Digital Library: ಡಿಜಿಟಲ್​ ಗ್ರಂಥಾಲಯದಿಂದ ವಿದ್ಯಾರ್ಥಿಗಳಿಗಿದೆ ಈ ಲಾಭ!

ಭೌತಿಕವಾಗಿ ಕೈಯಲ್ಲಿ ಹಿಡಿದು ಓದುವ ಪುಸ್ತಕಕ್ಕಿಂತ ಇದು ಭಿನ್ನವಾಗಿರುತ್ತದೆ. ಮೊಬೈಲ್​ ಅಥವಾ ಇನ್ಯಾವುದೇ ತಾಂತ್ರಿಕ ಸಾಧನದ ಮೂಲಕ ಪುಸ್ತಕಗಳನ್ನು ಓದಲು ಸಹಾಯಮಾಡುವ ಅಂಶವೇ ಡಿಜಿಟಲ್​ ಲೈಬ್ರರಿ.

ಇ-ಬುಕ್ಸ್​ ಅಂದರೆ ಎಲೆಕ್ಟ್ರಾನಿಕ್ ಪುಸ್ತಕಗಳನ್ನು ಇದರಲ್ಲಿ ನಾವು ಓದಬಹುದು. ಇಂಟರ್ನೆಟ್​ನ ಮೂಲಕ ಸುಲಭವಾಗಿ ಯಾವುದೇ ಸಮಯದಲ್ಲಿ ಎಲ್ಲಿ ಬೇಕಾದರೂ ಈ ಪುಸ್ತಕವನ್ನು ಓದಬಹುದು.

ಒಂದೇ ಬಾರಿಗೆ ಎಷ್ಟು ಜನ ಬೇಕಾದರೂ  ಪುಸ್ತಕವನ್ನು ಓದಲು ಇದು ಅನುವು ಮಾಡಿ ಕೊಡುತ್ತದೆ. ಬಳಕೆದಾರರು ಮ್ಯಾಗಜೀನ್ ಲೇಖನಗಳು, ಪುಸ್ತಕಗಳು, ಪೇಪರ್‌ಗಳು, ಚಿತ್ರಗಳು, ಧ್ವನಿ ಫೈಲ್‌ಗಳು ಮತ್ತು ವೀಡಿಯೊಗಳನ್ನು ಸಹ ಇದರಲ್ಲಿ ಪಡೆಯಬಹುದು.

ರಾಜ್ಯಗಳಿಗೆ ಪಂಚಾಯತ್ ಮತ್ತು ವಾರ್ಡ್ ಮಟ್ಟದಲ್ಲಿ ಭೌತಿಕ ಗ್ರಂಥಾಲಯಗಳನ್ನು ಮತ್ತು ಡಿಜಿಟಲ್​ ಗ್ರಂಥಾಲಯವನ್ನು ಸ್ಥಾಪಿಸಲಾಗುತ್ತದೆ ಎಂದು ಇಂದು ನಿರ್ಮಲಾ ಸೀತಾರಾಮನ್​ ಹೇಳಿದ್ದಾರೆ. ಆ ನಿಟ್ಟಿನಲ್ಲಿ ಹಲವಾರು ಜನರಿಗೆ ಈ ವಿಷಯದ ಕುರಿತು ಕುತೂಹಲ ಮೂಡಿದೆ.

ವಿದ್ಯಾರ್ಥಿಗಳಿಗೆ ಸಹಾಯವಾಗಲಿ ಎಂಬ ನಿಟ್ಟಿನಲ್ಲಿ ಈ ಡಿಜಿಟಲ್​ ಗ್ರಂಥಾಲಯದ ಸ್ಥಾಪನೆಗೆ ಕೇಂದ್ರ ಸರ್ಕಾರ ಮುಂದಾಗಿದೆ. ಹಲವಾರು ವಿದ್ಯಾರ್ಥಿಗಳಿಗೆ ಇದರಿಂದ ಪ್ರಯೋಜನ ದೊರೆಯಲಿದೆ.

ಮೈಕ್ರೋಫಿಲಂಗಳು ಹಾಗೂ ಇತರ ಮಾಧ್ಯಮಗಳ ಮೂಲಕ ಮುದ್ರಿತ ಗ್ರಂಥಗಳ ಸಂಗ್ರಹ ಕಾರ್ಯ ಈಗಾಗಲೇ ಆರಂಭವಾಗಿದೆ. ಇನ್ನು ಮುಂದಿನ ದಿನಗಳಲ್ಲಿ ಸಂಪೂರ್ಣ ಸಿದ್ಧಗೊಂಡ ಡಿಜಿಟಲ್​ ಗ್ರಂಥಾಯ ಎಲ್ಲರಿಗೂ ಉಪಯುಕ್ತವಾಗಲಿದೆ.

ಓದಲು ಆಸಕ್ತಿ ಇರುವ ಎಲ್ಲರೂ ಇದರ ಪ್ರಯೋಜನ ಪಡೆದುಕೊಳ್ಳಬಹುದು. ಉನ್ನತ ಶಿಕ್ಷಣ ಹಾಗೂ ವೃತ್ತಿಪರ ಕೋರ್ಸ್​​ ಅಭ್ಯಾಸ ಮಾಡುತ್ತಿರುವ ವಿದ್ಯಾರ್ಥಿಗಳಿಗೆ ಇದು ಸಹಾಯವಾಗಲಿದೆ.

ಇಂಟರ್ನೆಟ್​ ಸಂಪರ್ಕ ಹೊಂದಿದ್ದರೆ ಸಾಕು ನೀವು ಈ ಪುಸ್ತಕಗಳನ್ನು ಓದಬಹುದು. ಜಗತ್ತಿನಲ್ಲಿರುವ ಎಲ್ಲಾ ವಿಷಯಗಳನ್ನು ತಂತ್ರಜ್ಞಾನದ ಮೂಲಕ ತಿಳಿದುಕೊಳ್ಳಲು ಇದು ತುಂಬಾ ನೆರವಾಗುತ್ತದೆ.