Skin Care: ಹಣ್ಣು, ತರಕಾರಿ ತಿಂದು ಸಿಪ್ಪೆ ಎಸೆಯಬೇಡಿ, ಸಿಂಪಲ್‌ ಆಗಿ ಮನೆಯಲ್ಲೇ ಫೇಸ್‌ಪ್ಯಾಕ್‌ ತಯಾರಿಸಿ!

ಸಾಮಾನ್ಯವಾಗಿ ಹಣ್ಣು ಮತ್ತು ತರಕಾರಿ ತಿಂದು ಸಿಪ್ಪೆ ಎಸೆಯುತ್ತೇವೆ. ಆದರೆ ಇದೇ ಸಿಪ್ಪೆಯಿಂದ ನೀವು ಫೇಸ್ ಪ್ಯಾಕ್ ಮಾಡಬಹುದು. ಹಣ್ಣು ಮತ್ತು ತರಕಾರಿ ಸಿಪ್ಪೆಯಲ್ಲಿ ಹಲವು ಪೋಷಕಾಂಶಗಳಿವೆ. ಇವು ಚರ್ಮಕ್ಕೆ ಸಾಕಷ್ಟು ಪ್ರಯೋಜನ ನೀಡುತ್ತದೆ. ಚರ್ಮದ ಸಮಸ್ಯೆ ನಿವಾರಣೆಗೆ ಸಹಾಯ ಮಾಡುತ್ತದೆ. ನೈಸರ್ಗಿಕ ಹೊಳಪು ನೀಡುತ್ತದೆ. ಮೊಡವೆ ಮತ್ತು ಎಣ್ಣೆಯುಕ್ತ ಚರ್ಮದ ಸಮಸ್ಯೆಗೆ ಪರಿಣಾಮಕಾರಿ ಪರಿಹಾರ ನೀಡುತ್ತದೆ.

ಕಿತ್ತಳೆ ಸಿಪ್ಪೆ. ಇದು ವಿಟಮಿನ್ ಸಿ ಮತ್ತು ಕ್ಯಾಲ್ಸಿಯಂ ಹೊಂದಿದೆ. ಬ್ಯಾಕ್ಟೀರಿಯಾ ವಿರೋಧಿ ಮತ್ತು ಸೂಕ್ಷ್ಮಜೀವಿ ವಿರೋಧಿ ಗುಣ ಹೊಂದಿದೆ. ಕಿತ್ತಳೆ ಸಿಪ್ಪೆಯನ್ನು ಮುಖದ ಕ್ಲೆನ್ಸರ್ ಆಗಿ ಬಳಸಬಹುದು. ಕಪ್ಪು ಕಲೆ, ಮೊಡವೆ, ಸನ್ ಟ್ಯಾನ್, ಚರ್ಮದ ತೇವಾಂಶ ಕಡಿಮೆ ಮಾಡಿ ಚರ್ಮವನ್ನು ನೈಸರ್ಗಿಕವಾಗಿ ಹೊಳೆಯುವಂತೆ ಮಾಡುತ್ತದೆ.

ಕಿತ್ತಳೆ ಸಿಪ್ಪೆಯನ್ನು ಒಣಗಿಸಿ ಪುಡಿ ಮಾಡಿ. ಇದನ್ನು ಮೊಸರಿನೊಂದಿಗೆ ಬೆರೆಸಿ ಮುಖಕ್ಕೆ ಹಚ್ಚಿರಿ. ಅರ್ಧಗಂಟೆ ನಂತರ ತೊಳೆಯಿರಿ. ಕಿತ್ತಳೆ ಸಿಪ್ಪೆ ಪುಡಿ, ಶ್ರೀಗಂಧದ ಪುಡಿ ಮತ್ತು ರೋಸ್ ವಾಟರ್ ಅಥವಾ ನಿಂಬೆ ರಸ ಮಿಕ್ಸ್ ಮಾಡಿ, ಸ್ಕ್ರಬ್ ತಯಾರಿಸಿ. ಚರ್ಮವನ್ನು ಎಫ್ಫೋಲಿಯೇಟ್ ಮಾಡಿ. ಇದು ಸನ್ ಟ್ಯಾನಿಂಗ್, ಸತ್ತ ಚರ್ಮದ ಕೋಶಗಳನ್ನು ತೆಗೆದು ಹಾಕುತ್ತದೆ.

ಆವಕಾಡೊ ಸಿಪ್ಪೆ. ಚರ್ಮದ ಶುಷ್ಕತೆ, ತುರಿಕೆ ಮತ್ತು ಒರಟು ಚರ್ಮ ನಿವಾರಣೆಗೆ ಸಹಕಾರಿ. ಆವಕಾಡೊ ಸಿಪ್ಪೆಯ ಒಳಭಾಗವನ್ನು ಚರ್ಮದ ಮೇಲೆ ನಿಧಾನವಾಗಿ ಉಜ್ಜಿರಿ. ಹಣ್ಣಿನ ಸಿಪ್ಪೆಯಲ್ಲಿರುವ ಆ್ಯಂಟಿಆಕ್ಸಿಡೆಂಟ್‌ಗಳು ಚರ್ಮವನ್ನು ಎಫ್ಫೋಲಿಯೇಟ್ ಮಾಡುತ್ತದೆ. ಹಣ್ಣಿನಲ್ಲಿರುವ ಉತ್ಕರ್ಷಣ ನಿರೋಧಕಗಳು ಚರ್ಮದ ಮೇಲೆ ವಯಸ್ಸಾದ ವಿರೋಧಿ ಪರಿಣಾಮ ನೀಡುತ್ತವೆ.

ದಾಳಿಂಬೆ ಸಿಪ್ಪೆ. ಇದು ನೈಸರ್ಗಿಕ ಮಾಯಿಶ್ಚರೈಸರ್ ಆಗಿದೆ. ಸುಕ್ಕು ಮತ್ತು ಮೊಡವೆ ತೊಡೆದು ಹಾಕುತ್ತದೆ. ಬಿಸಿಲಿನಲ್ಲಿ ಒಣಗಿದ ದಾಳಿಂಬೆ ಸಿಪ್ಪೆ ಪುಡಿ ತಯಾರಿಸಿ, ನಿಂಬೆ ರಸ ಅಥವಾ ರೋಸ್ ವಾಟರ್‌ ಹಾಕಿ ಬೆರೆಸಿ, ಚರ್ಮಕ್ಕೆ ಹಚ್ಚಿರಿ. ಅರ್ಧ ಗಂಟೆ ನಂತರ ತೊಳೆಯಿರಿ. ಎಣ್ಣೆಯುಕ್ತ ಚರ್ಮದ ಸಮಸ್ಯೆ ತಡೆಗೆ ಕಂದು ಸಕ್ಕರೆ ಮತ್ತು ಜೇನುತುಪ್ಪ ಹಾಕಿ ಫೇಸ್ ಪ್ಯಾಕ್ ಹಾಕಿ.

ಸೇಬು ಸಿಪ್ಪೆ. ಇದು ತ್ವಚೆ ಸ್ನೇಹಿ ಪೋಷಕಾಂಶಗಳ ಶಕ್ತಿ ಕೇಂದ್ರ. ಇದು ಕಾಲಜನ್ ಮಟ್ಟವನ್ನು ಹೆಚ್ಚಿಸುತ್ತದೆ. ಸೇಬಿನ ಸಿಪ್ಪೆಯನ್ನು ತೆಗೆದು ರುಬ್ಬಿ, ಪೇಸ್ಟ್ ತಯಾರಿಸಿ ತ್ವಚೆಗೆ ಹಚ್ಚಿರಿ. ನಂತರ ತಣ್ಣೀರಿನಿಂದ ತೊಳೆಯಿರಿ. ನಂತರ ಮಾಯಿಶ್ಚರೈಸರ್ ಹಚ್ಚಿರಿ. ಇದು ಚರ್ಮವನ್ನು ಶುದ್ಧೀಕರಿಸುತ್ತದೆ. ನೈಸರ್ಗಿಕ ಹೊಳಪನ್ನು ನೀಡುತ್ತದೆ.

ಪಪ್ಪಾಯಿ ಸಿಪ್ಪೆ. ಇದು ಆರೋಗ್ಯಕರ ಚರ್ಮಕ್ಕೆ ಅವಶ್ಯಕ. ಪಪ್ಪಾಯಿ ಸಿಪ್ಪೆಯಲ್ಲಿರುವ ಪಪೈನ್ ಎಂಬ ಕಿಣ್ವವು ಚರ್ಮದ ಟೋನ್ ಅನ್ನು ಸುಧಾರಿಸುತ್ತದೆ. ಪಪ್ಪಾಯಿ ಸಿಪ್ಪೆ ರುಬ್ಬಿ. ಅದಕ್ಕೆ ಜೇನುತುಪ್ಪ ಮತ್ತು ನಿಂಬೆ ರಸ ಹಾಕಿ ಮಿಕ್ಸ್ ಮಾಡಿ, ಮುಖಕ್ಕೆ ಹಚ್ಚರಿ. 20 ನಿಮಿಷ ಬಿಟ್ಟು, ಉಗುರು ಬೆಚ್ಚಗಿನ ನೀರಿನಿಂದ ತೊಳೆಯಿರಿ.

ಬಾಳೆಹಣ್ಣಿನ ಸಿಪ್ಪೆ. ಇದು ಮೊಡವೆ, ಉರಿಯೂತ ಮತ್ತು ಚರ್ಮದ ಕಿರಿಕಿರಿ ಕಡಿಮೆ ಮಾಡುತ್ತದೆ. ಎಸ್ಜಿಮಾ ಮತ್ತು ಸೋರಿಯಾಸಿಸ್‌ ಚರ್ಮದ ಸಮಸ್ಯೆ ತಡೆಯುತ್ತದೆ. ಬಾಳೆಹಣ್ಣಿನ ಸಿಪ್ಪೆಯ ಒಳಭಾಗವನ್ನು ಎಸ್ಜಿಮಾ ಪೀಡಿತ ಪ್ರದೇಶದ ಮೇಲೆ ಉಜ್ಜಿ. 30 ನಿಮಿಷ ಬಿಟ್ಟು ಸ್ವಚ್ಛಗೊಳಿಸಿ. ಇದು ಚರ್ಮವನ್ನು ಹೈಡ್ರೀಕರಿಸಿ, ಹೊಳೆಯುವಂತೆ ಮಾಡತ್ತದೆ.