ಹೇಗಿದೆ ಗೊತ್ತಾ ವಿಶ್ವದ ಕೋಟ್ಯಧಿಪತಿಗಳ ಮಕ್ಕಳ ಲೈಫ್​ಸ್ಟೈಲ್

ವಿಶ್ವದ ಕೋಟ್ಯಾಧಿಪತಿಗಳ ಮಕ್ಕಳ ಜೀವನ ಶೈಲಿ ಹೇಗಿರುತ್ತದೆ? ಅವರೇನು ಓದಿರುತ್ತಾರೆ ಎಂಬಿತ್ಯಾದಿ ಕುತೂಹಲ ಎಲ್ಲರಲ್ಲೂ ಇರುತ್ತದೆ. ಆ್ಯಪಲ್ ಸಂಸ್ಥಾಪಕ ಸ್ಟೀವ್ ಜಾಬ್ಸ್ , ಮೈಕ್ರೋಸಾಫ್ಟ್​ ಒಡೆಯ ಬಿಲ್ ಗೇಟ್ಸ್ ಸೇರಿದಂತೆ ಹಲವು ಕೋಟ್ಯಾಧೀಶ್ವರ  ಮಕ್ಕಳ ಆಡಂಬರ ಜೀವನ, ಅವರ ಹವ್ಯಾಸಗಳು, ಅವರೆಲ್ಲಿ ಸುತ್ತಾಡುತ್ತಾರೆ ಎಂಬ ಆಸಕ್ತಿಕ ವಿಷಯಗಳನ್ನು ಇಲ್ಲಿ ತಿಳಿಸಲಾಗಿದೆ.

ಎಲ್ಲ ಬಿಲಿಯನೇರ್​ಗಳ ಮಕ್ಕಳು ಹೆಚ್ಚಿನ ಸಮಯವನ್ನು ಕುದುರೆ ಸವಾರಿ, ಪಾರ್ಟಿ, ಪ್ರವಾಸ ಇತ್ಯಾದಿ ಚಟುವಟಿಕೆಗಳಿಗೆ ಹೆಚ್ಚಿನ ಹಣ ಖರ್ಚು ಮಾಡುತ್ತಾರಂತೆ. ಈ ಕೋಟ್ಯಾಧಿಪತಿಗಳ ಮಕ್ಕಳ ದುಂದುವೆಚ್ಚ ಹೇಗಿರುತ್ತದೆ ಎಂಬುದು ಅವರ ಸೋಷಿಯಲ್ ಮೀಡಿಯಾ ಪೋಸ್ಟ್​ಗಳಿಂದಲೇ ತಿಳಿಯುತ್ತದೆ.

ಜೆನಿಫರ್ ಗೇಟ್ಸ್: ಬಿಲ್​ ಗೇಟ್ಸ್​ ಮಗಳು ಇತ್ತೀಚೆಗಷ್ಟೇ ಸ್ಟ್ಯಾನ್​ಫೋರ್ಡ್​ ವಿಶ್ವ ವಿದ್ಯಾಲಯದಿಂದ ಪದವಿ ಪಡೆದಿದ್ದರು. 2018-19​ ರ ಪದವಿಪೂರ್ವ ಶಿಕ್ಷಣದ ಟ್ಯೂಶನ್​ಗಾಗಿ ಜೆನಿಫರ್ ವ್ಯಯಿಸಿದ್ದು ಬರೋಬ್ಬರಿ 50,700 ಡಾಲರ್. ಶಿಕ್ಷಣದೊಂದಿಗೆ ಪ್ರವಾಸವನ್ನು ಹೆಚ್ಚು ಇಷ್ಟ ಪಡುವ ಸಾಫ್ಟ್​ವೇರ್ ಸಂಸ್ಥಾಪಕನ ಮಗಳು ಇಟಲಿಯಿಂದ ಹಿಡಿದು ಬಾರ್ಸಿಲೋನಾ, ಆಸ್ಟ್ರೇಲಿಯಾ ಸೇರಿದಂತೆ ವಿಶ್ವ ಪ್ರಮುಖ ನಗರಗಳಲ್ಲಿ ಸುತ್ತಾಟ ನಡೆಸುತ್ತಾರೆ.

ಇವ್ ಜಾಬ್ಸ್​: ಆ್ಯಪಲ್ ಕಂಪನಿಯ ಸಂಸ್ಥಾಪಕನ ಮಗಳು ಇವ್​ ಜಾಬ್ಸ್​ಗೆ ಕುದುರೆ ಸವಾರಿ ಎಂದರೆ ಬಲು ಇಷ್ಟವಂತೆ. ಇದಕ್ಕಾಗಿಯೇ ಸ್ಟೀವ್ ಜಾಬ್ಸ್​ ಮಗಳಿಗಾಗಿ ಈ ಹಿಂದೆ ಫ್ಲೋರಿಡಾದಲ್ಲಿ 37 ಮಿಲಿಯನ್ ಡಾಲರ್​ನಲ್ಲಿ ಎಲ್ಲ ಅನುಕೂಲವಿರುವ ಆಸ್ತಿಯೊಂದನ್ನು ಖರೀದಿಸಿದ್ದರು. ಅಲ್ಲದೆ ತಾಯಿ ಲಾರೆನ್ ಪಾಲ್ ಮಗಳಿಗಾಗಿ ವಿಲ್ಲಿಂಗ್ಟನ್​ನಲ್ಲಿ 15 ಮಿಲಿಯನ್ ಡಾಲರ್​ಗೆ  ಜಾನುವಾರು ಫಾರ್ಮ್​ನ್ನು ಖರೀದಿ ಮಾಡಿದ್ದರು. ಪ್ರಾಣಿಗಳೊಂದಿಗೆ ಉತ್ತಮ ಒಡನಾಟ ಹೊಂದಿರುವ ಇವ್​ ಜಾಬ್ಸ್​ ಇತ್ತೀಚೆಗೆ ಲೊಲ್ಲಾಪಲೂಜಾ ವಾರ್ಷಿಕ ಸಂಗೀತ ಉತ್ಸವದಲ್ಲಿ ಕಾಣಿಸಿಕೊಂಡಿದ್ದರು. ಈ ಕಾರ್ಯಕ್ರಮದ ಪಾಸ್​ನ್ನು 400 ಡಾಲರ್​ಗಿಂತಲೂ ಅಧಿಕ ಬೆಲೆ ನೀಡಿ ಇವ್​ ಖರೀದಿಸಿದ್ದರು.

ಜಾರ್ಜಿನಾ ಬ್ಲೂಮ್​ಬರ್ಗ್​: ಬ್ಲೂಮ್​ಬರ್ಗ್​ ಸ್ಥಾಪಕ ಮಿಷೆಲ್ ಬ್ಲೂಮ್​ಬರ್ಗ್​ ಅವರ ಮಗಳು ಜಾರ್ಜಿನಾಗೂ ಕುದುರೆ ಸವಾರಿ ಅಂದರೆ ಪಂಚಪ್ರಾಣ. ಕುದುರೆ ರೇಸ್​ ಸೇರಿದಂತೆ ಕೆಲ ಹವ್ಯಾಸವನ್ನು ಮೈಗೂಡಿಸಿಕೊಂಡಿರುವ ಜಾರ್ಜಿನಾ ಹಲವು ರೇಸ್​ನಲ್ಲಿ ಪ್ರಶಸ್ತಿಗಳನ್ನು ಗೆದ್ದುಕೊಂಡಿದ್ದಾರೆ. ಪ್ರತಿ ವರ್ಷ 13 ಕುದುರೆಗಳನ್ನು ಜಾರ್ಜಿನಾ ಖರೀದಿಸುತ್ತಿರುವುದು ಅವರ ಕುದುರೆ ಕ್ರೇಜ್​ಗೆ ಸಾಕ್ಷಿ. ಇದಲ್ಲದೆ ಪ್ರವಾಸವನ್ನು ಹೆಚ್ಚು ಇಷ್ಟಪಡುವ ಮಿಷೆಲ್ ಮಗಳು ಪ್ಯಾರಿಸ್, ಬರ್ಮುಡಾ ಮತ್ತು ಫ್ರಾನ್ಸ್​ ಸೇರಿದಂತೆ ಪ್ರಮುಖ ದೇಶಗಳಿಗೆ ಭೇಟಿ ನೀಡುತ್ತಿರುತ್ತಾರೆ.

ಹಾಲಿ ಬ್ರಾನ್ಸನ್: ಬ್ರಿಟನ್ ಉದ್ಯಮಿ ರಿಚರ್ಡ್​ ಬ್ರಾನ್ಸನ್​ ಮಗಳು. ಹಾಲಿ  ಬ್ರಾನ್ಸನ್ ವಸ್ತುಗಳ ಖರೀದಿಗಿಂತ ಅಡ್ವೆಂಚರ್ಸ್​ನ್ನು ಹೆಚ್ಚು ಇಷ್ಟಪಡುತ್ತಾರೆ. ಇಂತಹದೊಂದು ಹವ್ಯಾಸ ಇರುವುದರಿಂದ ಹಾಲಿ ಸದಾ ಒಂದಲ್ಲ ಒಂದು ಬೆಟ್ಟ ಗುಡ್ಡಗಳನ್ನು ಹತ್ತುವ ಸಾಹಸ ಮಾಡುತ್ತಾಳೆ. ಯುರೋಪ್​ನಲ್ಲಿ ನಡೆದ ವಿಶ್ವ ಮ್ಯಾರಥಾನ್​ನಲ್ಲೂ ಹಾಲಿ ಬ್ರಾನ್ಸನ್ ಕಾಣಿಸಿರುವುದು ಇದೇ ಕಾರಣಕ್ಕೆ.

ಹಾಲಿ ಬ್ರಾನ್ಸನ್ ಸಹೋದರ ಸ್ಯಾಮ್​ ಬ್ರಾನ್ಸನ್ ಕೂಡ ತನ್ನ ಅಕ್ಕನಿಗಿಂತ ಕಡಿಮೆಯೇನಲ್ಲ. ಸ್ಯಾಮ್ ಕೂಡ ಸಾಹಸ ಕ್ರೀಡೆಗಳನ್ನು ಹೆಚ್ಚಾಗಿ ನೆಚ್ಚಿಕೊಂಡಿದ್ದಾರೆ.

ಅಲೆಕ್ಸಾಂಡ್ರಾ ಡೆಲ್: ಡೆಲ್ ಕಂಪನಿಯ ಸಿಇಒ ಮೈಕೆಲ್ ಡೆಲ್ ಅವರ ಪುತ್ರಿ ಅಲೆಕ್ಸಾಂಡ್ರಾ ಫ್ಯಾಷನ್ ಮತ್ತು ಪ್ರವಾಸಕ್ಕಾಗಿ ಹೆಚ್ಚು ಖರ್ಚು ಮಾಡುತ್ತಾರೆ.

ಟಿಫಾನಿ ಟ್ರಂಪ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮಗಳಾದ ಟಿಫಾನಿ ಟ್ರಂಪ್ ಫ್ಯಾಷನ್ ಲೋಕದ ಕ್ರೇಜ್ ಹೊಂದಿದ್ದಾರೆ. ಇದರೊಂದಿಗೆ ವಿಶ್ವ ಸುತ್ತುವುದು ಕೂಡ ಟಿಫಾನಿ ಅವರ ಹವ್ಯಾಸಗಳಲ್ಲಿ ಒಂದು.

ಅಹಮದ್ ಬಿನ್ ಮೊಹಮ್ಮದ್ ಉಲ್ ಮಖ್ತೂಂ: ಯುಎಇ ಪ್ರಧಾನಿ ಶೇಖ್ ಮೊಹಮ್ಮದ್ ಬಿನ್ ರಶೀದ್ ಉಲ್ ಮಖ್ತೂಂ ಅವರ ಮಗ ವಿಶ್ವ ಪರ್ಯಟನೆಗಾಗಿ ಹೆಚ್ಚು ಖರ್ಚು ಮಾಡುತ್ತಾರೆ. ರೇಸ್ ಮತ್ತು ಜಾಲಿ ಲೈಫ್​ಸ್ಟೈಲ್​ ಹೊಂದಿರುವ ಅಹಮದ್​ ಬಿನ್ ತನ್ನ ಸ್ಟೈಲಿಷ್ ಲುಕ್​ನಲ್ಲೂ ಹಿಂದೆ ಬಿದ್ದಿಲ್ಲ.

ಡೇವಿಡ್ ಎಲಿಸನ್: ಸಾಫ್ಟ್​ವೇರ್ ಕಂಪನಿ ಒರಾಕಲ್ ಕಾರ್ಪೋರೇಶನ್ ಸಹ ಸಂಸ್ಥಾಪಕರಾದ ಡೇವಿಡ್​ ಕೂಡ ಸ್ಟೈಲ್ ಹಾಗೂ ವಿಶ್ವ ಸಂಚಾರಕ್ಕಾಗಿ ಹೆಚ್ಚು ಖರ್ಚು ಮಾಡುತ್ತಾರೆ.