Ugadi: ಕೇವಲ ಸಂಪ್ರದಾಯಕ್ಕಷ್ಟೇ ಯುಗಾದಿಯಲ್ಲಿ ಬೇವು, ಬೆಲ್ಲ ತಿನ್ನೋದಲ್ಲ; ಇದರ ಹಿಂದಿದೆ ಕುತೂಹಲಕಾರಿ ಸಂಗತಿ!

ಯುಗಾದಿ ಹಬ್ಬ ಕನ್ನಡಿಗರ ಪಾಲಿಗೆ ಹೊಸವರ್ಷವೆಂದು ಪರಿಗಣಿಸಲಾಗುತ್ತದೆ. ಯುಗಾದಿ ಹಬ್ಬದಂದು ಬೇವು-ಬೆಲ್ಲ ಸವಿಯುವ ಸಂಪ್ರದಾಯವಿದೆ. ಚೈತ್ರ ಮಾಸದ ಮೊದಲನೆಯ ದಿನ ಬರುವ ಈ ಹಬ್ಬದಂದು ಜನರು ಬೇವು ಮತ್ತು ಬೆಲ್ಲವನ್ನು ಸಮ ಪ್ರಮಾಣದಲ್ಲಿ ಸೇವಿಸುತ್ತಾರೆ.

ಯುಗಾದಿ ಹಬ್ಬದ ಸಂಕೇತವೇ ಬೇವು – ಬೆಲ್ಲ. ಸಂತೋಷ ಮತ್ತು ದುಃಖವನ್ನು ವರ್ಷವಿಡೀ ಸಮಾನವಾಗಿ ಸ್ವೀಕರಿಸಬೇಕೆಂಬ ಅರ್ಥದಲ್ಲಿ ಬೇವು, ಬೆಲ್ಲ ಸೇವಿಸಲಾಗುತ್ತದೆ.

ಪವಿತ್ರ ಅರ್ಥ ಹಾಗೂ ಆಚರಣೆಯನ್ನು ಹೊಂದಿರುವ ಈ ಹಬ್ಬದಲ್ಲಿ ಬೇವು ಮತ್ತು ಬೆಲ್ಲ ವಿಶೇಷವಾದ ಸ್ಥಾನವನ್ನು ಪಡೆದುಕೊಂಡಿದೆ. ಇದರ ಹಿಂದೆ ಆರೋಗ್ಯ ವಿಜ್ಞಾನವೂ ಅಡಗಿದೆ.

ಅದರಲ್ಲಿಯೂ ಬೇವು ಅತ್ಯಂತ ಆರೋಗ್ಯಕರ ಔಷಧೀಯ ಸಸ್ಯ. ಇದರ ಎಲೆಗಳು ಅನೇಕ ರೋಗಗಳನ್ನು ದೂರ ಇರಿಸುತ್ತದೆ. ಬೇವು ಸವಿಯಲು ಕಹಿ ಆಗಿದ್ದರೂ, ದೇಹದಲ್ಲಿರುವ ಕಫ ಕರಗಿಸುವ ಗುಣ ಹೊಂದಿದೆ. ಮಾತ್ರವಲ್ಲ, ದೇಹವನ್ನು ತಂಪಾಗಿಸುತ್ತದೆ.

ಆದರೆ ಬೆಲ್ಲ ಇದರ ತದ್ವಿರುದ್ಧ ಇದರ ರುಚಿ ಸಿಹಿ. ಬಿಸಿಯಾಗಿರುವ ದೇಹವನ್ನು ತಂಪಾಗಿಸುವ ಗುಣವನ್ನು ಹೊಂದಿದೆ. ವಸಂತ ಋತುವಿನಲ್ಲಿ ಯುಗಾದಿ ಹಬ್ಬ ಬರುತ್ತದೆ. ಈ ವೇಳೆ ತಾಪಮಾನ ತೀವ್ರವಾಗಿದ್ದು, ದೇಹವೂ ಬಿಸಿಯಾಗುತ್ತಿರುತ್ತದೆ. ಬಿಸಿಯಾದ ದೇಹವನ್ನು ಬೇವು, ಬೆಲ್ಲದ ಮಿಶ್ರಣ ತಂಪಾಗಿಸುತ್ತವೆ.

ಯುಗಾದಿ ಹಬ್ಬದಂದು ಬೇವಿನ ಎಲೆ ಮತ್ತು ಹೂವುಗಳನ್ನು ಎಲ್ಲರೂ ಸೇವಿಸುತ್ತಾರೆ. ಇವುಗಳ ಸೇವನೆಯಿಂದ ಕಫ ಪಿತ್ತ ಕಡಿಮೆ ಆಗುತ್ತದೆ. ಜೊತೆಗೆ ಹೊಟ್ಟೆಯಲ್ಲಿರುವ ಜಂತು ಹುಳುಗಳು ನಾಶವಾಗುತ್ತದೆ.

ಇನ್ನೂ ಬೆಲ್ಲದ ವಿಚಾರಕ್ಕೆ ಬಂದರೆ, ಇದು ದೇಹದಲ್ಲಿನ ವಾತ ಪಿತ್ತವನ್ನು ಶಮನ ಮಾಡುತ್ತದೆ. ಅಷ್ಟೇ ಅಲ್ಲ, ಕಬ್ಬಿಣ, ಕ್ಯಾಲ್ಸಿಯಂ, ಫಾಸ್ಫರಸ್ ರೂಪದಲ್ಲಿ ಮಹಿಳೆಯರನ್ನು ಪೋಷಿಸುತ್ತ, ರಕ್ತಹೀನತೆ, ಆಯಾಸ ಮತ್ತು ಮಲಬದ್ಧತೆಯನ್ನು ಕಡಿಮೆ ಮಾಡುತ್ತದೆ.