್ ಅನ್ನು ಮುಚ್ಚಿ ಮತ್ತು ಮಧ್ಯಮ ಉರಿಯಲ್ಲಿ ಒಲೆಯನ್ನು ಇರಿಸಿ. ನಂತರ 2 ಸೀಟಿ ಬಂದ ನಂತರ ಕುಕ್ಕರ್ ಕೆಳಗಿಳಿಸಿ ಸೀಟಿ ಬರುವವರೆಗೆ ಕಾಯಿರಿ. ಸೀಟಿ ಬಂದ ನಂತರ ಕುಕ್ಕರ್ ತೆರೆದು, ಅದರ ಮೇಲೆ ಕೊತ್ತಂಬರಿ ಸೊಪ್ಪನ್ನು ಉದುರಿಸಿ, ನಿಧಾನವಾಗಿ ಬೆರೆಸಿ. ಈಗ ಟೇಸ್ಟಿ ಜೀರಾ ಪುಲಾವ್ ಸವಿಯಲು ರೆಡಿ. ಇದನ್ನು ನಿಮ್ಮ ನೆಚ್ಚಿನ ಗ್ರೇವಿಯೊಂದಿಗೆ ಬಡಿಸಿ.