Kolar Viral News: ಎತ್ತಿನಗಾಡಿಯಲ್ಲಿ ಬಂದು ನಾಮಪತ್ರ ಸಲ್ಲಿಸಿದ 60 ವರ್ಷದ ಅಜ್ಜಿ!

ಕರ್ನಾಟಕ ವಿಧಾನಸಭೆ ಚುನಾವಣೆಗೆ ಕೋಲಾರ ಜಿಲ್ಲೆಯ ಮಾಲೂರು ವಿಧಾನಸಭಾ ಕ್ಷೇತ್ರದ ಪಕ್ಷೇತರ ಅಭ್ಯರ್ಥಿಯಾಗಿ 60 ವರ್ಷದ ನಾರಾಯಣಮ್ಮ ಎಂಬ ವೃದ್ದ ಮಹಿಳೆ ನಾಮಪತ್ರ ಸಲ್ಲಿಸಿದ್ದಾರೆ.

ನಾರಾಯಣಮ್ಮ ಅವರು ಕೇವಲ ನಾಮಪತ್ರ ಸಲ್ಲಿಸಿದ್ದರೆ ಭಾರೀ ಸುದ್ದಿ ಆಗ್ತಿರಲಿಲ್ಲವೇನೋ, ಆದ್ರೆ 60 ವರ್ಷದ ನಾರಾಯಣಮ್ಮ ಎತ್ತಿನಬಂಡಿ ಮೂಲಕ ತಾಲೂಕು ಕಚೇರಿಗೆ ಆಗಮಿಸಿ ವಿಭಿನ್ನವಾಗಿ ನಾಮಪತ್ರ ಸಲ್ಲಿಸಿದ್ದಾರೆ.

ಕೋಲಾರದ ಮಾಲೂರು ತಾಲೂಕಿನ ನಂಬಿಗಾನಹಳ್ಳಿ ಗ್ರಾಮದ ನಾರಾಯಣಮ್ಮ ಅವರ ಮಗಳು ನ್ಯಾಯಾಧೀಶರಾಗಿದ್ದಾರೆ.

ಮಾಲೂರು ತಾಲೂಕಿನ ಸಮಗ್ರ ಅಭಿವೃದ್ದಿಗಾಗಿ ವಿಧಾನಸಭಾ ಚುನಾವಣೆಗೆ ನಾಮಪತ್ರ ಸಲ್ಲಿಸಿರುವುದಾಗಿ 60 ವರ್ಷದ ನಾರಾಯಣಮ್ಮ ತಿಳಿಸಿದ್ದಾರೆ. ಅವರು ಎತ್ತಿನಗಾಡಿಯ ಮೇಲೆ ಆಗಮಿಸುವ ವಿಡಿಯೋ, ಫೋಟೋಗಳು ಕೋಲಾರದಲ್ಲಿ ವೈರಲ್ ಆಗುತ್ತಿವೆ.

ಎತ್ತಿನಗಾಡಿಗೆ ಬಾಳೆಮರ ಕಟ್ಟಿ, ಹೂಗಳಿಂದ ಸಿಂಗರಿಸಿ, ತಮಟೆ ವಾದ್ಯಗಳ ಮೂಲಕ ಚುನಾವಣಾಧಿಕಾರಿಗಳ ಕಚೇರಿಗೆ ಆಗಮಿಸಿ ಕುಟುಂಬದವರ ಜೊತೆಗೂಡಿ ನಾರಾಯಣಮ್ಮ ನಾಮಪತ್ರ ಸಲ್ಲಿಸಿದ್ದಾರೆ.

ನನ್ನ ಮಗಳು ನ್ಯಾಯಾಧೀಶರಾಗಿರುವುದು ನಾನು ಚುನಾವಣೆಯಲ್ಲಿ ಸ್ಪರ್ಧಿಸುವುದಕ್ಕೆ ಸಂಬಂಧವಿಲ್ಲ. ನನಗೆ ಹಣಬಲ ಇಲ್ಲದಿದ್ದರೂ ಚುನಾವಣೆ ಎದುರಿಸುತ್ತೇನೆ ಎಂದು ತಿಳಿಸಿದ್ದಾರೆ ನಾರಾಯಣಮ್ಮ.

ಒಟ್ಟಾರೆ 60 ವರ್ಷದ ನಾರಾಯಣಮ್ಮ ಅವರು ಎತ್ತಿನಗಾಡಿಯಲ್ಲಿ ಆಗಮಿಸಿ ನಾಮಪತ್ರ ಸಲ್ಲಿಸಿರುವುದು ಕೋಲಾರ ಜನತೆಯ ಗಮನ ಸೆಳೆದಿದೆ.