2nd PUC: ಹಿಜಾಬ್ ವಿವಾದಕ್ಕಿಂತ ನನಗೆ ಶಿಕ್ಷಣವೇ ಮೇಲು: ದ್ವಿತೀಯ ಪಿಯುಸಿ ಟಾಪರ್ ತಬಸುಂ ಮಾತಿದು

ಪಿಯುಸಿ ಫಲಿತಾಂಶ ಹೊರಬಿದ್ದಿದ್ದು. ಟಾಪರ್‌ಗಳಿಗೆ ಎಲ್ಲೆಡೆ ಪ್ರಶಂಸೆಗಳ ಸುರಿಮಳೆ ಹರಿದುಬರುತ್ತಿದೆ. ಟಾಪರ್‌ಗಳ ಪಟ್ಟಿಯಲ್ಲಿ ತಬಸ್ಸುಮ್ ಶೇಕ್ ಕೂಡ ಒಬ್ಬರಾಗಿದ್ದು, ಈ ಬಾರಿ ದ್ವಿತೀಯ ಪಿಯುಸಿ ಪರೀಕ್ಷೆಯಲ್ಲಿ ಕಲಾ ವಿಭಾಗದಲ್ಲಿ 600ಕ್ಕೆ 593 ಅಂಕ ಗಳಿಸಿ ರಾಜ್ಯಕ್ಕೆ ಅಗ್ರಸ್ಥಾನ ಪಡೆದಿದ್ದಾರೆ.

ಬೆಂಗಳೂರಿನ ಎನ್‌ಎಂಕೆಆರ್‌ವಿ ಪಿಯು ಕಾಲೇಜಿನ ತಬಸ್ಸುಮ್, ಹಿಜಾಬ್‌ಗಿಂತ ನಾನು ನನ್ನ ಶಿಕ್ಷಣಕ್ಕೆ ಆದ್ಯತೆ ನೀಡಿದೆ. ಅದರಿಂದಲೇ ಟಾಪರ್‌ ಆಗಲು ಸಾಧ್ಯವಾಯಿತು" ಎಂದು ಖುಷಿ ವ್ಯಕ್ತಪಡಿಸಿದರು

ಕಳೆದ ವರ್ಷ ರಾಜ್ಯದಲ್ಲಿ ನಡೆದ ಹಿಜಾಬ್‌ ವಿವಾದ ವಿದ್ಯಾರ್ಥಿಗಳ ಬದುಕನ್ನು ಅಲ್ಲೋಲ-ಕಲ್ಲೋಲ ಮಾಡಿತು. ಕರ್ನಾಟಕ ಹೈಕೋರ್ಟ್ ಶಿಕ್ಷಣ ಸಂಸ್ಥೆಗಳಲ್ಲಿ ಧಾರ್ಮಿಕ ಉಡುಗೆಗಳಾದ ಹಿಜಾಬ್ ಅಥವಾ ಬುರ್ಖಾವನ್ನು ನಿಷೇಧಿಸುವ ಸರ್ಕಾರದ ಆದೇಶವನ್ನು ಎತ್ತಿಹಿಡಿದಿತ್ತು ಮತ್ತು ಶಿಕ್ಷಣ ಸಂಸ್ಥೆಗಳ ಡ್ರೆಸ್ ಕೋಡ್ ಅನ್ನು ಅನುಸರಿಸಲು ವಿದ್ಯಾರ್ಥಿಗಳಿಗೆ ಸೂಚಿಸಿತ್ತು.

ಈ ನಿರ್ಧಾರದ ವಿರುದ್ಧ ಅನೇಕ ಮುಸ್ಲಿಂ ವಿದ್ಯಾರ್ಥಿಗಳು ಬೀದಿಗಿಳಿದು ಪ್ರತಿಭಟನೆ ನಡೆಸಿದ್ದರು, ಹಲವರು ಹಿಜಾಬ್ ಮತ್ತು ಸ್ಕಲ್ ಕ್ಯಾಪ್ ಧರಿಸಿ ತರಗತಿಗಳಿಗೆ ಹಾಜರಾಗಿದ್ದರು.

ಆದರೆ ನ್ಯಾಯಾಲಯದ ತೀರ್ಪಿಗೆ ಬದ್ಧರಾಗಿರಲು ಒತ್ತಾಯಿಸಿದ ನಂತರ ಅನೇಕ ಮುಸ್ಲಿಂ ವಿದ್ಯಾರ್ಥಿಗಳು ಪರೀಕ್ಷೆಗೆ ಹಾಜರಾಗದೇ ವಿರೋಧ ವ್ಯಕ್ತಪಡಿಸಿದರು. ಆದರೆ ಈ ಎಲ್ಲಾ ರಾಜಕೀಯ, ಧಾರ್ಮಿಕ ಬೆಳವಣಿಗೆಗೆ ಸೊಪ್ಪು ಹಾಕದ ತಬಸ್ಸುಮ್ ಶೇಕ್ ಓದಿನ ಕಡೆ ಮಾತ್ರ ಗಮನಹರಿಸಿ ಇಂಥದ್ದೊಂದು ಸಾಧನೆ ಮಾಡಿದ್ದಾರೆ.

ಶಿಕ್ಷಣ ಪಡೆಯಬೇಕು ಎಂದರೆ ಕೆಲ ತ್ಯಾಗಗಳು ಅನಿವಾರ್ಯ. ಹಿಜಾಬ್‌ ಅನ್ನು ತರಗತಿ ಒಳಗೆ ಧರಿಸಬಾರದು ಎಂದಾಗ ಆ ನಿಯಮಗಳಿಗೆ ಬದ್ಧಳಾದೆ ಮತ್ತು ಶಿಕ್ಷಣಕ್ಕೆ ಒತ್ತು ಕೊಟ್ಟೆ ಎಂದು ವಿದ್ಯಾರ್ಥಿನಿ ದಿ ಇಂಡಿಯನ್ ಎಕ್ಸ್‌ಪ್ರೆಸ್‌ಗೆ ತಿಳಿಸಿದರು.

ನ್ಯಾಯಾಲಯದ ಆದೇಶ ಹೊರಬೀಳುವವರೆಗೂ ತಾನು ಪ್ರತಿದಿನ ಹಿಜಾಬ್‌ ಧರಿಸಿ ತರಗತಿಗಳಿಗೆ ಹಾಜರಾಗುತ್ತಿದ್ದೆ. ಒಮ್ಮೆ ಆದೇಶ ಹೊರಬಿದ್ದ ನಂತರ ನಾನು ಕಾನೂನನ್ನು ಅನುಸರಿಸಿದೆ ಎಂದು ಅವರು ಹೇಳಿದ್ದಾರೆ.

ವಿದ್ಯಾಭ್ಯಾಸ ಮುಂದುವರಿಸುವ ಬಯಕೆ ಮತ್ತು ತನ್ನ ಹೆತ್ತವರಿಂದ ಕಲಿತ ಕಾನೂನನ್ನು ಗೌರವಿಸುವ ಪಾಠಗಳು ತರಗತಿಯಲ್ಲಿ ಹಿಜಾಬ್ ಧರಿಸುವುದನ್ನು ನಿಲ್ಲಿಸಲು ನನ್ನನ್ನು ಪೇರೇಪಿಸಿತು ಎನ್ನುತ್ತಾರೆ ವಿದ್ಯಾರ್ಥಿನಿ.