ದಿನನಿತ್ಯ 20 ನಿಮಿಷ ವ್ಯಾಯಾಮ ಮಾಡಿದರೂ ಉತ್ತಮ ಆರೋಗ್ಯ ಕಾಪಾಡಿಕೊಳ್ಳಬಹುದು

ಪೌಷ್ಠಿಕ ಆಹಾರಗಳಿಂದ ಉತ್ತಮ ಆರೋಗ್ಯ ಪಡೆಯಬಹುದು. ಆದರೆ ಆರೋಗ್ಯವನ್ನು ಕಾಪಾಡಿಕೊಳ್ಳಲು ವ್ಯಾಯಾಮ ಅತ್ಯಗತ್ಯವಾಗಿದೆ. ಪ್ರತಿನಿತ್ಯ ವ್ಯಾಯಾಮ ಮಾಡುವುದರಿಂದ ದೇಹದಲ್ಲಿ ಕ್ಯಾಲೊರಿಗಳನ್ನು ಕರಗಿಸಿಕೊಳ್ಳಬಹುದು. ಇಂದಿನ ಜೀವನ ಶೈಲಿಯಲ್ಲಿ ವ್ಯಾಯಾಮ ಮಾಡಲು ಸಮಯ ಸರಿದೂಗಿಸುವುದು ಕೂಡ ದೊಡ್ಡ ಸಮಸ್ಯೆಯಾಗಿದೆ.

ಇಂದಿನ ಜೀವನ ಶೈಲಿಗೆ ವ್ಯಾಯಾಮ ಬಹಳ ಮುಖ್ಯ. ಆದರೂ ಪ್ರತಿದಿನ ಪಾರ್ಕ್​ನಲ್ಲಿ ಅಥವಾ ಜಿಮ್​ನಲ್ಲಿ ಒಂದೇ ರೀತಿಯ ವ್ಯಾಯಾಮ ಮಾಡುವುದರಿಂದ ಬೇಸರಿಕೆ ಉಂಟಾಗುತ್ತದೆ. ಸೇವಿಸುವ ಆಹಾರಕ್ಕನುಗುಣವಾಗಿ ದೈಹಿಕ ಚಟುವಟಿಕೆಗಳನ್ನು ಬದಲಿಸುವ ಮೂಲಕ ಉತ್ತಮ ಆರೋಗ್ಯ ಪಡೆಯಬಹುದು.

ಪ್ರತಿನಿತ್ಯ ತಿನ್ನುವ ಆಹಾರಕ್ಕೆ ಅನುಸಾರವಾಗಿ ವ್ಯಾಯಾಮದ ಟೈಮ್​ ಟೇಬಲ್ ರಚಿಸುವುದು ಉತ್ತಮ. ಆಹಾರದಲ್ಲಿರುವ ಕೊಬ್ಬಿನ ಪ್ರಮಾಣವನ್ನು ಪರಿಗಣಿಸಿ ವ್ಯಾಯಾಮ ಮಾಡುವುದರಿಂದ ಸಮಯದ ಅಭಾವ ತಪ್ಪುತ್ತದೆ.

ದಿನ 20 ನಿಮಿಷಗಳ ವ್ಯಾಯಾಮ ಮಾಡಿದರೂ ಉತ್ತಮ ಆರೋಗ್ಯವನ್ನು ತಮ್ಮದಾಗಿಸಿಕೊಳ್ಳಬಹುದು. ಆದರೆ 20 ನಿಮಿಷದಲ್ಲಿ ಕಠಿಣ ಎನಿಸುವ ವ್ಯಾಯಾಮಗಳನ್ನು ಮಾಡುವುದರಿಂದ ದೇಹದಲ್ಲಿರುವ ಕ್ಯಾಲೊರಿ ಬೇಗನೆ ಕರಗುತ್ತದೆ.

ಕ್ಯಾಲೊರಿಯನ್ನು ಕರಗಿಸಲು ಕ್ರೀಡಾಪಟು ನಿರ್ವಹಿಸುವ ವ್ಯಾಯಾಮಗಳನ್ನು ತಂತ್ರಗಳನ್ನು ಅನುಸರಿಸುವುದು ಒಳಿತು. ಪಾಯಿಂಟ್ ಬಾಲ್ ಮತ್ತು ಬಾಡಿ ರೆಸಿಸ್ಟೆಂಸ್ ಬ್ಯಾಂಡ್ ಬಳಸಿ ಮಾಡುವ ವ್ಯಾಯಾಮ ಕಡಿಮೆ ಅವಧಿಯಲ್ಲಿ ಹೆಚ್ಚು ಪರಿಣಾಮ ಬೀರುತ್ತದೆ. ಈ ಕಸರತ್ತನ್ನು ಕಡಿಮೆ ಸ್ಥಳದಲ್ಲಿ ಮಾಡಬಹುದಾಗಿದ್ದು, ಪ್ರತಿ ದಿನ 20 ನಿಮಿಷ ಅಭ್ಯಾಸ ಮಾಡಿದರೂ ಉತ್ತಮ ಫಲಿತಾಂಶ ಕಾಣಬಹುದು.

ವ್ಯಾಯಾಮದ ಬಳಿಕ ದೇಹವನ್ನು ಚಟುವಟಿಕೆಯಲ್ಲಿ ಇರಿಸಿಕೊಳ್ಳಿ. ಎಷ್ಟು ಹೊತ್ತು ವ್ಯಾಯಾಮ ಮಾಡುತ್ತೀವಿ ಅನ್ನುವುದಕ್ಕಿಂತ ಏಕಾಗ್ರತೆಯಿಂದ ಕಸರತ್ತು ಮಾಡುವುದು ಮುಖ್ಯವಾಗಿರುತ್ತದೆ.

ದೈಹಿಕ ಸಾಮರ್ಥ್ಯಕ್ಕೆ ಅನುಗುಣವಾಗಿ ವ್ಯಾಯಾಮ ಮಾಡುವುದು ಉತ್ತಮ. ವ್ಯಾಯಾಮ ಮಾಡಿ ದೇಹಕ್ಕೆ ನೋವುಂಟು ಮಾಡುವುದರಿಂದ ಯಾವುದೇ ರೀತಿಯ ಪ್ರಯೋಜವಿರುವುದಿಲ್ಲ.