Relationship Tips: ನಿಮಗೆ ಬೇಕಾಗಿದ್ದನ್ನು ನಿಮ್ಮ ಸಂಗಾತಿಯ ಬಳಿ ಕೇಳೋದಕ್ಕೆ ಮುಜುಗರ ಆಗ್ತಾ ಇದ್ಯಾ? ಕಾರಣಗಳು ಹೀಗಿವೆ ನೋಡಿ

ದೈನಂದಿನ ಜೀವನದಲ್ಲಿ ನಿಮ್ಮ ಅಗತ್ಯತೆಗಳನ್ನು ಪೂರೈಸಿಕೊಳ್ಳಬೇಕಾದರೆ, ಮೊದಲಿಗೆ ನೀವು ಅವುಗಳನ್ನು ನಿಮ್ಮ ಆಪ್ತರ ಬಳಿ ಮುಕ್ತವಾಗಿ ಹೇಳಿಕೊಳ್ಳಬೇಕು. ಅನಂತರವಷ್ಟೆ ನಿಮ್ಮ ಅಗತ್ಯತೆಗಳನ್ನು ನೀವು ಪೂರೈಸಿಕೊಳ್ಳಲು ಸಾಧ್ಯವಾಗಬಹುದು. ಮದುವೆಗೂ ಮುಂಚೆ ಮಕ್ಕಳು ತಮ್ಮ ಅಗತ್ಯತೆಗಳನ್ನು ಅವರ ಪೋಷಕರ ಬಳಿ ಹೇಳಿಕೊಳ್ಳುವ ಹಾಗೆ ಮದುವೆಯಾದ ನಂತರದಲ್ಲಿ ತಮ್ಮ ಸಂಗಾತಿಯ ಮುಂದೆ ತಮ್ಮ ಅಗತ್ಯತೆಗಳ ಬಗ್ಗೆ ಮುಕ್ತವಾಗಿ ಹೇಳಿಕೊಳ್ಳಲು ಎಷ್ಟೋ ಜನರು ಹಿಂಜರಿಯುತ್ತಾರೆ.

ಹೌದು, ಅನೇಕ ಸಂಗಾತಿಗಳು ತಮ್ಮ ಅಗತ್ಯತೆಗಳನ್ನು ಮುಕ್ತವಾಗಿ ತಮ್ಮ ಸಂಗಾತಿಯ ಮುಂದೆ ಹೇಳಿಕೊಂಡರೆ, ಎಲ್ಲಿ ಏನೆಂದು ಹೇಳುತ್ತಾರೆಯೋ ಅನ್ನೋ ಭಯದಿಂದ ಅದನ್ನು ಮರೆಮಾಚುತ್ತಾರೆ. ಹೀಗೆ ತಮ್ಮ ಅಗತ್ಯತೆಗಳನ್ನು ಹೇಳಿಕೊಳ್ಳದೆ ಇರುವುದಕ್ಕೆ ಇನ್ನೂ ಅನೇಕ ಕಾರಣಗಳಿವೆ.

ಈ ವಿಷಯದ ಬಗ್ಗೆ ಸಂಬಂಧ ತಜ್ಞರು ಹೇಳುವುದೇನು ನೋಡಿ: “ಸಾಮಾನ್ಯವಾಗಿ ಆರೋಗ್ಯಕರ ಸಂಬಂಧಗಳಲ್ಲಿ, ಇಬ್ಬರು ಸಂಗಾತಿಗಳು ಪರಸ್ಪರರ ಅಗತ್ಯತೆಗಳನ್ನು ಪೂರೈಸಲು ಬಯಸುತ್ತಾರೆ ಮತ್ತು ಮುಕ್ತವಾಗಿ ಹೇಳಿಕೊಳ್ಳಲು ಸಹ ಇಷ್ಟಪಡುತ್ತಾರೆ.

ಆದ್ದರಿಂದ, ನಿಮ್ಮ ಅಗತ್ಯತೆಗಳನ್ನು ನಿಮ್ಮ ಸಂಗಾತಿಯ ಎದುರಿಗೆ ಮುಕ್ತವಾಗಿ ಮಾತಾಡಲು ನೀವು ಹೆಣಗಾಡುತ್ತಿದ್ದರೆ, ಅದಕ್ಕೆ ಏನು ಕಾರಣಗಳು ಇರಬಹುದು ಅಂತ ಮೊದಲು ತಿಳಿದುಕೊಳ್ಳುವುದು ಮುಖ್ಯವಾಗುತ್ತದೆ" ಎಂದು ಪರವಾನಗಿ ಪಡೆದ ಚಿಕಿತ್ಸಕ ಮತ್ತು ಸಂಬಂಧ ತಜ್ಞ ಜೋರ್ಡಾನ್ ಗ್ರೀನ್ ತಮ್ಮ ಇತ್ತೀಚಿನ ಇನ್‌ಸ್ಟಾಗ್ರಾಮ್ ಖಾತೆಯ ಪುಟದಲ್ಲಿ ಮಾಡಿಕೊಂಡ ಪೋಸ್ಟ್ ನಲ್ಲಿ ಹೇಳುತ್ತಾರೆ.

ಅಗತ್ಯತೆಗಳ ಬಗ್ಗೆ ಸಂಗಾತಿಯ ಎದುರಿಗೆ ಹೇಳಿಕೊಳ್ಳಲು ಆಗದೆ ಇರುವುದಕ್ಕೆ ಕಾರಣಗಳಿವು: ತಿರಸ್ಕಾರದ ಭಯವಿರುತ್ತದೆ: ತಮ್ಮ ಅಗತ್ಯತೆಗಳನ್ನು ಸಂಗಾತಿಗೆ ಹೇಳಿಕೊಂಡರೆ, ತಮ್ಮ ಸಂಗಾತಿ ಎಲ್ಲಿ ತಮ್ಮನ್ನು ತಿರಸ್ಕರಿಸಬಹುದು ಅಥವಾ ತಮ್ಮ ಬಗ್ಗೆ ಬೇರೆ ರೀತಿಯಲ್ಲಿ ಯೋಚಿಸಬಹುದು ಅಂತ ಅನೇಕರು ಹೆದರುತ್ತಾರೆ.

ಜಗಳವಾಗುತ್ತವೆ ಅನ್ನೋದರ ಭಯ: ನಿಮ್ಮ ಅಗತ್ಯತೆಗಳನ್ನು ಸಂಗಾತಿಯ ಎದುರಿಗೆ ಹೇಳಿಕೊಂಡರೆ ಎಲ್ಲಿ ಇಬ್ಬರ ನಡುವೆ ಜಗಳ ಶುರುವಾಗಿ ಬಿಡುತ್ತದೆಯೋ ಅನ್ನೋ ಹೆದರಿಕೆ ಇರುತ್ತದೆ. ವಾಗ್ವಾದ ಅಥವಾ ಸಂಘರ್ಷಕ್ಕೆ ಕಾರಣವಾಗಬಹುದು ಅಂತ ಅನೇಕರು ತಮ್ಮ ಅಗತ್ಯತೆಗಳ ಬಗ್ಗೆ ಹೇಳಿಕೊಳ್ಳಲು ಹೋಗುವುದಿಲ್ಲ.

ಆತ್ಮವಿಶ್ವಾಸದ ಕೊರತೆ: ನಿಮ್ಮ ಬಗ್ಗೆ ಅಥವಾ ಪರಿಣಾಮಕಾರಿಯಾಗಿ ಸಂವಹನ ನಡೆಸುವ ನಿಮ್ಮ ಸಾಮರ್ಥ್ಯದ ಬಗ್ಗೆ ನಿಮಗೆ ಆತ್ಮವಿಶ್ವಾಸ ಇಲ್ಲದಿರುವುದು, ಇದು ನಿಮ್ಮ ಅಗತ್ಯತೆಗಳನ್ನು ಮುಕ್ತವಾಗಿ ಹಂಚಿಕೊಳ್ಳುವುದಕ್ಕೆ ಅಡ್ಡಿ ಪಡಿಸುತ್ತದೆ.

ನಿಮ್ಮ ಸಂಗಾತಿ ಈಗಾಗಲೇ ತಿಳಿದಿರಬೇಕು ಎಂಬ ನಂಬಿಕೆ: ನಿಮಗೆ ಏನು ಬೇಕು ಅಥವಾ ಬೇಡ ಅನ್ನೋದರ ಬಗ್ಗೆ ನಿಮ್ಮ ಸಂಗಾತಿಗೆ ಈಗಾಗಲೇ ಚೆನ್ನಾಗಿ ತಿಳಿದಿರಬೇಕು ಎಂದು ನೀವು ನಂಬುತ್ತೀರಿ, ಇದು ನಿಮ್ಮ ಅಗತ್ಯತೆಗಳನ್ನು ನೇರವಾಗಿ ಹೇಳಿಕೊಳ್ಳದಂತೆ ತಡೆಯುತ್ತದೆ.

ನಿರ್ಗತಿಕರಂತೆ ಕಾಣುವ ಭಯ: ನಿಮ್ಮ ಅಗತ್ಯತೆಗಳನ್ನು ನೀವು ಮುಕ್ತವಾಗಿ ಹೇಳಿಕೊಂಡರೆ, ನಿಮ್ಮನ್ನು ನಿರ್ಗತಿಕ ಅಥವಾ ಅವಲಂಬಿತರಾಗಿ ನೋಡಲಾಗುತ್ತದೆ ಎಂದು ನೀವು ಭಯಪಡುತ್ತೀರಿ, ಇದು ಅಹಿತಕರ ಅಥವಾ ಮುಜುಗರವನ್ನು ಉಂಟು ಮಾಡಬಹುದು.

ಹಿಂದಿನ ನಕಾರಾತ್ಮಕ ಅನುಭವಗಳು: ನೀವು ಈ ಹಿಂದೆ ಹೀಗೆ ನಿಮ್ಮ ಸಂಗಾತಿಯ ಮುಂದೆ ನಿಮ್ಮ ಅಗತ್ಯತೆಗಳ ಬಗ್ಗೆ ಹೇಳಿಕೊಂಡಾಗ ಆದ ನಕಾರಾತ್ಮಕ ಅನುಭವಗಳನ್ನು ನೆನಪಿಸಿಕೊಳ್ಳಬಹುದು ಮತ್ತು ಸುಮ್ಮನೆ ಇರಬಹುದು. ಇಷ್ಟೇ ಅಲ್ಲದೆ ಅಗತ್ಯತೆಗಳನ್ನು ಹೇಳಿಕೊಂಡಾಗ ನಿಮ್ಮ ಸಂಗಾತಿ ಹೇಗೆ ಪ್ರತಿಕ್ರಿಯಿಸುತ್ತಾರೆ ಅನ್ನೋ ಭಯ ಸಹ ಇರುತ್ತದೆ.

ಕೆಲವು ಕುಟುಂಬ ನಂಬಿಕೆಗಳು: ನೀವು ಸಾಂಸ್ಕೃತಿಕ ಅಥವಾ ಕುಟುಂಬ ಹಿನ್ನೆಲೆಯಿಂದ ಬಂದವರಾಗಿರಬಹುದು, ಅಲ್ಲಿ ನಿಮ್ಮ ಅಗತ್ಯತೆಗಳನ್ನು ನೇರವಾಗಿ ವ್ಯಕ್ತಪಡಿಸಲು ಪ್ರೋತ್ಸಾಹಿಸಲಾಗುವುದಿಲ್ಲ ಅಥವಾ ನಿಷಿದ್ಧವೆಂದು ಪರಿಗಣಿಸಬಹುದು. ಹಾಗಾಗಿ ನೀವು ನಿಮ್ಮ ಅಗತ್ಯತೆಗಳನ್ನು ನಿಮ್ಮ ಸಂಗಾತಿಯ ಎದುರಿಗೆ ಹೇಳಿಕೊಳ್ಳದೆ ಇರಬಹುದು.

"ನಿಮ್ಮ ಕಾರಣಗಳು ಏನೇ ಇರಲಿ, ನಿಮಗೆ ಆರಾಮದಾಯಕ ಮತ್ತು ಅಧಿಕೃತವೆಂದು ಭಾವಿಸುವ ರೀತಿಯಲ್ಲಿ ನಿಮ್ಮ ಸಂಗಾತಿಯೊಂದಿಗೆ ನಿಮ್ಮ ಅಗತ್ಯತೆಗಳನ್ನು ಮುಕ್ತವಾಗಿ ಹೇಳಿಕೊಳ್ಳುವುದು ತುಂಬಾನೇ ಮುಖ್ಯವಾಗಿರುತ್ತದೆ.

ಮುಕ್ತ ಮತ್ತು ಪ್ರಾಮಾಣಿಕವಾಗಿ ನೀವು ಮಾತಾಡಿದಾಗ ಅದನ್ನು ಪ್ರೋತ್ಸಾಹಿಸುವುದು ನಿಮ್ಮ ಮತ್ತು ನಿಮ್ಮ ಸಂಗಾತಿಯ ನಡುವೆ ಬಲವಾದ ಸಂಪರ್ಕವನ್ನು ನಿರ್ಮಿಸಲು ಸಹಾಯ ಮಾಡುತ್ತದೆ ಮತ್ತು ತೃಪ್ತಿಕರ ಸಂಬಂಧಕ್ಕೆ ಕಾರಣವಾಗುತ್ತದೆ " ಎಂದು ಜೋರ್ಡಾನ್ ಗ್ರೀನ್ ಹೇಳುತ್ತಾರೆ.