ಈ ಜ್ಯೂಸ್ ಕುಡಿಯುವುದರಿಂದ ನಿಮ್ಮ ದೇಹದ ರೋಗ ನಿರೋಧಕ ಶಕ್ತಿ ಹೆಚ್ಚಿಸಬಹುದು

ಒಂದೆಡೆ ಹವಾಮಾನ ಬದಲಾವಣೆ, ಮತ್ತೊಂದೆಡೆ ಅನಾರೋಗ್ಯ. ಏನು ತಿನ್ನಬೇಕು, ಏನು ಕುಡಿಯಬೇಕು ಎಂಬುದೇ ಜನಸಾಮಾನ್ಯರ ಚಿಂತೆ.

ಪ್ರಸ್ತುತ ಹವಾಮಾನ ವೈಪರಿತ್ಯದಿಂದ ಜ್ವರ, ಶೀತ, ಕೆಮ್ಮು ಸಾಮಾನ್ಯವಾಗಿದೆ. ಇಂತಹ ರೋಗಗಳ ವಿರುದ್ಧ ಹೋರಾಡಬೇಕಿದ್ದರೆ ದೇಹದಲ್ಲಿ ರೋಗ ನಿರೋಧಕ ಶಕ್ತಿ ಅತ್ಯಗತ್ಯ.

ಹೀಗಾಗಿಯೇ ವಿಟಮಿನ್ ಸಿ ಹೊಂದಿರುವ ಆಹಾರ, ತರಕಾರಿಗಳು ಮತ್ತು ಹಣ್ಣುಗಳನ್ನು ಹೆಚ್ಚಾಗಿ ಸೇವಿಸಬೇಕಾಗುತ್ತದೆ. ಅದರಲ್ಲೂ ಇದೀಗ ಬೇಸಿಗೆ ಬೇರೆ. ದಾಹವಂತು ಎಲ್ಲರಲ್ಲೂ ಇದೆ. ಹೀಗಾಗಿಯೇ ರೋಗ ನಿರೋಧಕ ಶಕ್ತಿಯನ್ನು ಹೆಚ್ಚಿಸುವ ಜ್ಯೂಸ್ ವೊಂದರ ಬಗ್ಗೆ ಇಲ್ಲಿ ತಿಳಿಸಲಾಗಿದೆ.

ಈ ರಸ ಕೆಮ್ಮು, ಶೀತ ಅಥವಾ ಜ್ವರದಿಂದ ಬಳಲುತ್ತಿರುವವರಿಗೆ ತುಂಬಾ ಪ್ರಯೋಜನಕಾರಿ. ಇದನ್ನು ತಯಾರಿಸಲು ಬೇಕಿರುವುದು ನೆಲ್ಲಿಕಾಯಿ, ಶುಂಠಿ, ಪುದೀನ ಎಲೆಗಳು, ಕೊತ್ತಂಬರಿ ಸೊಪ್ಪು.

ಕೊತ್ತಂಬರಿ ಮತ್ತು ಪುದೀನ ಎಲೆಗಳಲ್ಲಿ ವಿಟಮಿನ್ ಸಿ ಹೇರಳವಾಗಿರುತ್ತದೆ. ಪುದೀನದಲ್ಲಿ ಉತ್ಕರ್ಷಣ ನಿರೋಧಕ ಮತ್ತು ಉರಿಯೂತ ನಿರ್ವಹಣ ಗುಣಗಳನ್ನು ಹೊಂದಿದೆ. ಇದು ಶೀತ, ಕೆಮ್ಮಿನಿಂದ ಉಂಟಾಗುವ ಕಿರಿಕಿರಿಯನ್ನು ನಿವಾರಿಸಲು ಸಹಾಯ ಮಾಡುತ್ತದೆ.

ಹಾಗೆಯೇ ಕೊತ್ತಂಬರಿಯಲ್ಲೂ ಉತ್ಕರ್ಷಣ ನಿರೋಧಕಗಳು ಕಂಡುಬರುತ್ತವೆ. ನಿರ್ವಿಶೀಕರಣ (ರಕ್ತವನ್ನು ಶುದ್ಧೀಕರಿಸುವುದು), ಆಂಟಿ ಬ್ಯಾಕ್ಟೀರಿಯಲ್ ಮತ್ತು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುವ ಅಂಶಗಳು ಕೊತ್ತಂಬರಿ ಸೊಪ್ಪಿನಲ್ಲಿ ಇರುತ್ತವೆ.

ಇನ್ನು ನೆಲ್ಲಿಕಾಯಿಯನ್ನು ಆಹಾರದಲ್ಲಿ ನಿಯಮಿತವಾಗಿ ಬಳಸುವುದರಿಂದ ದೇಹದಲ್ಲಿನ ಬಿಳಿ ರಕ್ತ ಕಣಗಳ ಸಂಖ್ಯೆಯನ್ನು ಹೆಚ್ಚಿಸಬಹುದು. ಇದು ದೇಹವು ಸೋಂಕುಗಳು ಮತ್ತು ರೋಗಗಳ ವಿರುದ್ಧ ಹೋರಾಡಲು ಸಹಾಯ ಮಾಡುತ್ತದೆ.

ನೆಲ್ಲಿಕಾಯಿಯಲ್ಲಿ ಕಬ್ಬಿಣಾಂಶ, ಕ್ಯಾಲ್ಸಿಯಂ ಅಗರವಾಗಿರುತ್ತದೆ. ಅದೇ ರೀತಿ ಶುಂಠಿಯಲ್ಲಿ ಜಿಂಜರಾಲ್ ಅಂಶವಿದ್ದು, ಇದು ನೋವು ನಿವಾರಕ, ನಿದ್ರಾಜನಕ, ಆಂಟಿಪೈರೆಟಿಕ್ ಮತ್ತು ಬ್ಯಾಕ್ಟೀರಿಯಾ ವಿರೋಧಿ ಗುಣಗಳನ್ನು ಹೊಂದಿದೆ. ಹಾಗೆಯೇ ಶುಂಠಿ ರಕ್ತದಲ್ಲಿನ ಸಕ್ಕರೆ ನಿಯಂತ್ರಣಕ್ಕೆ ಉತ್ತಮವೆಂದು ಪರಿಗಣಿಸಲಾಗುತ್ತದೆ.

ಇವುಗಳೆನ್ನೆಲ್ಲಾ ಸೇರಿಸಿ ಹೇಗೆ ಜ್ಯೂಸ್ ತಯಾರಿಸುವುದು?

- ನೆಲ್ಲಿಕಾಯಿ, ಶುಂಠಿ, ಕೊತ್ತಂಬರಿ ಸೊಪ್ಪು, ಪುದೀನ ಎಲೆಗಳನ್ನು ನೀರಿನಿಂದ ತೊಳೆಯಿರಿ. ಆ ಬಳಿಕ ಜ್ಯೂಸರ್‌ನಲ್ಲಿ ಇವುಗಳನ್ನು ಒಟ್ಟಿಗೆ ಬೆರೆಸಿ ರಸವನ್ನು ತೆಗೆಯಿರಿ.

- ಈಗ ಈ ರಸಕ್ಕೆ ಉಪ್ಪು, ಜೇನುತುಪ್ಪ ಅಥವಾ ಹುರಿದ ಜೀರಿಗೆ ಸೇರಿಸಿ ಮತ್ತು ಕುಡಿಯಿರಿ. ಈ ರಸವನ್ನು ನಿಯಮಿತವಾಗಿ ಸೇವಿಸುವುದರಿಂದ ದೇಹದ ರೋಗನಿರೋಧಕ ಶಕ್ತಿ ಹೆಚ್ಚಾಗುತ್ತದೆ ಮತ್ತು ನಿಮಗೆ ಅನಾರೋಗ್ಯ ಸಮಸ್ಯೆ ದೂರವಾಗುತ್ತದೆ.

ಅದಾಗ್ಯೂ, ಕಫ, ಗಂಟಲು ನೋವು ಹೊಂದಿರುವವರು ಈ ಜ್ಯೂಸ್​ನ್ನು ಸೇವಿಸದಿರಿ. ನೆಲ್ಲಿಕಾಯಿ ಮತ್ತು ಪುದೀನಾ ತಂಪಾಗಿರುತ್ತದೆ. ಇದು ಕಫ, ನೋಯುತ್ತಿರುವ ಗಂಟಲಿನ ಸಮಸ್ಯೆಯನ್ನು ಹೆಚ್ಚಿಸುತ್ತದೆ.