Nithin Kamath: ಕಿರಾಣಿ ಅಂಗಡಿ ನಡೆಸುತ್ತಿರುವ ಮಾವನಿಂದ ಜೀವನ ಪಾಠವನ್ನು ಕಲಿತ ನಿತಿನ್ ಕಾಮತ್!

ಸರಳತೆಯಲ್ಲಿ ನೆಮ್ಮದಿ ಮತ್ತು ಸಂತೋಷ ಅಡಗಿದೆ, ಆದರೆ ಸರಳವಾಗಿರುವುದು ಅಷ್ಟೊಂದು ಸುಲಭದ ಮಾತಲ್ಲ. ಹೌದು, ತುಂಬಾ ಜನರು ದುಡ್ಡು ಮಾಡಬೇಕು ಅಂತ ತಾವು ಹುಟ್ಟಿ ಬೆಳೆದ ಹಳ್ಳಿಗಳನ್ನು ಬಿಟ್ಟು ಬಂದು ಚೆನ್ನಾಗಿ ದುಡ್ಡು ಮಾಡುತ್ತಾರೆ. ಆದರೆ ಆ ದುಡ್ಡು ಮಾಡುವ ತರಾತುರಿಯಲ್ಲಿ ಮನಸ್ಸಿನ ನೆಮ್ಮದಿಯನ್ನೇ ಬಲಿ ಕೊಟ್ಟಿರುತ್ತಾರೆ.

ಅಂತವರಿಗೆ ನಮ್ಮ ಉತ್ತರ ಏನೆಂದರೆ ಹಣ ಜೀವನ ನಡೆಸಲು ತುಂಬಾ ಅವಶ್ಯಕ ಮತ್ತು ಹಣ, ಯಶಸ್ಸು ಎಲ್ಲವೂ ಜೀವನದ ಒಂದು ಭಾಗವಾಗಿರಬೇಕೆ ಹೊರತು ಅದೇ ಜೀವನ ಮತ್ತು ಜೀವನದ ಮೂಲ ಉದ್ದೇಶವಾಗಬಾರದು. ಸ್ವತಂತ್ರವಾಗಿ ಆಲೋಚನೆ ಮಾಡುವುದು, ಕೆಲಸ ಮಾಡುವುದು ಮತ್ತು ನಮ್ಮ ಬದುಕನ್ನ ಬದುಕುವುದು ನಿಜವಾದ ವ್ಯಕ್ತಿ ಸ್ವಾತಂತ್ರ್ಯ ಅಂತ ಕೆಲವರು ಹೇಳುತ್ತಾರೆ.

ಇದರ ಬಗ್ಗೆ ಈಗೇಕೆ ಮಾತು ಅಂತೀರಾ? ಜೆರೋಧಾ ಸಹ ಸಂಸ್ಥಾಪಕ ಮತ್ತು ಸಿಇಒ ಆದ ನಿತಿನ್ ಕಾಮತ್ ಅವರು ಸೋಮವಾರ ತಮ್ಮ ಮಾವ ಶಿವಾಜಿ ಪಾಟೀಲ್ ಅವರೊಂದಿಗೆ ಕ್ಲಿಕ್ಕಿಸಿಕೊಂಡ ಫೋಟೋವನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡಿದ್ದಾರೆ ಮತ್ತು 70 ವರ್ಷದ ಮಾವ ಹೇಗೆ ಉತ್ತಮವಾದ ಜೀವನವನ್ನು ನಡೆಸಬೇಕು ಎಂಬುದರ ಬಗ್ಗೆ ಹೇಗೆ ಒಳ್ಳೆಯ ಪಾಠವನ್ನು ಕಲಿಸಿದರು ಎಂಬುದನ್ನು ಸಹ ಹೇಳಿಕೊಂಡಿದ್ದಾರೆ.

ತಮ್ಮ ಮಾವ ನಿವೃತ್ತಿಯ ನಂತರ ಕರ್ನಾಟಕದ ಬೆಳಗಾವಿಯಲ್ಲಿ ಒಂದು ಚಿಕ್ಕ ಕಿರಾಣಿ ಅಂಗಡಿಯನ್ನು ಪ್ರಾರಂಭಿಸಿದರು ಎಂದು ಕಾಮತ್ ತಮ್ಮ ಸುದೀರ್ಘವಾದ ಕಥೆಯನ್ನು ಟ್ವಿಟ್ಟರ್ ಥ್ರೆಡ್ ನಲ್ಲಿ ಹಂಚಿಕೊಂಡಿದ್ದಾರೆ. "ಅವರು ಮೊದಲು ಭಾರತೀಯ ಸೇನೆಯಲ್ಲಿದ್ದರು ಮತ್ತು ಕಾರ್ಗಿಲ್ ಯುದ್ಧದ ಸಮಯದಲ್ಲಿ ಹಿಮಪಾತದಿಂದ ಅವರು ತಮ್ಮ ಬೆರಳುಗಳನ್ನು ಕಳೆದುಕೊಂಡ ನಂತರ ಹವಾಲ್ದಾರ್ ಆಗಿದ್ದಾಗ ಸ್ವಯಂಪ್ರೇರಣೆಯಿಂದ ನಿವೃತ್ತರಾದರು" ಎಂದು ಕಾಮತ್ ತಮ್ಮ ಮಾವನ ಅಂಗಡಿಯಲ್ಲಿ ಅವರೊಂದಿಗೆ ಕ್ಲಿಕ್ಕಿಸಿಕೊಂಡ ಫೋಟೋದೊಂದಿಗೆ ಟ್ವೀಟ್ ಮಾಡಿದ್ದಾರೆ.

ಪಾಟೀಲ್ ಅವರ ಜೀವನಶೈಲಿಯ ಬಗ್ಗೆ ಮಾತನಾಡಿದ ಕಾಮತ್ "ಅವರು 70 ವರ್ಷ ವಯಸ್ಸಿನವರು, ಆದರೆ ಅಂಗಡಿಗೆ ದಿನಸಿ ಖರೀದಿಸಲು ತಮ್ಮ ದಶಕಗಳಷ್ಟು ಹಳೆಯ ಸ್ಕೂಟರ್ ನಲ್ಲಿ ಪ್ರತಿದಿನ ಸ್ಥಳೀಯ ಮಾರುಕಟ್ಟೆಗೆ ಹೋಗುತ್ತಾರೆ. ಅವರ ಏಕೈಕ ಸಹಾಯವೆಂದರೆ ನನ್ನ ಅತ್ತೆ, ಅವರು ಅಂಗಡಿಯನ್ನು ನಡೆಸಲು ಮತ್ತು ಮನೆಯನ್ನು ನಿರ್ವಹಿಸಲು ಸಹಾಯ ಮಾಡುತ್ತಾರೆ", ಎಂದು ಹೇಳಿದರು.

ಕಾಮತ್ ಮತ್ತು ಅವರ ಪತ್ನಿ ಸೀಮಾ ಅವರ ಯಶಸ್ಸಿನ ಹೊರತಾಗಿಯೂ ತಮ್ಮ ಮಾವ ಕೆಲಸ ಮಾಡುವುದನ್ನು ನಿಲ್ಲಿಸಲು ನಿರಾಕರಿಸುತ್ತಾರೆ ಎಂದು ಅವರು ಹೇಳಿದರು. "ಅಂಗಡಿಯಲ್ಲಿನ ವಿವಿಧ ಉತ್ಪನ್ನಗಳ ಮೇಲೆ ಸಿಗುವ ಲಾಭದ ಬಗ್ಗೆ ನಾನು ಕೇಳಿದರೆ, ಅವರು ಚಿಕ್ಕಿಗಳ ಮೇಲೆ ಸಿಗುವ ಶೇಕಡಾ 25 ರಷ್ಟು ಲಾಭದ ಬಗ್ಗೆ ಮಾತನಾಡುತ್ತಾರೆ, ಒಂದು ಬಾಕ್ಸ್ ಚಿಕ್ಕಿ ಅನ್ನು 200 ರೂಪಾಯಿಗೆ ಖರೀದಿಸಿ ಅದನ್ನು 250 ರೂಪಾಯಿಗೆ ಮಾರಾಟ ಮಾಡುತ್ತಾರೆ" ಎಂದು ನಿತಿನ್ ಕಾಮತ್ ತಮ್ಮ ಟ್ವೀಟ್ ನಲ್ಲಿ ಬರೆದಿದ್ದಾರೆ.

ನಿಜವಾದ ಸ್ವಾತಂತ್ರ್ಯ ಎಂದರೆ ಜೀವನದಲ್ಲಿ ತೃಪ್ತರಾಗಿರುವುದು ಎಂದು ಅವರು ಹೇಗೆ ಕಲಿತರು ಎಂಬುದನ್ನು ವಿವರಿಸಿದ ಜೆರೋಧಾ ಸಿಇಒ, ತಮ್ಮ ಮಾವ ಹೆಚ್ಚಿನದನ್ನು ಬಯಸುವುದನ್ನು ಅಥವಾ ಯಾವುದರ ಬಗ್ಗೆ ದೂರುವುದನ್ನು ತಾನು ಎಂದಿಗೂ ನೋಡಿಲ್ಲ ಮತ್ತು ಕೇಳಿಲ್ಲ, "ಯುದ್ಧದಲ್ಲಿ ತನ್ನ ಬೆರಳುಗಳನ್ನು ಕಳೆದುಕೊಂಡಿರುವ ಬಗ್ಗೆ ಸಹ ಅವರು ಮಾತಾಡೋಲ್ಲ" ಎಂದು ಹೇಳಿದರು.

ಸದೃಢವಾಗಿರಲು ಉತ್ಸುಕರಾಗಿರುವ ಬಿಲಿಯನೇರ್ "ನಾನು ಒಳ್ಳೆಯ ಆರೋಗ್ಯವನ್ನು ಕಾಪಾಡಿಕೊಂಡು ಕೊನೆಯವರೆಗೂ ಉತ್ತಮ ಜೀವನವನ್ನು ಹೇಗೆ ನಡೆಸುವುದು ಎಂಬುದರ ಬಗ್ಗೆ ಯೋಚಿಸುತ್ತಿದ್ದೇನೆ. ಉತ್ತರ ಇಲ್ಲಿ ಸಿಕ್ಕಿದೆ, ಜೀವನದಲ್ಲಿ ಸಂತೃಪ್ತವಾಗಿರಬೇಕು ಮತ್ತು ಮಾನಸಿಕವಾಗಿ ಮತ್ತು ದೈಹಿಕವಾಗಿ ಸಕ್ರಿಯವಾಗಿರಬೇಕು ಎಂಬುದರಲ್ಲಿ ನನಗೆ ಯಾವುದೇ ಸಂದೇಹವಿಲ್ಲ. ಹಣವು ಇದನ್ನೆಲ್ಲಾ ಖರೀದಿಸಿ ಕೊಡಲು ಸಾಧ್ಯವಿಲ್ಲ ಮತ್ತು ನನ್ನ ಮಾವ ಇದಕ್ಕೆ ಉತ್ತಮ ಉದಾಹರಣೆ” ಅಂತ ಹೇಳಿದರು.