Watermelon Seeds: ಕಲ್ಲಂಗಡಿ ಹಣ್ಣು ತಿಂದು ಬೀಜ ಬಿಸಾಡಬೇಡಿ, ಅದ್ರಿಂದ ಇಷ್ಟೆಲ್ಲಾ ಪ್ರಯೋಜನವಿದೆ!

ಬೇಸಿಗೆ ಕಾಲ (Summer Season) ಬಂತೆಂದರೆ ಹೊರಗೆಲ್ಲ ಉರಿ ಬಿಸಿಲು. ದೇಹ ತಣ್ಣಗಾಗಲು ಏನಾದರೂ ಕುಡಿಬೇಕು ಅಥವಾ ತಿನ್ನಬೇಕು ಅಂತ ಅನಿಸೋದು ಸಹಜ. ಬೇಸಿಗೆಯಲ್ಲಿ ಜನ ಇಷ್ಟಪಡುವ ಹಣ್ಣುಗಳಲ್ಲಿ ಕಲ್ಲಂಗಡಿ ಹಣ್ಣು ಕೂಡಾ ಒಂದು.

ಕಲ್ಲಂಗಡಿ (Watermelon) ಜ್ಯೂಸ್ ಮಾಡಿ ಕುಡಿದರೆ ದೇಹ ತಣ್ಣಗಾಗುತ್ತದೆ. ಜೊತೆಗೆ ಆರೋಗ್ಯಕ್ಕೂ ಒಳ್ಳೆಯದು. ಇದರ ಜೊತೆಗೆ ನೀವು ಕಲ್ಲಂಗಡಿ ಹಣ್ಣು ಕತ್ತರಿಸಿ ಜ್ಯೂಸ್‌ ಮಾಡಿದ ಅದರ ಬೀಜಗಳನ್ನು ಎಸೆದು ಬಿಡುತ್ತೀರಿ. ಆದರೆ ಇನ್ನು ಮೇಲೆ ಹಾಗೆಲ್ಲ ಮಾಡಬೇಡಿ.

ಕಲ್ಲಂಗಡಿ ಹಣ್ಣು ಬೀಜಗಳ ಬಗ್ಗೆ ಡಯಟಿಷಿಯನ್‌ ಇಂಚಾರ್ಜ್‌ ಆದ ಅಂಕಿತಾ ಘೋಷಾಲ್ ಬಿಷ್ಟ್, ಪ್ರೈಮಸ್ ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆ, ಚಾಣಕ್ಯಪುರಿ, ನವದೆಹಲಿ ಇವರು ಕೆಲವು ಪ್ರಯೋಜನಗಳನ್ನು ಇಲ್ಲಿ ತಿಳಿಸಿದ್ದಾರೆ. ಕಲ್ಲಂಗಡಿ ಹಣ್ಣಿನ ಬೀಜಗಳ 5 ಆರೋಗ್ಯ ಪ್ರಯೋಜನಗಳ ಬಗ್ಗೆ ಇಲ್ಲಿ ನೀಡಲಾಗಿದೆ.

ಹೃದಯದ ಆರೋಗ್ಯಕ್ಕೆ ಪ್ರಯೋಜನಕಾರಿ: ಕಲ್ಲಂಗಡಿ ಬೀಜಗಳು ಮೆಗ್ನೀಸಿಯಮ್‌ನ ಅತ್ಯುತ್ತಮ ಮೂಲವಾಗಿದೆ. ಇವು ರಕ್ತದೊತ್ತಡವನ್ನು ನಿಯಂತ್ರಿಸುತ್ತವೆ ಹಾಗೂ ಹೃದಯದ ಆರೋಗ್ಯಕ್ಕೆ ಬಹಳಷ್ಟು ಪ್ರಯೋಜನಕಾರಿಯಾಗಿದೆ ಎಂದು ಬಿಷ್ಟ್‌ ಹೇಳುತ್ತಾರೆ.

ಪ್ರತಿರಕ್ಷಣಾ ವ್ಯವಸ್ಥೆಗೆ ಕಲ್ಲಂಗಡಿ ಬೀಜಗಳು ಸಹಾಯಕಾರಿಯಾಗಿವೆ: ನಮ್ಮ ದೇಹದಲ್ಲಿನ ಪ್ರತಿರಕ್ಷಣಾ ವ್ಯವಸ್ಥೆಗೆ ಕಲ್ಲಂಗಡಿ ಬೀಜಗಳು ಸಹಾಯಕಾರಿಯಾಗಿವೆ. ಕಲ್ಲಂಗಡಿ ಬೀಜಗಳಲ್ಲಿ ಜಿಂಕ್‌ ಅಂಶವು ಹೆಚ್ಚಿರುವ ಕಾರಣ ನಮ್ಮ ದೇಹದ ಇಮ್ಯುನಿಟಿಯನ್ನು ಕಾಪಾಡಿಕೊಳ್ಳುವಲ್ಲಿ ಇವು ಸಹಾಯಕಾರಿಯಾಗಿವೆ. ಈ ಕಲ್ಲಂಗಡಿ ಬೀಜಗಳು ಸೋಂಕುಗಳು ಮತ್ತು ರೋಗಗಳ ವಿರುದ್ಧ ಹೋರಾಡಲು ಸಹಾಯ ಮಾಡುತ್ತವೆ.

ದೇಹದ ಜೀರ್ಣಕಾರಿ ಆರೋಗ್ಯವನ್ನು ಕಾಪಾಡಿಕೊಳ್ಳುವಲ್ಲಿ ಕಲ್ಲಂಗಡಿ ಬೀಜಗಳು ಸಹಾಯಕಾರಿ. ಕಲ್ಲಂಗಡಿ ಬೀಜಗಳು ಫೈಬರ್ ಮತ್ತು ಉತ್ತಮ ಕೊಬ್ಬನ್ನು ಹೊಂದಿರುತ್ತವೆ. ಇವು ನಮ್ಮ ದೇಹದ ಜೀರ್ಣಕಾರಿ ಆರೋಗ್ಯವನ್ನು ಕಾಪಾಡುವಲ್ಲಿ ಸಹಾಯ ಮಾಡುತ್ತವೆ.

ಆರೋಗ್ಯಕರ ಚರ್ಮ ಮತ್ತು ಕೂದಲಿಗೆ ಸಹಾಯಕಾರಿ: ಕಲ್ಲಂಗಡಿ ಬೀಜಗಳಲ್ಲಿ ಪ್ರೋಟೀನ್ ಮತ್ತು ಅಗತ್ಯವಾದ ಕೊಬ್ಬಿನಾಮ್ಲಗಳು ಸಮೃದ್ಧವಾಗಿವೆ. ಇವು ಆರೋಗ್ಯಕರ ಚರ್ಮ ಮತ್ತು ಕೂದಲಿಗೆ ಸಹಾಯಕಾರಿಯಾಗಿದೆ ಎಂದು ತಜ್ಞರು ಹೇಳುತ್ತಾರೆ. ಈ ಪೋಷಕಾಂಶಗಳು ಉರಿಯೂತವನ್ನು ಕಡಿಮೆ ಮಾಡಲು ಮತ್ತು ಮೊಡವೆಗಳನ್ನು ತಡೆಯಲು ಸಹಾಯ ಮಾಡುತ್ತವೆ.

ಮೂಳೆ ಆರೋಗ್ಯಕ್ಕೂ ಸಹಾಯಕಾರಿ: ಬಲವಾದ ಮತ್ತು ಆರೋಗ್ಯಕರ ಮೂಳೆಗಳನ್ನು ಹೊಂದಲು ನಮಗೆ ಕ್ಯಾಲ್ಸಿಯಂ ಬೇಕು. ಕಲ್ಲಂಗಡಿ ಬೀಜಗಳು ಹೇರಳವಾದ ಖನಿಜಾಂಶಗಳನ್ನು ಹೊಂದಿರುತ್ತವೆ ಎಂಬುದು ತಿಳಿದಿರುವ ವಿಷಯವಾಗಿದೆ. ಇವು ಮೂಳೆಯ ಆರೋಗ್ಯವನ್ನು ಕಾಪಾಡುತ್ತವೆ.

ಹಾಗಿದ್ರೆ ಕಲ್ಲಂಗಡಿ ಬೀಜಗಳನ್ನು ಹೇಗೆ ತಿನ್ನಬೇಕು?ನೀವು ಅವುಗಳನ್ನು ಹಾಗೆಯೇ ತಿನ್ನಬಹುದು ಅಥವಾ ಅಡುಗೆಗಳಲ್ಲಿ ಬಳಸಬಹುದು. ಕಲ್ಲಂಗಡಿ ಬೀಜಗಳನ್ನು ಬೇಯಿಸಿ ತಿನ್ನಬಹುದು. ಅವುಗಳ ರುಚಿ ಹೆಚ್ಚಿಸಲು ಉಪ್ಪು ಅಥವಾ ಇತರ ಮಸಾಲೆಗಳನ್ನು ಸೇರಿಸಬಹುದು ಎಂದು ತಜ್ಞರು ಸೂಚಿಸುತ್ತಾರೆ.

ಕಲ್ಲಂಗಡಿ ಬೀಜಗಳನ್ನು ತಿನ್ನಲು ಇರುವ ಇನ್ನೊಂದು ವಿಧಾನವೆಂದರೆ ಅವುಗಳನ್ನು ಪುಡಿಮಾಡಿ ಸಲಾಡ್‌ಗಳು ಅಥವಾ ಇತರ ಪೌಷ್ಟಿಕ ಆಹಾರಗಳ ಮೇಲೆ ಸಿಂಪಡಿಸಿ ತಿನ್ನಬಹುದು.

ಕಲ್ಲಂಗಡಿ ಬೀಜಗಳಲ್ಲಿ ವಿಟಮಿನ್‌ಗಳು, ನಾರಿನಾಂಶಗಳು, ಕೊಬ್ಬುಗಳು ಮತ್ತು ಪ್ರೋಟೀನ್ ಅಂಶಗಳು ಉತ್ತಮವಾಗಿರುವುದರಿಂದ ಅವುಗಳನ್ನು ನೀವು ನಿಯಮಿತವಾಗಿ ಸೇವಿಸಬೇಕು ಎಂದು ಬಿಶ್ಟ್ ಹೇಳುತ್ತಾರೆ. ಆದ್ದರಿಂದ ದೈನಂದಿನ ಬಳಕೆಗಾಗಿ ಸುಮಾರು 30 ಗ್ರಾಂ ಅಥವಾ ಒಂದು ಕಪ್ ಕಲ್ಲಂಗಡಿ ಬೀಜಗಳ ಮೂರನೇ ಒಂದು ಭಾಗದಷ್ಟು ಬೀಜಗಳನ್ನು ಸೇವಿಸಬಹುದು. ಹುರಿದ ಅಥವಾ ಮೊಳಕೆಯೊಡೆದ ಕಲ್ಲಂಗಡಿ ಬೀಜಗಳು ಆರೋಗ್ಯಕರವಾಗಿರುತ್ತವೆ ಏಕೆಂದರೆ ಅವುಗಳು ಜೀರ್ಣಿಸಿಕೊಳ್ಳಲು ಸುಲಭವಾಗಿರುತ್ತವೆ ಮತ್ತು ಹೆಚ್ಚಿನ ಪೋಷಕಾಂಶಗಳನ್ನು ಹೊಂದಿರುತ್ತವೆ.