ಬೇಸಿಗೆಯಲ್ಲಿ ಏಲಕ್ಕಿ ಮೂಲಕ ಕೂಡ ಚರ್ಮದ ಸೌಂದರ್ಯವನ್ನು ಕಾಪಾಡಿಕೊಳ್ಳಬಹುದು..!

ಏಲಕ್ಕಿಗಳು ಸಣ್ಣದಾಗಿದ್ದರೂ ಅದರಿಂದ ಸಿಗುವ ಆರೋಗ್ಯಕರ ಪ್ರಯೋಜನಗಳು ಮಾತ್ರ ದೊಡ್ಡದು. ಸಾಮಾನ್ಯವಾಗಿ ಸಿಹಿ ತಿಂಡಿಗಳ ತಯಾರಿಕೆಯಲ್ಲಿ ಏಲಕ್ಕಿಯನ್ನು ಪರಿಮಳಕ್ಕಾಗಿ ಉಪಯೋಗಿಸುತ್ತಾರೆ. ಇದರಲ್ಲಿ ಔಷಧೀಯ ಗುಣಗಳ ಆಗರವೇ ಅಡಗಿದೆ. ದೇಹದಲ್ಲಿ ರೋಗನಿರೋಧಕ ಶಕ್ತಿ, ಜೀರ್ಣ ಶಕ್ತಿ ವೃದ್ಧಿಸುವ ಜತೆಗೆ ಏಲಕ್ಕಿ ಬೀಜಗಳು ಆರೋಗ್ಯಕ್ಕೆ ಉತ್ತಮಗೊಳಿಸುತ್ತದೆ.

ಇಷ್ಟೇ ಅಲ್ಲದೆ ಏಲಕ್ಕಿಯನ್ನು ಸೌಂದರ್ಯವರ್ಧಕವಾಗಿಯು ಕೂಡ ಬಳಸಬಹುದು ಎಂಬುದು ಹೆಚ್ಚಿನವರಿಗೆ ತಿಳಿದಿಲ್ಲ. ಏಲಕ್ಕಿ ಬಳಸಿ ನಿಮ್ಮ ತ್ವಚ್ಛೆಯ ಸೌಂದರ್ಯವನ್ನು ಹೇಗೆ ಕಾಪಾಡಿಕೊಳ್ಳಬಹುದು ಎಂಬುದನ್ನು ಇಲ್ಲಿ ತಿಳಿಸಲಾಗಿದೆ.

ಬೇಸಿಗೆಯ ಶುಷ್ಕ ಗಾಳಿಯಿಂದ ಚರ್ಮ ಒಣಗುವುದಲ್ಲದೆ, ತುಟಿಗಳು ಒಡೆಯುತ್ತದೆ. ಕೆಲವೊಮ್ಮೆ ಈ ರೀತಿಯ ಸಮಸ್ಯೆಯಿಂದ ತುಟಿಗಳು ಒಡೆದು ರಕ್ತಸ್ರಾವವಾಗುತ್ತದೆ. ಇಂತಹ ತೊಂದರೆಗಳನ್ನು ತೊಡೆದುಹಾಕಲು ಏಲಕ್ಕಿಯನ್ನು ಬಳಸಿಕೊಳ್ಳಬಹುದು. 1 ಏಲಕ್ಕಿಯನ್ನು ಚೆನ್ನಾಗಿ ಕುದಿಸಿ ಅದಕ್ಕೆ ಬೆಣ್ಣೆಯನ್ನು ಬೆರೆಸಿ. ಈ ಮಿಶ್ರಣವನ್ನು ದಿನಕ್ಕೆ ಎರಡು ಬಾರಿ ತುಟಿಗಳಿಗೆ ಅನ್ವಯಿಸಿ. ಇದರಿಂದ ತುಟಿ ಒಣಗುವಿಕೆ ಸಮಸ್ಯೆ ದೂರವಾಗುವುದಲ್ಲದೆ, ತುಟಿಯು ನೈಸರ್ಗಿಕವಾಗಿ ಗುಲಾಬಿ ಬಣ್ಣವನ್ನು ಪಡೆದುಕೊಳ್ಳುತ್ತದೆ.

ಬೇಸಿಗೆಯ ಬಿಸಿಯುಕ್ತ ಧೂಳಿನಿಂದ ಚರ್ಮವು ಸುಕ್ಕುಗಟ್ಟಿದಂತೆ ಭಾಸವಾಗುತ್ತದೆ. ಇದನ್ನು ಹೋಗಲಾಡಿಸಲು ಸಹ ಏಲಕ್ಕಿ ಬಲುಪಯೋಗಿ. ಪ್ರತಿದಿನ ಏಲಕ್ಕಿಯನ್ನು ಸೇವಿಸುವುದರಿಂದ ದೇಹದಲ್ಲಿ ವಿಷಕಾರಿ ಅಂಶಗಳು ಹೊರಬರುತ್ತವೆ. ಅಲ್ಲದೆ ವಿಕಿರಣಗಳಿಂದ ತ್ವಚ್ಛೆಯ ಮೇಲೆ ಉಂಟಾದ ಪರಿಣಾಮಗಳು ದೂರವಾಗುತ್ತದೆ.

ಏಲಕ್ಕಿಯಲ್ಲಿ ಚರ್ಮದ ಸೋಂಕಿನ ಸಮಸ್ಯೆಯನ್ನು ಹೋಗಲಾಡಿಸುವ ನಂಜು ನಿರೋಧಕ ಹಾಗೂ ಆ್ಯಂಟಿ ಇನ್​ಫೆಕ್ಷನ್ ಅಂಶಗಳನ್ನು ಹೊಂದಿರುತ್ತದೆ. ಹೀಗಾಗಿ ಏಲಕ್ಕಿಯನ್ನು ನಿಯಮಿತವಾಗಿ ಸೇವಿಸುವುದರಿಂದ ತ್ವಚ್ಛೆಯ ಅಲರ್ಜಿಯನ್ನು ನಿವಾರಣೆ ಮಾಡಬಹುದು.

ಏಲಕ್ಕಿ ಹಾಗೂ ಜೇನುತುಪ್ಪ ಮಿಶ್ರಣವನ್ನು ಅತ್ಯುತ್ತಮ ನೈಸರ್ಗಿಕ ಫೇಸ್​ ಪ್ಯಾಕ್ ಎನ್ನಲಾಗುತ್ತದೆ. ರುಬ್ಬಿದ ಏಲಕ್ಕಿಗೆ ಜೇನನ್ನು ಸೇರಿಸಿ ಮುಖಕ್ಕೆ ಹಚ್ಚುವುದರಿಂದ ಮೊಡವೆ ಮತ್ತು ಕಲೆಗಳನ್ನು ಹೋಗಲಾಡಿಸಬಹುದು. ಇದರಿಂದ ಮುಖವು ಕಾಂತಿಯುತವಾಗಿ ಕಾಣಿಸುತ್ತದೆ. ಇದನ್ನು ಬೆಳಿಗ್ಗೆ ಹಚ್ಚಬಹುದು  ಅಥವಾ ರಾತ್ರಿ ಮಲಗುವಾಗ ಅನ್ವಯಿಸಿ ಬೆಳಗಿನ ಜಾವ ತಣ್ಣನೆಯ ನೀರಿನಿಂದ ತೊಳೆದುಕೊಳ್ಳಬಹುದು.