World Kidney Day 2023: ಈ ಆಹಾರಗಳನ್ನು ತಿಂದ್ರೆ ಕಿಡ್ನಿಯಲ್ಲಿ ಸ್ಟೋನ್ ಆಗುವುದು ಗ್ಯಾರಂಟಿ!

ಪ್ರತಿ ವರ್ಷ ಮಾರ್ಚ್ 9ರಂದು ವಿಶ್ವ ಕಿಡ್ನಿ ದಿನವನನ್ನು ಆಚರಿಸಲಾಗುತ್ತದೆ. ಈ ದಿನ ಮೂತ್ರಪಿಂಡದ ಆರೋಗ್ಯವನ್ನು ಕಾಪಾಡಿಕೊಳ್ಳುವ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸಲಾಗುತ್ತದೆ. ಮೂತ್ರಪಿಂಡವು ದೇಹದಿಂದ ವಿಷ ಮತ್ತು ತ್ಯಾಜ್ಯವನ್ನು ತೆಗೆದುಹಾಕಲು ಮತ್ತು ದೇಹ ಸುಗಮವಾಗಿ ಕಾರ್ಯನಿರ್ವಹಿಸಲು ಸಹಾಯಕರವಾಗಿದೆ.

ಪ್ರತಿ ವರ್ಷ ಈ ದಿನದಂದು ನಮ್ಮ ದೇಹದ ಪ್ರಮುಖ ಅಂಗದ ಆರೋಗ್ಯ ಮತ್ತು ಅದರ ಮಹತ್ವದ ಬಗ್ಗೆ ಜಾಗೃತಿ ಮೂಡಿಸಲಾಗುತ್ತದೆ. ಮೂತ್ರಪಿಂಡದ ಆರೋಗ್ಯದ ವಿಚಾರಕ್ಕೆ ಬಂದರೆ, ಮೂತ್ರಪಿಂಡದಲ್ಲಿ ಕಲ್ಲುಗಳ ಸಮಸ್ಯೆ ತುಂಬಾ ಸಾಮಾನ್ಯವಾಗಿದೆ ಮತ್ತು ತುಂಬಾ ನೋವಿನಿಂದ ಕೂಡಿರುತ್ತದೆ. ಕಿಡ್ನಿ ಸ್ಟೋನ್ಸ್ ಸಮಸ್ಯೆಯಿಂದ ತಪ್ಪಿಸಿಕೊಳ್ಳಲು ಕೆಲವು ಸರಳ ಟಿಪ್ಸ್ ಅನ್ನು ಈ ಕೆಳಗೆ ನೀಡಲಾಗಿದೆ.

ಆಕ್ಸಲೇಟ್ ಆಹಾರಗಳನ್ನು ಸೇವಿಸಿ: ಪಾಲಕ್, ಚಾಕೊಲೇಟ್, ಎಲೆಕೋಸು, ಕಡಲೆ, ಟೊಮ್ಯಾಟೊ, ಗೋಧಿಯಂತಹ ಆಹಾರಗಳು ಆಕ್ಸಲೇಟ್ಗಳ ಮೂಲಗಳಾಗಿವೆ. ಈ ಆಹಾರಗಳು ದೇಹದಲ್ಲಿ ಚಯಾಪಚಯಗೊಂಡಾಗ, ಆಕ್ಸಲೇಟ್ ಮಟ್ಟವು ರಕ್ತದಲ್ಲಿ ಹೆಚ್ಚಾಗುತ್ತದೆ ಮತ್ತು ಕ್ಯಾಲ್ಸಿಯಂ ಆಕ್ಸಲೇಟ್ ಕಲ್ಲುಗಳ ರಚನೆಗೆ ಕಾರಣವಾಗಬಹುದು. ಇಂತಹ ಸಮಸ್ಯೆಗಳನ್ನು ತಪ್ಪಿಸಲು ಆಕ್ಸಲೇಟ್ ಆಹಾರಗಳನ್ನು ಮಿತವಾಗಿ ಸೇವಿಸುವುದು ಉತ್ತಮ.

ಸೋಡಿಯಂ ಕಡಿಮೆ ಇರುವ ಆಹಾರವನ್ನು ತಿನ್ನಿ: ಸೋಡಿಯಂ ಅಧಿಕವಾಗಿರುವ ಆಹಾರವು ಮೂತ್ರಪಿಂಡದ ಕಲ್ಲುಗಳ ಅಪಾಯವನ್ನು ಹೆಚ್ಚಿಸುವುದಲ್ಲದೇ, ನಿಮ್ಮ ರಕ್ತದೊತ್ತಡದ ಮೇಲೂ ಸಹ ಪರಿಣಾಮ ಬೀರಬಹುದು. ಆದ್ದರಿಂದ, ನಿಮ್ಮ ಹೃದಯ ಮತ್ತು ಮೂತ್ರಪಿಂಡಗಳ ಪ್ರಯೋಜನಕ್ಕಾಗಿ, ನಿಮ್ಮ ಆಹಾರದಲ್ಲಿ ಉಪ್ಪಿನ ಪ್ರಮಾಣವನ್ನು ಕಡಿಮೆ ಮಾಡಿ. ಅಲ್ಲದೇ, ಸಂಸ್ಕರಿಸಿದ ಆಹಾರಗಳು, ಫಾಸ್ಟ್ ಫುಡ್ ಮತ್ತು ಅಡಿಗೆ ಸೋಡಾ ಹಾಕಿರುವ ಆಹಾರಗಳನ್ನು ತ್ಯಜಿಸುವುದು ಉತ್ತಮ.

ನೀರು ಕುಡಿಯಿರಿ : ಆರೋಗ್ಯಕರ ಪ್ರಮಾಣದ ನೀರನ್ನು ಕುಡಿಯುವುದು ದೇಹದಲ್ಲಿನ ಯೂರಿಕ್ ಆಮ್ಲವನ್ನು ದುರ್ಬಲಗೊಳಿಸುವುದಲ್ಲದೇ, ಮೂತ್ರಪಿಂಡದ ಕಲ್ಲುಗಳಿದ್ದರೆ ಅದನ್ನು ಕರಗಿಸಲು ಸಹಾಯ ಮಾಡುತ್ತದೆ. ಆದ್ದರಿಂದ, ವೈದ್ಯರು ಪ್ರತಿದಿನ ಕನಿಷ್ಠ 3 ಲೀಟರ್ ನೀರನ್ನು ಕುಡಿಯಲು ಶಿಫಾರಸು ಮಾಡುತ್ತಾರೆ.

ಕಡಿಮೆ ಮಾಂಸಾಹಾರ ಮತ್ತು ಹೆಚ್ಚು ತರಕಾರಿಗಳನ್ನು ಸೇವಿಸಿ : ದೇಹದಲ್ಲಿ ಯೂರಿಕ್ ಆಸಿಡ್ ಸಂಗ್ರಹವಾಗುವುದನ್ನು ತಡೆಯುವುದು ಮೂತ್ರಪಿಂಡದ ಕಲ್ಲುಗಳ ರಚನೆಯನ್ನು ತಡೆಯುವ ಮಾರ್ಗಗಳಲ್ಲಿ ಒಂದಾಗಿದೆ. ಪ್ರಾಣಿಗಳ ಮಾಂಸದ ಪ್ರೋಟೀನ್ ಸಸ್ಯ ಮೂಲಗಳಿಂದ ಪ್ರೋಟೀನ್ಗಿಂತ ಹೆಚ್ಚಿನ ಮಟ್ಟದ ಯೂರಿಕ್ ಆಮ್ಲವನ್ನು ಹೊಂದಿರುತ್ತದೆ. ಆದ್ದರಿಂದ, ಕೋಳಿ, ಮೊಟ್ಟೆ ಮತ್ತು ಮಾಂಸ ಆಹಾರವನ್ನು ಮಿತವಾಗಿ ಸೇವಿಸಬೇಕು. ಬೀನ್ಸ್, ಕಾಳುಗಳು, ಬೀಜಗಳು ಇತ್ಯಾದಿಗಳನ್ನು ಹೆಚ್ಚಾಗಿ ತಿನ್ನಬೇಕು. ತರಕಾರಿಗಳಿಗೆ ಸಂಬಂಧಿಸಿದಂತೆ, ನೀವು ಬಹಳಷ್ಟು ಗ್ರೀನ್ ಮತ್ತು ನೀರಿನಾಂಶವಿರುವ ಕುಂಬಳಕಾಯಿ ಮತ್ತು ಸಿಹಿ ಆಲೂಗಡ್ಡೆಗಳನ್ನು ಸೇವಿಸಬೇಕು.

ವೈದ್ಯರನ್ನು ಸಂಪರ್ಕಿಸಿ : ಆಹಾರದ ಹೊರತಾಗಿ, ಜೆನೆಟಿಕ್ಸ್, ಆಧಾರವಾಗಿರುವ ಆರೋಗ್ಯ ಪರಿಸ್ಥಿತಿಗಳು ಮತ್ತು ಔಷಧಿಗಳು ಕೆಲವೊಮ್ಮೆ ಮೂತ್ರಪಿಂಡದ ಕಲ್ಲುಗಳಿಗೆ ಕಾರಣವಾಗಬಹುದು. ಆದ್ದರಿಂದ ನಿಯಮಿತ ಮಧ್ಯಂತರದಲ್ಲಿ ದೈಹಿಕ ಪರೀಕ್ಷೆಯನ್ನು ನಡೆಸುವುದು ಒಳ್ಳೆಯದು. ಸಕಾಲಿಕ ರೋಗನಿರ್ಣಯ, ಚಿಕಿತ್ಸೆ ಮತ್ತು ತಡೆಗಟ್ಟುವ ಕ್ರಮಗಳು ರೋಗದ ತೀವ್ರತೆಯನ್ನು ತಡೆಗಟ್ಟಬಹುದು.