Koppal News: ಮೊದಲ ಮತದಾನ ಮಾಡಿದ 69 ವರ್ಷದ ಅಜ್ಜಿ! ಮತಗಟ್ಟೆಯ ಎದುರು ಧರಣಿ ಕುಳಿತ 85 ವರ್ಷದ ವೃದ್ಧೆ

ಕರ್ನಾಟಕ ವಿಧಾನಸಭೆಯ ಮತದಾನ ಬಿರುಸಿನಿಂದ ನಡೆಯುತ್ತಿರುವ ವೇಳೆ ಮತಗಟ್ಟೆ ಮುಂದೆ ಅಜ್ಜಿಯೊಬ್ಬರು ಧರಣಿ ಕುಳಿತ ಘಟನೆ ನಡೆದಿದೆ. 85 ವರ್ಷದ ಮುಕ್ತುಂಬೀ ದೊಡ್ಡಮನಿ ಎಂಬ ಅಜ್ಜಿಯೇ ಹೀಗೆ ಧರಣಿ ಕುಳಿತವರು.

ಗದಗ ಜಿಲ್ಲೆಯ ಮುಂಡರಗಿ ಪಟ್ಟಣದ ಮತಗಟ್ಟೆ ಸಂಖ್ಯೆ 53 ರಲ್ಲಿ ಮೊಮ್ಮಗನ ಜೊತೆಗೆ ಅಜ್ಜಿಯೊಬ್ಬರು ಮತದಾನಕ್ಕೆ ಆಗಮಿಸಿದ್ದಾರೆ. ಆದರೆ ಚುನಾವಣಾ ಅಧಿಕಾರಿಗಳು ಅಜ್ಜಿಯ ಜೊತೆಗೆ ಮೊಮ್ಮಗನನ್ನು ಮತದಾನ ಮಾಡುವ ಸ್ಥಳಕ್ಕೆ ಬಿಟ್ಟಿಲ್ಲ.

ಚುನಾವಣಾ ಅಧಿಕಾರಿಗಳು ಅಜ್ಜಿಯನ್ನು ತಾವೇ ಕರೆದುಕೊಂಡು ಹೋಗಿ ಮತದಾನ ಮಾಡಿದ್ದಾರೆ. ಆದರೆ ಚುನಾವಣಾ ಕರ್ತವ್ಯದಲ್ಲಿರುವ ಅಧಿಕಾರಿಗಳು ಅಜ್ಜಿ ತೋರಿಸಿದ ಚಿಹ್ನೆಗೆ ಮತವನ್ನು ಹಾಕಲಿಲ್ಲ, ಬೇರೆ ಗುರುತಿಗೆ ಮತ ಹಾಕಿದ್ದಾರೆ ಎಂದು ಅಜ್ಜಿ ಆರೋಪ ಮಾಡಿದ್ದಾರೆ. ಹೀಗಾಗಿ ಮತಗಟ್ಟೆಯ ಎದುರು 85 ವರ್ಷದ ಅಜ್ಜಿ ಮುಕ್ತುಂಬೀ ದೊಡ್ಡಮನಿ ಮತಗಟ್ಟೆಯ ಎದುರು ಧರಣಿಗೆ ಕುಳಿತಿದ್ದಾರೆ.

ಕೊಪ್ಪಳದಲ್ಲಿ 69 ವರ್ಷದ ಅಜ್ಜಿಯೊಬ್ಬರು ಇದೇ ಮೊದಲ ಬಾರಿಗೆ ಮತದಾನ ಮಾಡಿದ್ದಾರೆ. ಕಲ್ಯಾಣ ನಗರ ನಿವಾಸಿ ರುಕ್ಮಿಣಿಬಾಯಿ ಎಂಬ 69 ವರ್ಷದ ವೃದ್ಧೆ ಇದುವರೆಗೂ ವೋಟ್ ಮಾಡಿರಲಿಲ್ವಂತೆ. ಇದೀಗ ತಾವೇ ಆಸಕ್ತಿವಹಿಸಿ ಮೊದಲ ಬಾರಿಗೆ ವೋಟ್ ಮಾಡಿದ್ದಾರೆ. ಇಂದು ನನ್ನ ಜೀವನದ ಅತ್ಯಂತ ಸಂತೋಷದ ದಿನ ಅಂತ ರುಕ್ಮಿಣಿಬಾಯಿ ಹೇಳಿದ್ದಾರೆ.

ಸಾಗರ ವಿಧಾನಸಭಾ ಕ್ಷೇತ್ರದಲ್ಲಿ 101 ವರ್ಷದ ವೃದ್ಧೆ ಮತದಾನ ಮಾಡಿದ್ದಾರೆ, ಶತಾಯುಶಿ ಅಜ್ಜಿ ತಮ್ಮ ಕರ್ತವ್ಯ ನಿಭಾಯಿಸಿದ್ದಾರೆ.

ಹಲವು ವೃದ್ಧರು ತುಂಬಾ ವಯಸ್ಸಾಗಿದ್ದರೂ ತಮ್ಮ ಜವಾಬ್ಧಾರಿಯನ್ನು ನೆರವೇರಿಸುವ ಸಲುವಾಗಿ ಮತಗಟ್ಟೆಗೆ ವೀಲ್​ ಚೇರ್​ ಮೂಲಕ ಆಗಮಿಸಿದ್ದಾರೆ.

ವೀಲ್ ಚೇರ್​ನಲ್ಲಿ ಬಂದು ಮತ ಚಲಾಯಿಸಿದ ಶಾಕಿರ್ ಎಂಬ ವ್ಯಕ್ತಿ ಮತದಾನಕ್ಕೆ ದಿವ್ಯಾಂಗತೆ ಅಡ್ಡಿಯಾಗುವುದಿಲ್ಲ ಎಂದು ತೋರಿಸಿಕೊಟ್ಟಿದ್ದಾರೆ.