Life Lesson: ನಿಮ್ಮ ಮಕ್ಕಳಿಗೆ ಆಗಾಗ ಈ ಮಾತನ್ನು ಹೇಳುತ್ತಲೇ ಇರಿ

ಅನುಭವದಿಂದ ಕಲಿಯುವುದು ಸ್ವಯಂ ಪ್ರೇರಣೆಯನ್ನು ಉತ್ತೇಜಿಸುವ ಪ್ರಮುಖ ಮಾರ್ಗವಾಗಿದೆ. ಇಂದು ಬೆಳೆಯುತ್ತಿರುವ ಮಕ್ಕಳು ಎಲ್ಲರೊಂದಿಗೆ ಪೈಪೋಟಿಯಲ್ಲಿ ಬೆಳೆಯುವ ಪರಿಸ್ಥಿತಿಗೆ ಸಿಲುಕಿದ್ದಾರೆ. ಜೀವನದಲ್ಲಿ ಯಾವುದೇ ಹಂತಕ್ಕೆ ಹೋದರೂ ಅವರ ಸ್ಥಾನವನ್ನು ಪಡೆಯಲು ಅವರು ಯಾರೊಂದಿಗಾದರೂ ಸ್ಪರ್ಧಿಸಬೇಕಾಗುತ್ತದೆ. ಆದರೆ ಇದಕ್ಕೆ ಪೂರಕವಾಗಿ ಪಾಲಕರು ಮಕ್ಕಳಿಗೆ ಕೆಲವು ಸಲಹೆ ನೀಡಬೇಕಾಗುತ್ತದೆ.

ಕೆಲವೊಮ್ಮೆ ಮಕ್ಕಳ ಕೆಲವು ಪ್ರಯತ್ನಗಳು ವಿಫಲವಾಗಬಹುದು. ಆದರೆ ಅಂತಹ ವಿಷಯಗಳಿಗಾಗಿ ಅವರು ಧೈರ್ಯ ಕಳೆದುಕೊಳ್ಳಬಾರದು. ಎಷ್ಟೇ ಹಾನಿ, ಕಷ್ಟ ಬಂದರೂ ತಾನಾಗಿಯೇ ಅದರಿಂದ ಚೇತರಿಸಿಕೊಂಡು ತನ್ನ ಗುರಿಯತ್ತ ಸಾಗಬೇಕು ಆ ರೀತಿ ನಿಮ್ಮ ಮಕ್ಕಳನ್ನು ನೀವು ಬೆಳೆಸಬೇಕು.

ಸ್ವಯಂ ಪ್ರೇರಣೆಯು ಪೋಷಕರು ತಮ್ಮ ಮಗುವಿಗೆ ಕಲಿಸಬಹುದಾದ ಪ್ರಮುಖ ಲಕ್ಷಣಗಳಲ್ಲಿ ಒಂದಾಗಿದೆ. ಇದನ್ನು ಪೋಷಕರು ತಮ್ಮ ಮಕ್ಕಳಿಗೆ ಸರಿಯಾಗಿ ಕಲಿಸಿದರೆ ಮಕ್ಕಳು ತಮ್ಮ ಜೀವನವನ್ನು ತಾವೇ ನೋಡಿಕೊಳ್ಳುತ್ತಾರೆ. ಹೀಗಾಗಿ ಪೋಷಕರು ತಮ್ಮ ಮಕ್ಕಳನ್ನು ಸ್ವಯಂ ಪ್ರೇರಣೆಯಿಂದ ಬೆಳೆಸಲು ಕೆಲವು ಸರಳ ಕ್ರಮಗಳನ್ನು ಅನುಸರಿಸಬೇಕು.

ಸಾಧಿಸಬಹುದಾದ ಗುರಿಗಳನ್ನು ಮಕ್ಕಳಿಗೆ ರೂಪಿಸಿಕೊಡಿ. ಮಕ್ಕಳಿಗೆ ಸ್ವಯಂ ಪ್ರೇರಣೆಯನ್ನು ಕಲಿಸಲು, ಮೊದಲು ಅವರಿಗೆ ಸಾಧಿಸಬಹುದಾದ ಗುರಿಯ ಬಗ್ಗೆ ತಿಳಿಸಿಕೊಡಿ ಮತ್ತು ಆ ಗುರಿಯನ್ನು ಸಾಧಿಸಲು ಅವರೇ ಯೋಜನೆಗಳನ್ನು ರೂಪಿಸಿಕೊಳ್ಳುವಂತೆ ಮಾಡಿ. ಅವರನ್ನು ಆಗಾಗ ಪ್ರೋತ್ಸಾಹಿಸುತ್ತಿರಿ.

ಪ್ರಯತ್ನ ಮುಖ್ಯ, ಫಲಿತಾಂಶವಲ್ಲ ಎಂಬುದನ್ನು ಮಕ್ಕಳಿಗೆ ಯಾವಾಗಲೂ ಹೇಳಿ. ಗುರಿಯನ್ನು ಸಾಧಿಸಲು ಅಗತ್ಯವಿರುವ ಪ್ರಯತ್ನದ ಬಗ್ಗೆ ಯಾವಾಗಲೂ ಕಲಿಸಿ. ಫಲಿತಾಂಶ ಏನೇ ಇರಲಿ ಆದರೆ ನಾವು ನಮ್ಮ 100% ಕಠಿಣ ಪರಿಶ್ರಮ ಮತ್ತು ಪ್ರಯತ್ನವನ್ನು ನೀಡಬೇಕು ಎಂಬ ಮಾತನ್ನು ಮಕ್ಕಳಿಗೆ ಮನದಟ್ಟು ಮಾಡಿ.

ಸ್ಪಷ್ಟ ನಿರೀಕ್ಷೆಗಳನ್ನು ಕಲಿಸಿ. ನಿಮ್ಮ ಮಕ್ಕಳ ಕಾರ್ಯಕ್ಷಮತೆ ಮತ್ತು ನಡವಳಿಕೆಗಳ ಬಗ್ಗೆ ಸ್ಪಷ್ಟವಾಗಿ ಸಂವಹನ ಮಾಡುವುದು ಮುಖ್ಯ. ಇದು ಅವರ ಸ್ವಂತ ಅಭಿವೃದ್ಧಿಗೆ ಸಾಧ್ಯವಾಗುತ್ತದೆ. ಅವರ ಸ್ವಂತ ಜೀವನವನ್ನು ನಿರ್ಧರಿಸಲು ಮತ್ತು ಅವರು ಇಷ್ಟಪಡುವ ಕೆಲಸಗಳನ್ನು ಮಾಡಲು ಆಯ್ಕೆ ಮಾಡುವ ಹಕ್ಕನ್ನು ಅವರಿಗೆ ನೀಡಿ.

ಮಕ್ಕಳಲ್ಲಿ ಆತ್ಮವಿಶ್ವಾಸ ಬೆಳೆಸುವುದು ತುಂಬಾ ಮುಖ್ಯವಾಗುತ್ತೆ. ಏನಾದರು ತಪ್ಪು ಮಾಡಿದರೆ ಅವರನ್ನು ತಿದ್ದಿ ಬುದ್ದಿ ಹೇಳುವುದು ಕೂಡಾ ತುಂಬಾ ಮುಖ್ಯವಾಗುತ್ತದೆ. ಮಕ್ಕಳಿಗೆ ನಿಮ್ಮ ವರ್ತನೆ ಇಷ್ಟ ಆಗದೇ ಇದ್ದರೂ ಸಹ ಕೆಲವೊಮ್ಮೆ ನೀವು ಅದನ್ನೇ ಪಾಲಿಸಬೇಕಾಗುತ್ತದೆ.