Eye Health: ಕಣ್ರೆಪ್ಪೆ ಹೊಡೆದುಕೊಳ್ತಿದ್ಯಾ? ಶುಭ, ಅಶುಭ ಬಿಟ್ಟಾಕಿ ಮೆಡಿಕಲ್ ಕಾರಣ ತಿಳ್ಕೊಳ್ಳಿ!

ಸಾಮಾನ್ಯವಾಗಿ ಕಣ್ಣು ಆಗಾಗ ಬಡಿದುಕೊಳ್ಳುವುದನ್ನು ಎಲ್ಲರೂ ಗಮನಿಸಿರುತ್ತೇವೆ. ಕೆಲವೊಮ್ಮೆ ಬಲಗಣ್ಣು ಬಡಿದುಕೊಂಡರೆ, ಮತ್ತೆ ಕೆಲವೊಮ್ಮೆ ಎಡಗಣ್ಣು ಬಡಿದುಕೊಳ್ಳುತ್ತದೆ. ಹೀಗೆ ಯಾರ ಕಣ್ನಾದರೂ ಪಟಪಟನೆ ಬಡಿದುಕೊಂಡರೆ ಶಕುನಗಳಿಗೆ ಸಂಬಂಧಿಸಿರುತ್ತದೆ ಎಂದು ಅನೇಕ ಮಂದಿ ಭಾವಿಸಿದ್ದಾರೆ.

ಕಣ್ಣು ಹೀಗೆ ಬಡಿದುಕೊಳ್ಳುವುದರ ಅರ್ಥ ಒಳ್ಳೆಯದು ಅಥವಾ ಕೆಟ್ಟದು ಆಗಬಹುದು ಎಂದು ನಂಬಲಾಗಿದೆ. ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ ಬಲಗಣ್ಣು ಬಡಿದುಕೊಳ್ಳುವುದು ಪುರುಷರಿಗೆ ಶುಭವೆಂದು ಪರಿಗಣಿಸಲಾಗುತ್ತದೆ. ಇದರಿಂದ ಅವರಿಗೆ ಒಳ್ಳೆಯದಾಗುತ್ತದೆ. ಅವರ ಆಸೆ ಈಡೇರುತ್ತದೆ, ಹಣ ಸಿಗುತ್ತದೆ ಎನ್ನಲಾಗುತ್ತದೆ. ಒಂದು ವೇಳೆ ಎಡಗಣ್ಣು ಬಡಿದುಕೊಂಡರೆ ಹಾನಿಗೊಳಗಾಗುವ ಸಾಧ್ಯತೆ ಇವೆ. ಅವರ ಶತ್ರುವು ಅವರನ್ನು ನೋಯಿಸಬಹುದು ಎಂದು ಹೇಳಲಾಗುತ್ತದೆ.

ಅದೇ ರೀತಿ ಹೆಣ್ಣು ಮಕ್ಕಳಿಗೆ ಎಡಗಣ್ಣು ಪಟಪಟನೆ ಬಡಿದುಕೊಂಡರೆ ಶುಭವೆಂದು ಪರಿಗಣಿಸಲಾಗುತ್ತದೆ. ಇದರಿಂದ ಮಹಿಳೆಯರು ಚಿನ್ನ-ಬೆಳ್ಳಿಯ ಆಭರಣಗಳನ್ನು ಪಡೆಯಬಹುದು. ಎಡಗಣ್ಣು ಬದಲಿಗೆ ಬಲಗಣ್ಣು ಬಡಿಯುತ್ತಿದ್ದರೆ, ಅದು ಆಕೆಗೆ ಅಶುಭ ಸಂಕೇತವಾಗಿದೆ. ಅವರ ಕೆಲಸ ಹದಗೆಡುತ್ತದೆ ಎಂದು ನಂಬಲಾಗಿದೆ.

ನಿಜಕ್ಕೂ ಕಣ್ಣು ಹೊಡೆದುಕೊಳ್ಳುವುದಕ್ಕೂ ಶಕುನಕ್ಕೂ ಸಂಬಂಧವಿದೆಯೋ ಗೊತ್ತಿಲ್ಲ. ಆದರೆ ನಿಮ್ಮ ಆರೋಗ್ಯಕ್ಕಂತೂ ಸಂಬಂಧವಿದೆ. ನಮ್ಮ ಕಣ್ಣುಗಳು ಸಣ್ಣ ಸಣ್ಣ ಸ್ನಾಯುಗಳಿಂದ ಮಾಡಲ್ಪಟ್ಟಿದೆ.

ಕಣ್ಣಿನ ಈ ಸಣ್ಣ ಸ್ನಾಯು ಸಂಕೋಚನದಿಂದ ಕಣ್ಣು ಹೊಡೆದುಕೊಳ್ಳುತ್ತದೆ. ಈ ಸ್ನಾಯುಗಳನ್ನು ವಾಸ್ತವವಾಗಿ ನರಗಳು ನಿಯಂತ್ರಿಸುತ್ತವೆ. ರಕ್ತನಾಳಗಳಲ್ಲಿ ಪ್ರಚೋದನೆ ಉಂಟಾದಾಗ ಕಣ್ಣು ಹೊಡೆದುಕೊಳ್ಳಲಾರಂಭಿಸುತ್ತದೆ.

ವಾಸ್ತವಾಗಿ, ಕಣ್ಣಿನ ಮೇಲೆ ಅಧಿಕ ಒತ್ತಡ, ಆಯಾಸ ಅಥವಾ ಒತ್ತಡ ನಿದ್ರಾ ಹೀನತೆ, ಅಧಿಕ ಪ್ರಕಾಶದ ಬೆಳಕು ಹೊಡೆಯುವುದು, ಕಾಫಿ, ಆಲ್ಕೋಹಾಲ್ ಅಧಿಕ ಸೇವನೆ, ವಾಯು ಮಾಲಿನ್ಯ, ಪೋಷಕಾಂಶಗಳ ಕೊರತೆ, ಡ್ರಗ್ಸ್ ಅಡ್ಡ ಪರಿಣಾಮ, ಮೆಟಾಬಾಲಿಕ್ ಡಿಸಾರ್ಡರ್, ಶರೀರದಲ್ಲಿ ಪೊಟ್ಯಾಶಿಯಂ ಕೊರತೆ ಈ ಎಲ್ಲಾ ಕಾರಣಗಳಿಂದಲೂ ಕಣ್ಣು ಹೊಡೆದುಕೊಳ್ಳಬಹುದು.

(Disclaimer: ಈ ಲೇಖನವು ಅಂತರ್ಜಾಲದಲ್ಲಿ ಲಭ್ಯವಿರುವ ವರದಿಗಳು, ಮಾಹಿತಿಯನ್ನು ಆಧರಿಸಿದೆ. news18ಗೂ ಇದಕ್ಕೂ ಸಂಬಂಧವಿಲ್ಲ ಮತ್ತು ನ್ಯೂಸ್ 18 ಇದಕ್ಕೆ ಜವಾಬ್ದಾರಿಯಲ್ಲ)