Holiday Plan: ಮನಸ್ಸಿಗೆ ಮುದ ನೀಡುವ ಕರ್ನಾಟಕದ ಗಿರಿಧಾಮಗಳಿವು

ಕರ್ನಾಟಕ ಪ್ರವಾಸಿಗರ ಪಾಲಿನ ಸ್ವರ್ಗ ಎಂದರೆ ತಪ್ಪಲ್ಲ. ಇದು ಸುಂದರ ಪರಿಸರವನ್ನು ಹೊಂದಿರುವ ಅನೇಕ ಜಲಪಾತಗಳು, ಬೆಟ್ಟ ಗುಡ್ಡಗಳ ನೆಲೆಬೀಡು. ಇಲ್ಲಿ ಹಲವಾರು ಗಿರಿಧಾಮಗಳಿದ್ದು, ಅವು ನಗರದ ಜಂಜಾಟದಿಂದ ಹೊರಬಂದು ಪ್ರಕೃತಿಯ ನಡುವೆ ಸ್ವಲ್ಪ ನೆಮ್ಮದಿಯ ಸಮಯವನ್ನು ಕಳೆಯಲು ಸೂಕ್ತವಾದ ಸ್ಥಳಗಳು ಎನ್ನಬಹುದು. ಕರ್ನಾಟಕದ ಕೆಲ ಸುಂದರ ಗಿರಿಧಾಮಗಳ ಲಿಸ್ಟ್ ಇಲ್ಲಿದ್ದು, ಈ ಬಾರಿ ರಜೆಯಲ್ಲಿ ಹೋಗಿ ಬನ್ನಿ.

ಬಿಆರ್ ಹಿಲ್ಸ್
ಬಿಳಿಗಿರಿರಂಗನ ಬೆಟ್ಟಗಳು ಕರ್ನಾಟಕದ ಅತ್ಯಂತ ಸುಂದರವಾದ ಗಿರಿಧಾಮಗಳಲ್ಲಿ ಒಂದಾಗಿದೆ. ಸಮುದ್ರ ಮಟ್ಟದಿಂದ 5900 ಅಡಿ ಎತ್ತರದಲ್ಲಿರುವ ಈ ಆಕರ್ಷಕ ಗಿರಿಧಾಮವು ದಕ್ಷಿಣ ಕರ್ನಾಟಕದಲ್ಲಿ ಪೂರ್ವ ಮತ್ತು ಪಶ್ಚಿಮ ಘಟ್ಟಗಳ ಮಧ್ಯದಲ್ಲಿದ್ದು, ಇದು ಪ್ರಕೃತಿ ಮತ್ತು ವನ್ಯಜೀವಿ ಪ್ರಿಯರ ಫೇವರೇಟ್ ಸ್ಥಳ.

ಚಿಕ್ಕಮಗಳೂರು
ಕಾಫಿನಾಡು ಎಂದು ಪ್ರಸಿದ್ದವಾಗಿರುವ ಚಿಕ್ಕಮಗಳೂರಿನಲ್ಲಿ ನಿಮಗೆ ನೋಡಲು ಒಂದೆಲ್ಲಾ ಒಂದು ಸುಂದರ ಸ್ಥಳಗಳು ಸಿಗುತ್ತದೆ. ಅದರಲ್ಲೂ ಮುಳ್ಳಯ್ಯನಗಿರಿ ಎಲ್ಲರ ನೆಚ್ಚಿನ ಸ್ಥಳ ಎನ್ನಬಹುದು. ಕಾಫಿ ಮತ್ತು ಟೀ ತೋಟಗಳಿಂದ ಕೂಡಿದ ಚಿಕ್ಕಮಗಳೂರು ಪ್ರಕೃತಿ ಪ್ರಿಯರಿಗೆ ರಸದೌತಣ ನೀಡುವುದರಲ್ಲಿ ಯಾವುದೇ ಅನುಮಾನವಿಲ್ಲ.

ನಂದಿ ಬೆಟ್ಟ
ನಂದಿಬೆಟ್ಟ ಕರ್ನಾಟಕದ ಜನಪ್ರಿಯ ಗಿರಿಧಾಮಗಳಲ್ಲಿ ಒಂದು, ಇದು 4849 ಅಡಿ ಎತ್ತರದಲ್ಲಿದ್ದು ಹಚ್ಚ ಹಸಿರಿನ ಇಲ್ಲಿನ ಪ್ರದೇಶ ನೋಡುಗರ ಮನಸ್ಸಿಗೆ ಮುದ ನೀಡುತ್ತದೆ. ಟಿಪ್ಪು ಸುಲ್ತಾನನ ಬೇಸಿಗೆಯ ಅರಮನೆ ಸಹ ಇಲ್ಲಿಯೇ ಇದ್ದು, ಮಿಸ್ ಮಾಡದೇ ಈ ಸ್ಥಳವನ್ನು ನೋಡಲೇಬೇಕು.

ಕೆಮ್ಮಣ್ಣುಗುಂಡಿ
ಬಾಬಾ ಬುಡನ್ ಗಿರಿ ಸಮೀಪದಲ್ಲಿರುವ ಈ ಕೆಮ್ಮಣ್ಣುಗುಂಡಿgಎ ಹೋದರೆ ನಿಮಗೆ ನೋಡಲು ಬಹಳಷ್ಟು ಸ್ಥಳಗಳಿವೆ. ಹೆಬ್ಬೆ ಜಲಪಾತ, ರಾಕ್ ಗಾರ್ಡನ್, ರಾಜ್ ಭವನ, ಝಡ್ ಪಾಯಿಂಟ್, ಕಲತ್​ಗಿರಿ ಜಲಪಾತ ಹೀಗೆ ಪಟ್ಟಿ ಮಾಡುತ್ತಾ ಹೋದರೆ ಮುಗಿಯುವುದಿಲ್ಲ.

ಮಡಿಕೇರಿ
ಭಾರತದ ಸ್ಕಾಟ್ಲೆಂಡ್ ಎಂದು ಕರೆಯಲ್ಪಡುವ ಈ ಮಡಿಕೇರಿಯನ್ನು ಚಳಿಗಾಲದಲ್ಲಿ ನೋಡುವುದುದೇ ಒಂದು ಸುಂದರ ಅನುಭವ ಎನ್ನಬಹುದು. ನೀವು ಇಲ್ಲಿಗೆ ವಿಸಿಟ್ ಮಾಡಿದರೆ ಕೂರ್ಗ್ ಕ್ಯಾಂಪಿಂಗ್ ಮತ್ತು ಟ್ರೆಕ್ಕಿಂಗ್ ಹಾಗೂ ವೈಟ್ ವಾಟರ್ ರಾಫ್ಟಿಂಗ್ನಂತಹ ಹಲವಾರು ಚಟುವಟಿಕೆಗಳನ್ನು ಸಹ ಮಾಡಬಹುದು.

ಆಗುಂಬೆ
ದಕ್ಷಿಣ ಭಾರತದ ಚಿರಾಪುಂಜಿ ಎಂದೂ ಪ್ರಸಿದ್ಧವಾಗಿರುವ ಆಗುಂಬೆ ಸೂರ್ಯಸ್ತಕ್ಕೆ ಸಹ ಹೆಸರುವಾಸಿ. ಅಲ್ಲದೇ ಇದು ಅತಿಹೆಚ್ಚು ಮಳೆ ಆಗುವ ಪ್ರದೇಶ ಎಂದು ಸಹ ಗುರುತಿಸಿಕೊಂಡಿದ್ದು, ಇಲ್ಲಿ ಟ್ರೆಕ್ಕಿಂಗ್ ಮಾಡುವುದು ಒಂದು ಸುಂದರ ಅನುಭವ ಎನ್ನಬಹುದು.

ಸಕಲೇಶಪುರ
ಚಹಾ, ಕಾಫಿ ಮತ್ತು ಮಸಾಲೆ ತೋಟಗಳ ಅದ್ಭುತ ಅನುಭವ ಬೇಕು ಎಂದರೆ ನೀವು ಸಕಲೇಶಪುರಕ್ಕೆ ಹೋಗಬೇಕು. ಜಲಪಾತಗಳು, ಹಚ್ಚ ಹಸಿರು ತೋಟಗಳು ಮತ್ತು ಪ್ರಾಚೀನ ದೇವಾಲಯಗಳು ಹೀಗೆ ಇಲ್ಲಿ ನೋಡಲು ಎಲ್ಲಾವೂ ಇದೆ. ಈ ಸಕಲೇಶಪುರವನ್ನು ಫುಲ್ ಪ್ಯಾಕೇಜ್ ಎಂದರೆ ತಪ್ಪಾಗಲಾರದು.