Periods Lesson: ವಿದ್ಯಾರ್ಥಿನಿಯರಿಗೆ ಎಷ್ಟನೇ ತರಗತಿಯಲ್ಲಿ ಪಿರಿಯಡ್ಸ್​ ಪಾಠ ಮಾಡಬೇಕು? ಇಲ್ಲಿದೆ ಮಾಹಿತಿ

ಪ್ರಾಥಮಿಕ ಶಾಲಾ ವಿದ್ಯಾರ್ಥಿನಿಯರಿಗೆ ಋತುಚಕ್ರದ ದಿನಗಳ ಬಗ್ಗೆ ಮಾಹಿತಿ ನೀಡುವುದು ತುಂಬಾ ಮುಖ್ಯವಾಗಿದೆ. ಶಾರೀರಿಕ ಶಿಕ್ಷಣದ ಅವಶ್ಯಕತೆ ತುಂಬಾ ಇದೆ. ಇಲ್ಲವಾದರೆ ಮೊದಲನೇ ಬಾರಿ ಋತುಮತಿಯಾದ ವಿದ್ಯಾರ್ಥಿನಿಯರು ಭಯಬೀಳುವ ಸಾಧ್ಯತೆ ಹೆಚ್ಚಿರುತ್ತದೆ. ಶಿಕ್ಷಕಿಯರು ತರಗತಿಯಲ್ಲಿರುವ ಹುಡುಗಿಯರನ್ನು ಅವರ ಮಾಸಿಕ ಅವಧಿಗೆ ಸಿದ್ಧಪಡಿಸಲು ಮಾಹಿತಿ ನೀಡಲೇ ಬೇಕು.

ಹುಡುಗಿಯರಿಗೆ ಮೊದಲ ಋತುಚಕ್ರದ ಬಗ್ಗೆ ಕಲಿಸುವುದು ಅಗತ್ಯ. ಆಕೆಗೆ ಏನಾಗುತ್ತದೆ ಎಂದು ತಿಳಿಯಲು ಅಥವಾ ಖಚಿತ ಪಡಿಸಿಕೊಳ್ಳಲು ಆಗುತ್ತಿರುವುದೇನು? ಎಂದು ತಿಳಿದಿರಬೇಕಾಗುತ್ತದೆ. ಶಿಕ್ಷಕರು ಅಥವಾ ಪಾಲಕರು ಈ ವಿಚಾರ ತಿಳಿಸಿಕೊಟ್ಟರೆ ಮಾತ್ರ ಅವರಿಗೆ ಆ ಸಂದರ್ಭವನ್ನು ಎದುರಿಸುವ ಶಕ್ತಿ ಇರುತ್ತದೆ. 5 ರಿಂದ 8ನೇ ತರಗತಿ ಮಕ್ಕಳಿಗೆ ನೀವು ಈ ಪಾಠ ನೀಡಲೇ ಬೇಕು.

ಋತುಮತಿಯಾದಾಗ ಏಕೆ ಭಯಪಡಬಾರದು ಎಂಬುದನ್ನು ವಿವರಿಸಿ. ಆ ಸಂದರ್ಭದಲ್ಲೂ ಶಾಲೆಗೆ ಆಗಮಿಸಬಹುದು ಎಂಬುದನ್ನು ತಿಳಿಸಿಕೊಡಬೇಕು. ಯಾವ ರೀತಿ ಮುಂಜಾಗೃತೆ ವಹಿಸಬೇಕು ಎಂಬುದನ್ನೂ ತಿಳಿಸಿಕೊಡಬೇಕು. ಈ ಮಕ್ಕಳಿಗೆ  ತಪ್ಪು ಮಾಹಿತಿಯನ್ನು ಮಾತ್ರ ಯಾವುದೇ ಕಾರಣಕ್ಕೂ ನೀಡಬಾರದು.

ಹೆಚ್ಚಿನ ಹುಡುಗಿಯರು ಸುಮಾರು 12 ವರ್ಷ ವಯಸ್ಸಿನಲ್ಲೇ ತಮ್ಮ ಮೊದಲ ಋತುಚಕ್ರವನ್ನು ಅನುಭವಿಸಿದರೆ ಇನ್ನು ಕೆಲವು ಹುಡುಗಿಯರು ಒಂಬತ್ತು ವರ್ಷದ ವಯಸ್ಸಿನಲ್ಲೇ ಋತುಮತಿಯರಾಗುತ್ತಿದ್ದಾರೆ. ಆದ್ದರಿಂದ ನೀವು ಬೆಳೆದಂತೆ ನಿಮ್ಮ ದೇಹವು ಹೇಗೆ ಬದಲಾಗುತ್ತದೆ ಎಂಬುದರ ಕುರಿತು ಮುಂಚಿತವಾಗಿ ಮಾತನಾಡಲು ಪ್ರಾರಂಭಿಸುವುದು ಒಳ್ಳೆಯದು. ಮುಟ್ಟಿನ ಬಗ್ಗೆ ನಿಮ್ಮ ತರಗತಿಯಲ್ಲಿ ಕಲಿಸಲು ಅಗತ್ಯವಿರುವ ಮಾಹಿತಿ ಇಲ್ಲಿದೆ.

ಋತುಸ್ರಾವವು ಒಂದು ಸಾಮಾನ್ಯ ಪ್ರಕ್ರಿಯೆಯಾಗಿದ್ದು ಅದು ಪ್ರತಿ ಹುಡುಗಿಯೂ ಪ್ರೌಢಾವಸ್ಥೆಯನ್ನು ತಲುಪಿದ್ದಾಳೆ ಎಂದು ಸೂಚನೆ ನೀಡುವ ಅಂಶವಾಗಿರುತ್ತದೆ ಎಂದು ಮಕ್ಕಳಿಗೆ ಹೇಳಬೇಕು. ಮುಟ್ಟು ಒಂದು ಕಾಯಿಲೆಯಲ್ಲ. ಮುಟ್ಟಿನ ಸಮಯದಲ್ಲಿ ಹುಡುಗಿಯರು ತಮ್ಮ ಸಾಮಾನ್ಯ ಜೀವನವನ್ನು ನಡೆಸಬಹುದು ಎಂಬುದನ್ನು ತಿಳಿಸಿಕೊಡಿ.

ತಮ್ಮ ಸಹೋದರಿಯರು ಮತ್ತು ಸ್ನೇಹಿತರೊಂದಿಗೆ ಆಟವಾಡಬಹುದು, ಅವರು ಸಾಮಾನ್ಯವಾಗಿ ತಿನ್ನುವ ಮತ್ತು ಕುಡಿಯುವ ಎಲ್ಲಾ ಕಾರ್ಯವನ್ನು ಮಾಡಬಹುದು ಎಂದು  ತಿಳಿಸಿಕೊಡಬಹುದು. ಮುಟ್ಟಿನ ಮೊದಲ ಕೆಲವು ವರ್ಷಗಳಲ್ಲಿ ಹುಡುಗಿಯರು ಅನಿಯಮಿತ ಋತುಸ್ರಾವ ಅನುಭವಿಸಬಹುದು.

ಹುಡುಗಿಯರು ತಮ್ಮ ಮೊದಲ ಮುಟ್ಟಿನ ಸಮಯದಲ್ಲಿ ಅನೇಕ ಬದಲಾವಣೆಗಳನ್ನು ಅನುಭವಿಸುತ್ತಾರೆ. ದೇಹದ ಭಾಗಗಳ ಬೆಳವಣಿಗೆ, ಕೂದಲು ಬೆಳವಣಿಗೆ, ಹಾರ್ಮೋನುಗಳ ಬೆಳವಣಿಗೆ, ಭಯ ಮತ್ತು ನಾಚಿಕೆ ಹೆಚ್ಚಾಗುವ ಸಾಧ್ಯತೆ ಹೆಚ್ಚಿರುತ್ತದೆ.