Workplace Stress: ಕೆಲಸ ಮಾಡುವ ಸ್ಥಳದಲ್ಲಿ ಒತ್ತಡ ಹೆಚ್ಚಾದ್ರೆ ಈ ಸಮಸ್ಯೆಗಳು ಬರೋದು ಪಕ್ಕಾ!

ಮಾನಸಿಕ ಆರೋಗ್ಯ ಎಂಬುದು ದೈಹಿಕ ಆರೋಗ್ಯದಷ್ಟೇ ಮುಖ್ಯ. ಅದರಲ್ಲೂ ದಿನದ ಹೆಚ್ಚಿನ ಸಮಯ ಕೆಲಸ ಮಾಡುವಂಥ ವರ್ಕ್‌ ಪ್ಲೇಸ್‌ಗಳಲ್ಲಿ ಮಾನಸಿಕ ನೆಮ್ಮದಿ ಬಹಳ ಮುಖ್ಯ. ಅಂದಹಾಗೆ ಇತ್ತೀಚಿನ ವರ್ಷಗಳಲ್ಲಿ, ಕೆಲಸದ ಸ್ಥಳಗಳಲ್ಲಿ ಮಾನಸಿಕ ಆರೋಗ್ಯದ ಕುರಿತಾದ ಚರ್ಚೆಯು ಹೆಚ್ಚು ವೇಗ ಪಡೆದುಕೊಂಡಿದೆ.

ವಿಶ್ವ ಆರೋಗ್ಯ ಸಂಸ್ಥೆಯ (WHO) ಪ್ರಕಾರ, 2019 ರಲ್ಲಿ ಸುಮಾರು 15% ಕೆಲಸ ಮಾಡುವ ವಯಸ್ಸಿನ ವಯಸ್ಕರು ಮಾನಸಿಕ ಅಸ್ವಸ್ಥತೆಯನ್ನು ಹೊಂದಿದ್ದಾರೆಂದು ಅಂದಾಜಿಸಲಾಗಿದೆ. ಕೆಲಸದ ಸ್ಥಳಗಳಲ್ಲಿ ಹೆಚ್ಚಿನ ಒತ್ತಡ, ಆತಂಕ, ಖಿನ್ನತೆ ಮುಂತಾದ ವಿಧಾನಗಳಲ್ಲಿ ಇದು ಪ್ರಕಟವಾಗಬಹುದು. ಗಮನಿಸದೆ ಬಿಟ್ಟರೆ, ಈ ಸಮಸ್ಯೆಗಳು ಕಡಿಮೆ ಉತ್ಪಾದಕತೆ, ಹೆಚ್ಚಿದ ಗೈರುಹಾಜರಿ ಮತ್ತು ಕಡಿಮೆ ಕಾರ್ಯಕ್ಷಮತೆಗೆ ಕಾರಣವಾಗಬಹುದು.

ಕೆಲಸದ ಸ್ಥಳದಲ್ಲಿ ಮಾನಸಿಕ ಆರೋಗ್ಯ ಏಕೆ ಮುಖ್ಯ? ಅನ್ನೋ ಪ್ರಶ್ನೆಗೆ ಉತ್ತರ ಸರಳವಾಗಿದೆ. ಏಕೆಂದರೆ ನಮ್ಮ ಕೆಲಸದ ವಾತಾವರಣವು ನಮ್ಮ ಒಟ್ಟಾರೆ ಯೋಗಕ್ಷೇಮ ಮತ್ತು ಜೀವನದ ಗುಣಮಟ್ಟದ ಮೇಲೆ ಗಮನಾರ್ಹವಾಗಿ ಪರಿಣಾಮ ಬೀರುತ್ತದೆ. ವೃತ್ತಿಯನ್ನು ಆಯ್ಕೆ ಮಾಡುವುದು ಜೀವನದ ಪ್ರಮುಖ ನಿರ್ಧಾರಗಳಲ್ಲಿ ಒಂದಾಗಿದೆ

ಹೌದು, ಮಾನಸಿಕ ಆರೋಗ್ಯ ಸಮಸ್ಯೆಗಳನ್ನು ಎದುರಿಸುತ್ತಿರುವ ಉದ್ಯೋಗಿಗಳು ಸಹೋದ್ಯೋಗಿಗಳೊಂದಿಗೆ ಘರ್ಷಣೆಯನ್ನು ಹೊಂದಬಹುದು. ಜೊತೆಗೆ ಅಂಥವರು ಕಡಿಮೆ ಕೆಲಸ ಮಾಡುವುದರ ಜೊತೆಗೆ ಅವರ ಕೆಲಸದ ಬಗ್ಗೆ ನಕಾರಾತ್ಮಕ ಮನೋಭಾವವನ್ನು ಹೊಂದಿರುತ್ತಾರೆ. ಆದ್ದರಿಂದ ವಿಷಕಾರಿ ಕೆಲಸದ ವಾತಾವರಣ, ಕಡಿಮೆ ನೈತಿಕತೆ ಮತ್ತು ಒಟ್ಟಾರೆ ಉತ್ಪಾದಕತೆಯಲ್ಲಿ ಇಳಿಕೆಗೆ ಕಾರಣವಾಗಬಹುದು.

ಆದ್ದರಿಂದ ಉದ್ಯೋಗದಾತರು ಕೆಲಸದ ಸ್ಥಳದಲ್ಲಿ ಮಾನಸಿಕ ಆರೋಗ್ಯ ಸಮಸ್ಯೆಗಳನ್ನು ಪರಿಹರಿಸಲು ಪೂರ್ವಭಾವಿ ಕ್ರಮಗಳನ್ನು ತೆಗೆದುಕೊಳ್ಳುವುದು ಅತ್ಯಗತ್ಯ. ಬರೀ ವ್ಯಕ್ತಿಯ ಸಲುವಾಗಿ ಮಾತ್ರವಲ್ಲ, ಬದಲಾಗಿ ಒಟ್ಟಾರೆಯಾಗಿ ಕಂಪನಿಯ ಒಳಿತಿಗಾಗಿ ಇದು ಮುಖ್ಯವಾಗಿದೆ.

ಒತ್ತಡ ಹೆಚ್ಚಿಸಬಹುದು ವರ್ಕ್‌ ಫ್ರಮ್‌ ಹೋಮ್‌ ! ಸಾಂಕ್ರಾಮಿಕ ಕೋವಿಡ್‌ ರೋಗವು ಬಂದ ನಂತರದಲ್ಲಿ ಅನೇಕ ಕಂಪನಿಗಳು ತಮ್ಮ ಉದ್ಯೋಗಿಗಳಿಗೆ ವರ್ಕ್‌ ಫ್ರಮ್‌ ಹೋಮ್‌ ಆಪ್ಶನ್‌ ನೀಡಿದವು. ಅನೇಕ ಕಂಪನಿಗಳು ಆಫೀಸನ್ನೇ ಮುಚ್ಚಿದವು. ಆದರೆ ಮನೆಯಿಂದ ಮಾಡುವಂಥ ಕೆಲಸವು ಹೆಚ್ಚು ಫ್ಲೆಕ್ಸಿಬಲ್‌ ಆಗಿದ್ದರೂ ಅದು ಕೆಲವು ಉದ್ಯೋಗಿಗಳಿಗೆ ಹೆಚ್ಚಿದ ಒತ್ತಡಕ್ಕೆ ಕಾರಣವಾಗಬಹುದು.

ಮನೆಯಿಂದ ಕೆಲಸ ಮಾಡುವುದರಿಂದ ಕೆಲಸ ಮತ್ತು ವೈಯಕ್ತಿಕ ಜೀವನವನ್ನು ಪ್ರತ್ಯೇಕಿಸಲು ಕೆಲಸವರಿಗೆ ಸಾಧ್ಯವಾಗದೇ ಇರಬಹುದು. ಆರೋಗ್ಯಕರ ಕೆಲಸ-ಜೀವನದ ಸಮತೋಲನವನ್ನು ಕಾಪಾಡಿಕೊಳ್ಳುವುದು ಸವಾಲಾಗಬಹುದು.

ಮತ್ತೊಂದೆಡೆ, ಕಚೇರಿಗೆ ಹಿಂತಿರುಗುವುದು ಕೂಡ ಕೆಲವು ಉದ್ಯೋಗಿಗಳಿಗೆ ಒತ್ತಡ ಹೆಚ್ಚಿಸಬಹುದು. ವಿಶೇಷವಾಗಿ ಅವರು ವರ್ಕ್‌ ಫ್ರಮ್‌ ಹೋಮ್‌ಗೆ ಒಗ್ಗಿಕೊಂಡಿದ್ದರೆ.... ಕಂಪನಿಗಳು ಇಂಥ ಸವಾಲುಗಳ ಬಗ್ಗೆ ತಿಳಿದಿರಬೇಕು ಮತ್ತು ಉದ್ಯೋಗಿಗಳಿಗೆ ಕಚೇರಿಗೆ ಮರಳಲು ಬೆಂಬಲವನ್ನು ಒದಗಿಸಬೇಕು.