Actor Shaam: ಚೆನ್ನೈನಲ್ಲಿ ಖ್ಯಾತ ನಟ ಶಾಮ್ ಅರೆಸ್ಟ್​..!

ಲಾಕ್​ಡೌನ್ ನಿಯಮ ಮೀರಿ ಗುಂಪು ಸೇರಿಕೊಂಡು ಜೂಜಾಟ ನಡೆಸುತ್ತಿದ್ದ ಬಹುಭಾಷಾ ನಟ ಶಾಮ್ ಸೇರಿದಂತೆ 12 ಮಂದಿಯನ್ನು ಚೆನ್ನೈ ಪೊಲೀಸರು ಬಂಧಿಸಿದ್ದಾರೆ.

ಇಂದು ನುಂಗಮ್​ಬಕಮ್​ನಲ್ಲಿರುವ ಅಪಾರ್ಟ್​ಮೆಂಟ್​ನಲ್ಲಿ  ಶಾಮ್ ಅಲ್ಲದೆ, ಚಿತ್ರರಂಗದ ಕೆಲವು ಕಲಾವಿದರು ಸೇರಿ ಜೂಜಾಡುತ್ತಿದ್ದರು. ಈ ಬಗ್ಗೆ ಖಚಿತ ಮಾಹಿತಿ ಪಡೆದ ಪೊಲೀಸರು ದಿಢೀರ್ ದಾಳಿ ನಡೆಸಿ ಎಲ್ಲರನ್ನು ವಶಕ್ಕೆ ಪಡೆದಿದ್ದಾರೆ.

ಒಂದು ಮೂಲದ ಪ್ರಕಾರ ಜೂಜಾಟದಲ್ಲಿ ಕಾಲಿವುಡ್​ನ ಖ್ಯಾತನಾಮರೂ ಕೂಡ ಇದ್ದು, ನಟರೊಬ್ಬರು ಲಕ್ಷಾಂತರ ರೂ ಕಳೆದುಕೊಂಡಿದ್ದಾರಂತೆ. ಇದೇ ವಿಷಯವಾಗಿ ಜೂಜಾಡುತ್ತಿರುವ ವಿಷಯ ಬಹಿರಂಗವಾಗಿದೆ ಎನ್ನಲಾಗಿದೆ.

ಇನ್ನು ಈ ಜೂಜಾಟಕ್ಕೆ ಹಣದ ರೂಪದಲ್ಲಿ ಟೋಕನ್ ಗಳನ್ನು ಬಳಸಲಾಗಿತ್ತು. ಹೀಗಾಗಿ ಪ್ರತಿ ಟೋಕನ್​ಗೆ ಎಷ್ಟು ಮೌಲ್ಯವಿಡಲಾಗಿದೆ ಎಂಬುದು ವಿಚಾರಣೆ ಬಳಿಕ ಬಹಿರಂಗವಾಗಲಿದೆ.

ಲಕ್ಷಾಂತರ ಮೌಲ್ಯದ ಜೂಜಾಟ ನಡೆದಿರುವ ಸಾಧ್ಯತೆಯಿದ್ದು, ಹೀಗಾಗಿ ಟೋಕನ್​ಗಳನ್ನು ಬಳಸಲಾಗಿದೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ. ಒಟ್ಟಿನಲ್ಲಿ ಚಿತ್ರರಂಗದಲ್ಲಿ ಪೊಲೀಸ್ ರೋಲ್​ಗಳ ಮೂಲಕ ಒಂದಷ್ಟು ಹೆಸರುಗಳಿಸಿದ್ದ ನಟ ಶಾಮ್ ಇದೀಗ ಜೂಜಾಟದೊಂದಿಗೆ ಸುದ್ದಿಯಾಗಿರುವುದು ವಿಪರ್ಯಾಸ.

ತಮಿಳು ಚಿತ್ರರಂಗದಲ್ಲಿ ಗುರುತಿಸಿಕೊಂಡಿರುವ ಶಾಮ್, ಕನ್ನಡ, ತಮಿಳು ಮತ್ತು ಮಲಯಾಳಂ ಭಾಷೆಯಲ್ಲೂ ಅಭಿನಯಿಸಿದ್ದಾರೆ. ಇನ್ನು ಕನ್ನಡದಲ್ಲಿ ಕಾಲಿವುಡ್​ ನಟ ನಾಲ್ಕು ಚಿತ್ರಗಳಲ್ಲಿ ಬಣ್ಣ ಹಚ್ಚಿದ್ದಾರೆ.

ರಮ್ಯಾ-ರಕ್ಷಿತಾ ಜೋಡಿ ಜೊತೆಯಾಗಿ ಕಾಣಿಸಿಕೊಂಡ ತನನಂ ತನನಂ ಚಿತ್ರದ ಮೂಲಕ ಶಾಮ್ ಸ್ಯಾಂಡಲ್​ವುಡ್​ಗೆ ಎಂಟ್ರಿ ಕೊಟ್ಟಿದ್ದರು. ಇದರ ಬಳಿಕ ಅರ್ಜುನ್ ಸರ್ಜಾ ಅಭಿನಯದ ಗೇಮ್ ಸಿನಿಮಾದಲ್ಲೂ ಪ್ರಮುಖ ಪಾತ್ರ ನಿರ್ವಹಿಸಿದ್ದರು.

ಹಾಗೆಯೇ ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಸಂತು ಸ್ಟ್ರೈಟ್ ಫಾರ್ವಡ್ ಚಿತ್ರದಲ್ಲಿ ಶಾಮ್ ನೆಗೆಟಿವ್ ರೋಲ್​ನಲ್ಲಿ ಅಬ್ಬರಿಸಿದ್ದರು. ಸದ್ಯ ಯುಎ ಹೆಸರಿನ ಕನ್ನಡ ಚಿತ್ರದಲ್ಲೂ ಶಾಮ್ ಬಣ್ಣ ಹಚ್ಚುತ್ತಿದ್ದಾರೆ.

ಶಾಮ್