Orange Blossom: ಕಿತ್ತಳೆ ಹಣ್ಣಿನಿಂದ ಮಾತ್ರ ಅಲ್ಲ ಅದರ ಹೂವಿನಿಂದ ಸಹ ಇದೆ ಸಾವಿರ ಪ್ರಯೋಜನ

ಟೋನರ್ ಆಗಿ ಬಳಸಬಹುದು: ನೀವು ಕಿತ್ತಳೆ ಹೂವಿನ ನೀರನ್ನು ಮಾಡಿಕೊಂಡು ಅದನ್ನು ಟೋನರ್ ರೀತಿ ಸಹ ಬಳಕೆ ಮಾಡಬಹುದು. ಸ್ವಲ್ಪ ಹೂವುಗಳನ್ನು ತೆಗೆದುಕೊಂಡು, ಅದನ್ನು ನೀರಿನಲ್ಲಿ ಹಾಕಿ ಚೆನ್ನಾಗಿ ಕುದಿಸಿ, ಪೂರ್ತಿ ತಣ್ಣಗಾದ ನಂತರ ಸ್ಪ್ರೇ ಬಾಟಲಿಗೆ ಹಾಕಿ ನಿಮಗೆ ಬೇಕಾದಾಗ ಬಳಕೆ ಮಾಡಬಹುದು.

ತ್ವಚೆಯನ್ನು ಮೃದುಗೊಳಿಸುತ್ತದೆ: ಈ ಕಿತ್ತಳೆ ಹೂವಿನ ನೀರನ್ನು ರೋಸ್​ ವಾಟರ್ ರೀತಿ ಸಹ ಬಳಕೆ ಮಾಡಬಹುದು. ನೀವು ರಾತ್ರಿ ಮಲಗುವಾಗ ಹತ್ತಿಯಲ್ಲಿ ಇದನ್ನು ಮುಖಕ್ಕೆ ಹಚ್ಚಿ ಬಿಡಿ. ನಿಮ್ಮ ಚರ್ಮ ಬಹಳ ಮೃದುವಾಗುತ್ತದೆ.

ದೇಹವನ್ನು ರಿಫ್ರೆಶ್​ ಮಾಡುತ್ತದೆ: ಕೆಲಸದ ಕಾರಣದಿಂದ ನಮ್ಮ ದೇಹಕ್ಕೆ ಬಹಳ ಆಯಾಸ ಆಗುತ್ತದೆ. ಅದಕ್ಕೆ ಈ ಕಿತ್ತಳೆ ಹೂವಿನ ನೀರು ಪ್ರಯೋಜನ ನೀಡುತ್ತದೆ. ನಿಮ್ಮ ಸ್ನಾನದ ನೀರಿನಲ್ಲಿ ಈ ಇದನ್ನು ಮಿಶ್ರಣ ಮಾಡಿದರೆ ದೇಹ ರಿಫ್ರೆಶ್​ ಆಗುತ್ತದೆ. ಅರೋಮಾ ಥೆರಪಿಯಲ್ಲಿ ಸಹ ಇದನ್ನು ಬಳಸಲಾಗುತ್ತದೆ.

ಅಜೀರ್ಣ ಸಮಸ್ಯೆಗೆ ಪರಿಹಾರ: ಈ ಕಿತ್ತಳೆ ಹೂವು ಸಹ ಹಣ್ಣಿನಂತೆಯೇ ಹಲವು ಪೋಷಕಾಂಶಗಳನ್ನು ಹೊಂದಿದ್ದು, ಅಜೀರ್ಣ ಸಮಸ್ಯೆಯಿಂದ ಮುಕ್ತಿ ನೀಡುತ್ತದೆ. ಅದರಲ್ಲೂ ಮಕ್ಕಳಲ್ಲಿ ಕಾಡುವ ಹೊಟ್ಟೆ ನೋವಿಗೆ ಇದು ಮನೆಮದ್ದು ಎನ್ನಬಹುದು.

ಉಗುರಿನ ಆರೋಗ್ಯಕ್ಕೆ: ಉಗುರಿನ ಆರೋಗ್ಯವನ್ನು ಸಹ ಕಾಪಾಡಿಕೊಳ್ಳುವುದು ಬಹಳ ಮುಖ್ಯ. ಅದರಲ್ಲೂ ಈ ನೈಲ್​ ಪಾಲಿಶ್​ ಹಾಗೂ ರಿಮೂವರ್ ಬಳಕೆ ಮಾಡುವುದರಿಂದ ಉಗುರು ಹಾಳಾಗುತ್ತದೆ. ಅದಕ್ಕೆ ನೀವು ಕಿತ್ತಳೆ ಹೂವಿನ ನೀರಿನಲ್ಲಿ ಉಗುರುಗಳನ್ನು ಆಗಾಗ ನೆನೆಸಿಡುವುದು ಸಹಾಯ ಮಾಡುತ್ತದೆ.

ಕೂದಲಿನ ಬೆಳವಣಿಗೆಗೆ: ಈ ಕಿತ್ತಳೆ ಹೂವಿನ ನೀರು ನಿಮ್ಮ ಕೂದಲಿನ ಬೆಳವಣಿಗೆಗೆ ಸಹ ಸಹಾಯ ಮಾಡುತ್ತದೆ. ತಲೆಸ್ನಾನ ಮಾಡುವಾಗ ಶಾಂಪೂ ಹಾಕುವ ಮುನ್ನ ಕಿತ್ತಳೆ ಹೂವಿನ ನೀರನ್ನು ಹಚ್ಚಿ ಅಥವಾ ತಲೆಸ್ನಾನಕ್ಕೂ 30 ನಿಮಿಷ ಮೊದಲು ಈ ನೀರನ್ನು ಹಚ್ಚಿ ದರೆ ಕೂದಲು ಉದುರುವುದು ನಿಲ್ಲುತ್ತದೆ.

ತುರಿಕೆ ಹೋಗಲಾಡಿಸುತ್ತದೆ: ಚರ್ಮದ ಸಮಸ್ಯೆಗಳಿಗೆ ಸಹ ಈ ಕಿತ್ತಳೆ ನೀರು ಪ್ರಯೋಜನ ನೀಡುತ್ತದೆ. ನಿಮಗೆ ತುರಿಕೆ ಆಗುತ್ತಿದ್ದರೆ ಅಥವಾ ಅಲರ್ಜಿ ಆಗಿದ್ದರೆ ಹತ್ತಿಯಲ್ಲಿ ಈ ನೀರನ್ನು ಹಚ್ಚಿದರೆ ಸಾಕು.

ಸಾಕು ಪ್ರಾಣಿಗಳಿಗೆ: ನಿಮ್ಮ ಸಾಕು ಪ್ರಾಣಿಗಳಿಗೆ ಗಾಯವಾಗಿದ್ದರೆ ಈ ಕಿತ್ತಳೆ ನೀರು ಹಚ್ಚಿ. ಸಣ್ಣ ಪುಟ್ಟ ಗಾಯಗಳನ್ನು ಬೇಗ ಗುಣಪಡಿಸುವ ಶಕ್ತಿ ಈ ನೀರಿಗಿದೆ.