Food Habits: ಹಾಲು ಮತ್ತು ಹಣ್ಣುಗಳನ್ನು ಯಾವುದೇ ಕಾರಣಕ್ಕೂ ಜೊತೆಯಲ್ಲಿ ಸೇವಿಸಬಾರದು, ಇದು ಭಾರೀ ಡೇಂಜರ್!

ನಾವು ಏನು ತಿನ್ನುತ್ತೇವೆಯೋ ನಮ್ಮ ನಡವಳಿಕೆಯೂ ಅದರಂತೆಯೇ ಇರುತ್ತದಂತೆ..ಹಾಗೆನ್ನುತ್ತದೆ ಆಯುರ್ವೇದ. ನಾವು ತಿನ್ನುವ ಆಹಾರದಲ್ಲಿ ಎಲ್ಲಾ ರುಚಿಗಳೂ ಇರಬೇಕು, ಅದೇ ಪರಿಪೂರ್ಣ ಆಹಾರದ ಸಂಕೇತ. ಹಾಗಾಗಿ ನಾವು ಪ್ರತಿದಿನ ಸೇವಿಸುವ ಆಹಾರದ ಮೇಲೆ ಗಮನ ಇರಿಸುವುದು ಬಹಳ ಮುಖ್ಯ.

ನಮ್ಮ ದೇಹದ ಆರೋಗ್ಯ ನಾವು ತಿನ್ನುವ ಆಹಾರದ ಮೇಲೆ ನಿರ್ಧಾರವಾಗಿರುತ್ತದೆ. ಹಾಗಾಗಿ ಹಣ್ಣು ಮತ್ತು ತರಕಾರಿಗಳನ್ನು ಹೇರಳವಾಗಿ ಸೇವಿಸಬೇಕು ಎನ್ನುತ್ತಾರೆ. ಇದು ನಮ್ಮ ಜೀರ್ಣಾಂಗ ವ್ಯವಸ್ಥೆಯನ್ನು ಆರೋಗ್ಯವಾಗಿ ಇರಿಸಲು ಸಹಕಾರಿಯಾಗಿದೆ.

ಸರಿಯಾದ ಕ್ರಮದಲ್ಲಿ ಆಹಾರ ಸೇವನೆ ಮಾಡದಿದ್ರೆ ದೇಹ ಅದನ್ನು ಅರಗಿಸಿಕೊಳ್ಳಲು ಕಷ್ಟವಾಗುತ್ತದೆ. ಅಷ್ಟೇ ಅಲ್ಲ, ಯಾವ ಪದಾರ್ಥದ ಜೊತೆ ಇನ್ಯಾವ ಪದಾರ್ಥ ಸೇರಿಸಬೇಕು ಎನ್ನುವುದನ್ನೂ ತಿಳಿದಿರುವುದು ಉತ್ತಮ. ಇಲ್ಲದಿದ್ದರೆ ಆರೋಗ್ಯದಲ್ಲಿ ಏರುಪೇರಾಗುವುದು ಮಾತ್ರವಲ್ಲ, ದೀರ್ಘಕಾಲದಲ್ಲಿ ವಿಷವಾಗಿಯೂ ಬದಲಾಗುವ ಸಾಧ್ಯತೆ ಇರುತ್ತದೆ ಎನ್ನುತ್ತದೆ ಆಯುರ್ವೇದ.

ಮೊದಲನೆಯದಾಗಿ ಮೀನು ಮತ್ತು ಹಾಲು: ಇವೆರಡನ್ನೂ ಯಾವುದೇ ಕಾರಣಕ್ಕೂ ಜೊತೆಯಾಗಿ ಸೇವಿಸಬಾರದು. ಹಾಲು ದೇಹವನ್ನು ತಂಪಾಗಿಸುವ ಆಹಾರ. ಅದೇ ಮೀನು, ದೇಹದ ಉಷ್ಣತೆ ಹೆಚ್ಚಿಸುತ್ತದೆ. ಎರಡೂ ಒಟ್ಟಿಗೆ ಸೇವಿಸಿದರೆ ರಕ್ತದ ಸೋಂಕು ತಗಲುವ ಅಪಾಯ ಇರುತ್ತದೆ.

ಇದು ನಿಜಕ್ಕೂ ಎಲ್ಲರೂ ತಿಳಿದಿರಲೇಬೇಕಾದ ವಿಚಾರ. ಹಾಲು ಅಥವಾ ಹಾಲಿನ ಉತ್ಪನ್ನಗಳ ಜೊತೆ ಕೆಲವು ಹಣ್ಣುಗಳು ಹೊಂದುವುದಿಲ್ಲ. ಉದಾಹರಣೆಗೆ ಸಿಟ್ರಿಕ್ ಅಂಶಗಳಿರುವ ಕಿತ್ತಳೆ, ಮೂಸಂಬಿ, ಕಿವಿ, ಸ್ಟ್ರಾಬೆರ್ರಿ ಮುಂತಾದ ಹಣ್ಣುಗಳನ್ನು ಹಾಲಿನೊಂದಿಗೆ ಸೇವಿಸಬಾರದು. ಆದರೆ ಬಾಳೆಹಣ್ಣು ಮತ್ತು ಹಾಲನ್ನೂ ಒಟ್ಟಿಗೆ ಸೇವಿಸಬಾರದು ಎನ್ನುತ್ತಾರೆ. ಇದು ದೇಹದೊಳಗೆ ಹೋದಾಗ ವಿಷವಾಗಿ ಬದಲಾಗುವ ಅಪಾಯ ಇರುತ್ತದಂತೆ.

ಜೇನುತುಪ್ಪವನ್ನು ಯಾವುದೇ ಕಾರಣಕ್ಕೂ ಬಿಸಿ ಮಾಡಿ ಸೇವಿಸಬಾರದು. ಜೇನಿನಲ್ಲಿ ದೇಹದ ಆರೋಗ್ಯಕ್ಕೆ ಪೂರಕವಾದ ಅನೇಕ ಅಂಶಗಳಿರುತ್ತವೆ. ಬಿಸಿ ಮಾಡಿದರೆ ಅವೆಲ್ಲವೂ ನಾಶವಾಗಿಬಿಡುತ್ತವೆ. ಅಷ್ಟೇ ಅಲ್ಲ, ನಂತರ ಅವೆಲ್ಲವೂ ವಿಷವಾಗಿ ಬದಲಾಗಿ ದೇಹದ ಆರೋಗ್ಯದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಬಲ್ಲದು.

ತುಪ್ಪ ಮತ್ತು ಜೇನು ಇವೆರಡೂ ಉತ್ತಮ ಆಹಾರ ಪದಾರ್ಥಗಳು. ಅನೇಕ ಖಾದ್ಯಗಳಿಗೆ ಎರಡನ್ನೂ ಒಟ್ಟಾಗಿ ಬಳಸುತ್ತಾರೆ. ಆದರೆ ತುಪ್ಪ ಮತ್ತು ಜೇನನ್ನು ಜೊತೆಯಾಗಿ ಬಳಸುವಾಗ ಒಂದು ಪದಾರ್ಥ ಇನ್ನೊಂದಕ್ಕಿಂತ ತುಸು ಹೆಚ್ಚಿರುವಂತೆ ನೋಡಿಕೊಳ್ಳಬೇಕು. ಇಲ್ಲದಿದ್ದರೆ ಆರೋಗ್ಯಕ್ಕೆ ಅಪಾಯಕಾರಿ ಎನ್ನಲಾಗಿದೆ.