UTI Problem And Diet: ಮೂತ್ರನಾಳ ಸೋಂಕು ಹೋಗಲಾಡಿಸಲು ಈ ಆಹಾರ ಕ್ರಮ ಪಾಲಿಸಿ!

ಯುಟಿಐ ಕಾಯಿಲೆಯಿಂದ ಮೂತ್ರಕೋಶದ ಸೋಂಕು ಮತ್ತು ಮೂತ್ರಪಿಂಡದ ಸೋಂಕಿನ ಅಪಾಯ ಹೆಚ್ಚಿರುತ್ತದೆ ಅಂತಾರೆ ತಜ್ಞರು. ಇನ್ನು ಮೂತ್ರನಾಳ ಸೋಂಕಿಗೆ ಹಲವು ಕಾರಣಗಳಿವೆ. ಅದರಲ್ಲಿ ಮುಖ್ಯವಾಗಿ ಲೈಂಗಿಕ ಚಟುವಟಿಕೆ, ಗರ್ಭಧಾರಣೆ, ಜನನಾಂಗದ ನೈರ್ಮಲ್ಯ ಕಾಪಾಡದೇ ಇರುವ ಅಂಶಗಳು ಅಪಾಯ ಹೆಚ್ಚಿಸುತ್ತವೆ.

ಯುಟಿಐ ಕಾಯಿಲೆ ಉಂಟಾದಾಗ ದೇಹದಲ್ಲಿ ಹಲವು ಸಮಸ್ಯೆಗಳು ಗೋಚರಿಸುತ್ತವೆ. ಮೂತ್ರ ವಿಸರ್ಜನೆ ವೇಳೆ ನೋವುಂಟಾಗುವುದು, ಆಗಾಗ್ಗೆ ಮೂತ್ರ ವಿಸರ್ಜನೆ, ಮೂತ್ರದಲ್ಲಿ ರಕ್ತ, ಶ್ರೋಣಿ ಪ್ರದೇಶದಲ್ಲಿ ನೋವು ಕಾಣಿಸಿಕೊಳ್ಳುತ್ತದೆ. ಇನ್ನು ಮೂತ್ರಪಿಂಡದ ಸೋಂಕುಂಟಾದಾಗ ಜ್ವರ, ಶೀತ, ಕೆಳ ಬೆನ್ನು ನೋವು, ವಾಕರಿಕೆ ಅಥವಾ ವಾಂತಿ ಉಂಟಾಗುತ್ತದೆ.

ಯುಟಿಐ ಕಾಯಿಲೆಗೆ ಚಿಕಿತ್ಸೆ ಏನಿದೆ ಎಂಬುದು ಹಲವರ ಪ್ರಶ್ನೆಯಾಗಿದೆ. ಯುಟಿಐ ಸಮಸ್ಯೆ ಪರಿಹಾರಕ್ಕೆ ಹಲವು ವಿಧದ ಔಷಧಿಗಳು ಮತ್ತು ಚಿಕಿತ್ಸೆಗಳು ಲಭ್ಯ ಇವೆ. ಅದರ ಜೊತೆಗೆ ನೀವು ನಿಮ್ಮ ಆಹಾರದಲ್ಲಿ ಸ್ವಲ್ಪ ಬದಲಾವಣೆ ಮಾಡಿಕೊಂಡರೆ ಗಂಭೀರ ಸಮಸ್ಯೆಯಿಂದ ಬೇಗ ಪರಿಹಾರ ಪಡೆಯಬಹುದು. ಯುಟಿಐನಿಂದ ಪರಿಹಾರ ಪಡೆಯಲು ಏನು ತಿನ್ನಬೇಕು ನೋಡೋಣ.

ಯುಟಿಐ ಸಮಸ್ಯೆ ತೊಡೆದು ಹಾಕಲು ಹೆಚ್ಚು ನೀರು ಸೇವಿಸಿ. ಯುಟಿಐ ತಡೆಗಟ್ಟಲು ಸಾಕಷ್ಟು ಪ್ರಮಾಣದ ನೀರನ್ನು ಕುಡಿಯುವುದು ಅತ್ಯಗತ್ಯ. ಕುಡಿಯುವ ನೀರು ಮೂತ್ರನಾಳದಲ್ಲಿರುವ ಹಾನಿಕಾರಕ ಬ್ಯಾಕ್ಟೀರಿಯಾ ಮತ್ತು ಟಾಕ್ಸಿನ್‌ ಹೊರ ಹಾಕುತ್ತದೆ. ಕಾಫಿ, ಟೀ ಮತ್ತು ಸೋಡಾ ಕಡಿಮೆ ಮಾಡಿ. ಇದು ಯುಟಿಐ ಅಪಾಯವನ್ನು ಹೆಚ್ಚಿಸುತ್ತವೆ.

ಪ್ರೋಬಯಾಟಿಕ್‌ ಸಮೃದ್ಧ ಆಹಾರ ಸೇವನೆಯು ಯುಟಿಐ ಸಮಸ್ಯೆ ತೊಡೆದು ಹಾಕುತ್ತದೆ. ಆಹಾರದಲ್ಲಿ ಗ್ರೀಕ್ ಮೊಸರು, ಉಪ್ಪಿನಕಾಯಿ ಮತ್ತು ಸೌರ್‌ಕ್ರಾಟ್ ಸೇರಿಸಿ. ಅವು ಸೋಂಕಿನ ವಿರುದ್ಧ ಹೋರಾಡಲು ಸಹಾಯ ಮಾಡುತ್ತವೆ.

ಫೈಬರ್ ಸಮೃದ್ಧ ಆಹಾರ ತಿನ್ನಿರಿ. ಇವು ದೇಹದಿಂದ ಹಾನಿಕಾರಕ ಬ್ಯಾಕ್ಟೀರಿಯಾ ಹೊರಹಾಕಿ, ಕರುಳಿನ ಚಲನೆ ಹೆಚ್ಚಿಸುತ್ತವೆ. ಫೈಬರ್ ಭರಿತ ಆಹಾರಗಳಾದ ಬಾಳೆಹಣ್ಣು, ಬೀನ್ಸ್, ಮಸೂರ, ಬೀಜಗಳು, ಓಟ್ಸ್ ಮತ್ತು ಇತರ ಧಾನ್ಯ ತಿನ್ನಿ.

ಸಾಲ್ಮನ್ ಮೀನು ತಿನ್ನಿ. ಇದು ಒಮೆಗಾ 3 ಕೊಬ್ಬಿನಾಮ್ಲ ಹೊಂದಿದೆ. ಇದು UTI ಗಳಿಂದ ಉಂಟಾಗುವ ಉರಿಯೂತ ಕಡಿಮೆ ಮಾಡುತ್ತದೆ. ಮೀನು ತಿನ್ನದಿದ್ದರೆ, ಮೀನಿನ ಎಣ್ಣೆಯ ಪೂರಕ ತಿನ್ನಿ. ಜೊತೆಗೆ ಕ್ರ್ಯಾನ್ಬೆರಿ ಮತ್ತು ಬ್ಲೂಬೆರ್ರಿ ತಿನ್ನಿ. ಇದು ಸೋಂಕಿನ ವಿರುದ್ಧ ಹೋರಾಡಲು ಸಹಾಯ ಮಾಡುತ್ತದೆ.

ಹಸಿರು ಎಲೆಗಳ ತರಕಾರಿಗಳ ತಿನ್ನೋದನ್ನು ಹೆಚ್ಚಿಸಿ. ಪಾಲಕ, ಕೇಲ್ ಮತ್ತು ಕೋಸುಗಡ್ಡೆ ಎಲೆಗಳ ತರಕಾರಿಗಳು ಯುಟಿಐ ಸಮಸ್ಯೆ ಕಡಿಮೆ ಮಾಡುತ್ತವೆ. ಇದು ಪ್ರತಿರಕ್ಷಣಾ ವ್ಯವಸ್ಥೆ ಬಲಪಡಿಸುತ್ತದೆ. ಬ್ಯಾಕ್ಟೀರಿಯಾಗಳನ್ನು ತೊಡೆದು ಹಾಕಲು ಬಲವಾದ ಪ್ರತಿರಕ್ಷಣಾ ವ್ಯವಸ್ಥೆ ಬೇಕು.