World Obesity Day: ಡಯೆಟ್​, ವ್ಯಾಯಾಮ ಏನೇ ಮಾಡಿದ್ರೂ ಸಣ್ಣ ಆಗ್ತಿಲ್ವಾ? ಹಾಗಾದ್ರೆ ಈ ಟಿಪ್ಸ್​ ಫಾಲೋ ಮಾಡಿ!

ತೂಕ ಇಳಿಕೆಗೆ ಬೇಕಾದ ಎಲ್ಲಾ ರೀತಿಯ ಪ್ರಯತ್ನಗಳನ್ನು ಮಾಡಿದ ನಂತರವೂ ತೂಕ ನಷ್ಟವಾಗದೇ ಹೋದರೆ, ನೀವು ನಿಮ್ಮ ಒಟ್ಟಾರೆ ಆರೋಗ್ಯದ ಬಗ್ಗೆ ಗಮನಹರಿಸಬೇಕಾಗುತ್ತದೆ. ಪ್ರತೀ ತಿಂಗಳು ನಿಮ್ಮ ತೂಕ ಹೆಚ್ಚುತ್ತಿದ್ದರೆ ವೈದ್ಯರನ್ನು ಸಂಪರ್ಕಿಸಿ. ಜಂಕ್ ಫುಡ್, ಅನಾರೋಗ್ಯಕರ ಜೀವನಶೈಲಿಯಲ್ಲಿ ಉತ್ತಮ ಬದಲಾವಣೆ ಮಾಡಿ.

ಅದಾಗ್ಯೂ ವಿಶೇಷವಾಗಿ ಮಹಿಳೆಯರು ಹೆಚ್ಚು ಸ್ಥೂಲಕಾಯ ಸಮಸ್ಯೆ ಎದುರಿಸುತ್ತಾರೆ. ಕೆಲವು ಕಾರಣಗಳಿಂದ ಸ್ಥೂಲಕಾಯ ಸಮಸ್ಯೆ ಉಂಟಾಗುತ್ತದೆ. ಮಹಿಳೆಯರಲ್ಲಿ ಬೊಜ್ಜು ಹೆಚ್ಚಾಗಲು ಮೊದಲ ಕಾರಣವೆಂದರೆ ಅತಿಯಾದ ಆಹಾರ ಸೇವನೆ. ಆಹಾರ ಕ್ರಮ ಸರಿಯಾಗಿರದೇ ಹೋದಾಗ ಸ್ಥೂಲಕಾಯ ಸಮಸ್ಯೆ ಹೆಚ್ಚುತ್ತದೆ.

ವಯಸ್ಕರು ಮತ್ತು ಮಕ್ಕಳಲ್ಲಿ ಸ್ಥೂಲಕಾಯ ಹೆಚ್ಚಾಗಲು ದೈಹಿಕ ಚಟುವಟಿಕೆಯ ಕೊರತೆ ಕಾರಣವಾಗಿದೆ. ಕಚೇರಿಯಲ್ಲಿ ಕಂಪ್ಯೂಟರ್ ಮುಂದೆ ಗಂಟೆಗಟ್ಟಲೆ ಕೂರುವುದು, ದೀರ್ಘಕಾಲ ಕುಳಿತು ಮೊಬೈಲ್, ಟಿವಿ ನೋಡುವುದು ಯಾವುದೇ ದೈಹಿಕ ಚಟುವಟಿಕೆ ಇಲ್ಲದೇ ಇರುವುದು ತೂಕ ಹೆಚ್ಚಿಸುತ್ತದೆ. ಮಕ್ಕಳು ಹೆಚ್ಚು ಜಂಕ್ ಫುಡ್, ಚಿಪ್ಸ್, ಫಿಂಗರ್ ಚಿಪ್ಸ್, ಪಿಜ್ಜಾ ಸೇವಿಸುವುದು ತೂಕ ಹೆಚ್ಚಳಕ್ಕೆ ಕಾರಣವಾಗಿದೆ.

ದೇಹದಲ್ಲಿ ಹೆಚ್ಚಿನ ಪ್ರಮಾಣದ ಕೆಟ್ಟ ಕೊಬ್ಬು ಸಂಗ್ರಹವಾದಾಗ ದೇಹ ಉಬ್ಬುತ್ತದೆ. ಇದು ಅನೇಕ ಆರೋಗ್ಯ ತೊಡಕುಗಳಿಗೆ ಕಾರಣವಾಗುತ್ತದೆ. ಸಾಕಷ್ಟು ನಿದ್ರೆ ಮಾಡದಿರುವುದು, ಗರ್ಭಧಾರಣೆ, ಪಿಸಿಓಎಸ್ ಸಮಸ್ಯೆ, ಸ್ತ್ರೀ ಸಂತಾನೋತ್ಪತ್ತಿ ಹಾರ್ಮೋನುಗಳ ಅಸಮತೋಲನ, ಹೈಪೋಥೈರಾಯ್ಡಿಸಮ್, ಔಷಧಿಗಳು, ಒತ್ತಡ ಮತ್ತು ಅಸ್ಥಿಸಂಧಿವಾತ ಬೊಜ್ಜು ಸಮಸ್ಯೆ ಹೆಚ್ಚಿಸುತ್ತದೆ.

ಅಗತ್ಯಕ್ಕಿಂತ ಹೆಚ್ಚು ಕ್ಯಾಲೊರಿ ಸೇವಿಸುವುದು ಬೊಜ್ಜು ಹೆಚ್ಚಿಸುತ್ತದೆ. ಆರೋಗ್ಯಕರ ತೂಕ ಕಾಪಾಡಿಕೊಳ್ಳುವುದು ಉತ್ತಮ. ಕೆಟ್ಟ ಆಹಾರ ಪದ್ಧತಿಯನ್ನು ಬಿಟ್ಟು ಉತ್ತಮ ಆರೋಗ್ಯಕರ ಆಹಾರ ಸೇವಿಸುವುದು ತೂಕ ನಷ್ಟಕ್ಕೆ ಸಹಾಯ ಮಾಡುತ್ತದೆ. ಸಂಸ್ಕರಿಸಿದ ಆಹಾರ ಮತ್ತು ತ್ವರಿತ ಆಹಾರ ಸೇವನೆಯು ಕೊಬ್ಬು ಮತ್ತು ಸಕ್ಕರೆ ಹೆಚ್ಚಿರುತ್ತದೆ. ಇದು ತೂಕ ಹೆಚ್ಚಿಸುತ್ತದೆ.

ವ್ಯಾಯಾಮ ಮತ್ತು ಸರಿಯಾದ ಆಹಾರದ ನಂತರವೂ ತೂಕ ನಷ್ಟವಾಗದೇ ಹೋದರೆ ಅದಕ್ಕೆ ಋತುಬಂಧದಲ್ಲಿ ಉಂಟಾಗುವ ಹಾರ್ಮೋನುಗಳ ಬದಲಾವಣೆ ಕಾರಣವಾಗಬಹುದು. ಇದು ಹೊಟ್ಟೆಯ ಸುತ್ತ ತೂಕ ಹೆಚ್ಚಿಸುತ್ತದೆ. ವಯಸ್ಸಾದ ಮೇಲೆ ಹಾಗೂ ಜೀವನಶೈಲಿ ಮತ್ತು ಆನುವಂಶಿಕ ಅಂಶಗಳು ತೂಕ ಹೆಚ್ಚಳಕ್ಕೆ ಕಾರಣವಾಗಿವೆ.

ಎಂಡೊಮೆಟ್ರಿಯೊಸಿಸ್ ಸಹ ತೂಕ ಹೆಚ್ಚಳಕ್ಕೆ ಕಾರಣ ಎನ್ನುತ್ತೆ ಒಂದು ಸಂಶೋಧನೆ. ಇದರ ಪ್ರಕಾರ ಜನರು ತೂಕ ಹೆಚ್ಚಾಗುವುದು ಮತ್ತು ವಾಯು ಸಮಸ್ಯೆಗೆ ಎಂಡೊಮೆಟ್ರಿಯೊಸಿಸ್ ಕಾರಣ. ಇದು ತೂಕ ಹೆಚ್ಚಾಗಲು ಅಥವಾ ತೂಕ ಕಳೆದುಕೊಳ್ಳುವಲ್ಲಿ ತೊಂದರೆಗೆ ಕಾರಣವಾಗುತ್ತದೆ.

ಹೈಪೋಥೈರಾಯ್ಡಿಸಮ್ ಕೂಡ ತೂಕ ಹೆಚ್ಚಳಕ್ಕೆ ಕಾರಣ. ಥೈರಾಯ್ಡ್ ಮಟ್ಟವು ಕಡಿಮೆಯಾದರೆ ಚಯಾಪಚಯ ನಿಧಾನಗೊಳ್ಳುತ್ತದೆ. ನಂತರ ದೇಹದ ಕೊಬ್ಬು ನಿಧಾನವಾಗಿ ಶಕ್ತಿಯಾಗಿ ಪರಿವರ್ತನೆಯಾಗುತ್ತದೆ. ಇದು ತೂಕ ಹೆಚ್ಚಿಸುತ್ತದೆ. ಇನ್ನು ಕೆಲವು ಜೀನ್‌ಗಳು ಬೊಜ್ಜು ಮತ್ತು ಅಧಿಕ ತೂಕಕ್ಕೆ ಕಾರಣವಾಗಿವೆ. ಇದು ಜೀವನಶೈಲಿಯ ಆಯ್ಕೆಗಳ ಮೇಲೆ ಪ್ರಭಾವ ಬೀರುತ್ತದೆ. ಸ್ಥೂಲಕಾಯಕ್ಕೆ ಕಾರಣವಾಗುತ್ತದೆ.