ಫಿಟ್​ನೆಸ್​ ವಾಚ್​ ಕಟ್ಟುವ ಮುನ್ನ ಎಚ್ಚರ, ನಿಮ್ಮ ಸಮಸ್ಯೆ ಮತ್ತಷ್ಟು ಹೆಚ್ಚಾದೀತು!

ತಂತ್ರಜ್ಞಾನ ಮುಂದುವರಿದಂತೆ ನಮ್ಮ ಆರೋಗ್ಯವನ್ನು ಕಾಪಾಡಲು ನಾನಾ ರೀತಿಯ ಯಂತ್ರಗಳನ್ನು ಕಂಡು ಹಿಡಿಯಲಾಗುತ್ತಿದೆ. ಇದರಲ್ಲಿ ಫಿಟ್ ನೆಸ್ ವಾಚ್ ಕೂಡ ಒಂದು.

ನೀವು ನಿತ್ಯ ಎಷ್ಟು ದೂರ ರನ್ ಮಾಡಿದ್ದೀರಿ? ನಿಮ್ಮ ಹಾರ್ಟ್ ಬೀಟ್ ಎಷ್ಟು? ಎಷ್ಟು ಕ್ಯಾಲರಿ ಬರ್ನ್ ಮಾಡಿದ್ದೀರಿ ಎಂಬಿತ್ಯಾದಿ ಮಾಹಿತಿಗಳನ್ನು ವಾಚ್ ನಲ್ಲೇ ವೀಕ್ಷಿಸಬಹುದಾಗಿದೆ.

ಆರೋಗ್ಯವನ್ನು ಕಾಪಾಡಿಕೊಳ್ಳುವ ನಿಟ್ಟಿನಲ್ಲಿ ಈ ವಾಚ್ ತುಂಬಾನೇ ಮುಖ್ಯ ಎಂಬುದು ಅನೇಕರ ನಂಬಿಕೆ. ಆದರೆ, ಇದು ಅಪಾಯಕಾರಿ ಕೂಡ ಆಗಬಹುದು ಎಂದು ಅಧ್ಯಯನವೊಂದು ಎಚ್ಚರಿಸಿದೆ.

ಹೃದಯ ಸಂಬಂಧಿ ಕಾಯಿಲೆ ಹೊಂದಿರುವವರು ಈ ವಾಚ್ ಬಳಕೆಯನ್ನು ಸಂಪೂರ್ಣವಾಗಿ ನಿಲ್ಲಿಸಬೇಕು ಎಂಬುದು ಸಂಶೋಧಕರು ಕಂಡು ಹಿಡಿದ ಹೊಸ ವಿಚಾರ.

ಹೃದಯ ಸಂಬಂಧಿ ಕಾಯಿಲೆ ಹೊಂದಿರುವ ವ್ಯಕ್ತಿ ನಿತ್ಯ ಇಷ್ಟು ವಾಕ್ ಮಾಡಬೇಕು, ಇಷ್ಟು ಕ್ಯಾಲರಿ ಶಕ್ತಿಯನ್ನು ಬರ್ನ್ ಮಾಡಬೇಕು ಎನ್ನುವ ಉದ್ದೇಶ ಇಟ್ಟುಕೊಂಡಿರುತ್ತಾನೆ.

ಆದರೆ, ಕೆಲವೊಮ್ಮೆ ಇದು ಸಾಧ್ಯವಾಗುವುದೇ ಇಲ್ಲ. ಈ ವೇಳೆ ಫಿಟ್ ನೆಸ್ ವಾಚ್ ನಲ್ಲಿ ಪದೇ ಪದೇ ನೋಟಿಫಿಕೇಷನ್ ಗಳು ಬರುತ್ತಿರುತ್ತವೆ. ಇದು ವ್ಯಕ್ತಿಯಲ್ಲಿ ಒಂದು ರೀತಿಯ ಒತ್ತಡವನ್ನು ಸೃಷ್ಟಿ ಮಾಡುತ್ತದೆ.

ಇದರಿಂದ ವ್ಯಕ್ತಿಯಲ್ಲಿ ರಕ್ತದೊತ್ತಡ ಕಡಿಮೆ ಆಗುತ್ತದೆ. ಜೊತೆಗೆ ವ್ಯಕ್ತಿಯಲ್ಲಿ ನಿದ್ರೆ ಕೂಡ ಕಡಿಮೆ ಆಗುತ್ತದೆ. ಇದು ಆತನ ಆರೋಗ್ಯದ ಮೇಲೆ ನೇರ ಪರಿಣಾಮ ಉಂಟು ಮಾಡುವ ಸಾಧ್ಯತೆ ಇರುತ್ತದೆ ಎನ್ನಲಾಗಿದೆ.

ಹೀಗಾಗಿ, ಫಿಟ್ ನೆಸ್ ವಾಚ್ ಕೆಲ ಸಂದರ್ಭದಲ್ಲಿ ನಮಗೆ ಗೊತ್ತಿಲ್ಲದೆ ತೊಂದರೆಯನ್ನೂ ಉಂಟು ಮಾಡಿ ಬಿಡುತ್ತವೆ ಎಂದು ಅಧ್ಯಯನ ಹೇಳಿದೆ.

ಹೃದಯ ಸಂಬಂಧಿ ಕಾಯಿಲೆ ಇದ್ದವರು ಸಾಮಾನ್ಯವಾಗಿ ಒತ್ತಡಕ್ಕೆ ಒಳಗಾಗಬಾರದು. ಹೀಗಾದರೆ, ಅವರಿಗೆ ಅಪಾಯ ಮತ್ತೂ ಹೆಚ್ಚು. ಈ ದೃಷ್ಟಿಯಿಂದ ಫಿಟ್ನೆಸ್ ವಾಚ್ ಒಳ್ಳೆಯದಲ್ಲ ಎನ್ನುತ್ತಾರೆ ಸಂಶೋಧಕರು.