Study Tips: ಸಪ್ಲಿಮೆಂಟರಿ ಎಕ್ಸಾಂಗೆ ಈ ರೀತಿ ಸ್ಟಡಿ ಮಾಡಿ- ಖಂಡಿತಾ ಪಾಸ್ ಆಗ್ತೀರಾ!

ರಾಜ್ಯದಲ್ಲಿ ಈಗಾಗಲೇ ಎಸ್​ಎಸ್​ಎಲ್​ಸಿ ಪರೀಕ್ಷೆ ಮುಗಿದಿದ್ದು, ರಿಸಲ್ಟ್​ ಕೂಡ ಬಂದಿದೆ. ಈ ಪರೀಕ್ಷೆಯಲ್ಲಿ ಫೇಲ್​ ಆದ ವಿದ್ಯಾರ್ಥಿಗಳಿಗೆ ಇಲಾಖೆಯು ಪೂರಕ ಪರೀಕ್ಷೆಯನ್ನು ನಡೆಸುತ್ತಿದೆ. ಅದರಂತೆ ಎಸ್​ಎಸ್​ಎಲ್​ಸಿ ಪೂರಕ ಪರೀಕ್ಷೆಗೆ ಇನ್ನು ಕೆಲವು ದಿನಗಳು ಮಾತ್ರ ಉಳಿದಿವೆ. ವಿದ್ಯಾರ್ಥಿಗಳು ಸಪ್ಲಿಮೆಂಟರಿ ಪರೀಕ್ಷೆಗೆ ತಯಾರಾಗುತ್ತಿದ್ದಾರೆ. ಯಶಸ್ಸು ಸಾಧಿಸಲು ಇರುವ ಒಂದೇ ಒಂದು ಮಾರ್ಗವೆಂದರೆ ಅದು ಕಠಿಣ ಅಧ್ಯಯನ. ಇಲ್ಲಿ ನಾವು ಹೇಳುವ ಸಲಹೆಗಳನ್ನು ಫಾಲೋ ಮಾಡಿದರೆ ವಿದ್ಯಾರ್ಥಿಗಳು ಆರಾಮಾಗಿ ಪರೀಕ್ಷೆಯಲ್ಲಿ ಉತ್ತೀರ್ಣವಾಗಬಹುದು.

ಮಾಡಿದ ತಪ್ಪನ್ನೇ ಮಾಡಬೇಡಿ:
ವಿದ್ಯಾರ್ಥಿಗಳು ಈ ಮೊದಲು ಪರೀಕ್ಷೆ ಬರೆಯುವಾಗ ಮಾಡಿದ ತಪ್ಪನ್ನು ಮಾಡಬೇಡಿ. ಯಾಕೆಂದರೆ ನೀವು ಈಗಾಗಲೇ ಪರೀಕ್ಷೆ ಬರೆದ ಅನುಭವ ಹೊಂದಿರುತ್ತೀರಿ. ಹೀಗಾಗಿ ನೀವು ಎಲ್ಲಿ ತಪ್ಪು ಮಾಡಿದ್ದೀರಿ ಎಂಬುದನ್ನು ಮನವರಿಕೆ ಮಾಡಿಕೊಳ್ಳಿ. ನೀವು ಬರೆದಿರುವ ಉತ್ತರ ಪತ್ರಿಕೆಯನ್ನು ತರಿಸಿಕೊಂಡು ಮಾಡಿರುವ ತಪ್ಪುಗಳನ್ನು ಹುಡುಕಿ. ಮುಂದಿನ ಸಲ ಪರೀಕ್ಷೆ ಬರೆಯುವಾಗ ಹಿಂದೆ ಮಾಡಿದ ತಪ್ಪುಗಳನ್ನು ಮಾಡಬೇಡಿ.

ಹೊಸ ಅಧ್ಯಯನ ತಂತ್ರ:
ನೀವು ತುಂಬಾ ವರ್ಷಗಳಿಂದ ಒಂದೇ ರೀತಿಯ ಅಧ್ಯಯನ ವಿಧಾನಗಳನ್ನು ಅನುಸರಿಸುತ್ತಿದ್ದೀರಾ? ಹಾಗಿದ್ರೆ ಈ ಬಾರಿ ಹೊಸದನ್ನು ಪ್ರಯತ್ನಿಸುವ ಸಮಯ. ನೀವು ಕಲಿಯುವ ರೀತಿಯಲ್ಲಿ ಹೊಸ ಅಧ್ಯಯನ ವಿಧಾನವನ್ನು ಹುಡುಕಿ. ನಿಮ್ಮ ಸಹಪಾಠಿಗಳನ್ನು ಅವರು ಯಾವ ಅಧ್ಯಯನ ತಂತ್ರಗಳನ್ನು ಬಳಸುತ್ತಾರೆ ಎಂದು ಕೇಳಿ ಮತ್ತು ಅದನ್ನು ಅಳವಡಿಸಿಕೊಳ್ಳುವುದು ಉತ್ತಮ.

ವಿಷಯ ಅರ್ಥ ಮಾಡಿಕೊಳ್ಳಿ:
ಅಧ್ಯಯನ ಎಂದರೆ ಅರ್ಥಮಾಡಿಕೊಳ್ಳುವುದು. ಸುಮ್ಮನೆ ಬಾಯಿಪಾಠ ಮಾಡಿದರೆ ಅದು ಹೆಚ್ಚಿನ ಸಮಯ ತಲೆಯಲ್ಲಿ ಉಳಿಯುವುದಿಲ್ಲ. ನೀವು ಓದುತ್ತಿರುವ ವಿಷಯವನ್ನು ಮೊದಲು ಅರ್ಥಮಾಡಿಕೊಳ್ಳಿ. ವಿಷಯದ ಆಳವನ್ನು ತಿಳಿದುಕೊಳ್ಳಿ. ಆಗ ಪರೀಕ್ಷೆ ಬರೆಯಲು ನಿಮಗೆ ಸುಲಭವಾಗುತ್ತದೆ.

ಸ್ಟಡಿ ಗ್ರೂಪ್​ಗೆ ಸೇರಿಕೊಳ್ಳಿ:
ಪೂರಕ ಪರೀಕ್ಷೆಗೆ ತಯಾರಿ ನಡೆಸುತ್ತಿರುವ ವಿದ್ಯಾರ್ಥಿಗಳು ಯಾವುದಾದರೂ ಸ್ಟಡಿ ಗ್ರೂಪ್​ಗಳಿಗೆ ಸೇರಿಕೊಳ್ಳುವುದು ಒಳ್ಳೆಯದು. ಇದರಿಂದ ಬೇರೆ ಬೇರೆ ವಿಷಯಗಳ ಬಗ್ಗೆ ತಿಳಿದುಕೊಳ್ಳಲು ಸಹಾಯವಾಗುತ್ತದೆ. ಜೊತೆಗೆ ಅಧ್ಯಯನ ನಡೆಸುವ ರೀತಿಯಲ್ಲೂ ಬದಲಾಗಬಹುದು. ಹೊಸ ದೃಷ್ಟಿಕೋನದಿಂದ ವಿಷಯವನ್ನು ಅರ್ಥಮಾಡಿಕೊಳ್ಳಲು ನಿಮಗೆ ಅವಕಾಶ ಸಿಗುತ್ತದೆ.

ಹಳೇ ಮಾದರಿ ಪ್ರಶ್ನೆ ಪತ್ರಿಕೆಗಳನ್ನು ಬಿಡಿಸಿ:
ವಿದ್ಯಾರ್ಥಿಗಳು ಓದಿನ ಜೊತೆಗೆ ಹಳೆಯ ಮಾದರಿ ಪ್ರಶ್ನೆ ಪತ್ರಿಕೆಗಳನ್ನು ಬಿಡಿಸುವ ಪ್ರಯತ್ನ ಮಾಡಿದರೆ ಒಳ್ಳೆಯದು. ಇದರಿಂದ ಪರೀಕ್ಷೆಯಲ್ಲಿ ಯಾವ ಮಾದರಿಯ ಪ್ರಶ್ನೆಗಳನ್ನು ಹೆಚ್ಚಾಗಿ ಕೇಳಲಾಗುತ್ತದೆ ಎಂಬ ಐಡಿಯಾ ನಿಮಗೆ ಸಿಗುತ್ತದೆ. ಜೊತೆಗೆ ಅಂತಹದ್ದೇ ಪ್ರಶ್ನೆಗಳನ್ನು ಹೆಚ್ಚಾಗಿ ಓದಿಕೊಳ್ಳಿ.

ಒಟ್ಟಾರೆ ಪೂರಕ ಪರೀಕ್ಷೆಗೆ ತಯಾರಾಗುತ್ತಿರುವ ವಿದ್ಯಾರ್ಥಿಗಳು ಶ್ರಮ ಹಾಕಿ ಓದಿ. ಮೊದಲ ಪ್ರಯತ್ನದಲ್ಲಿ ವಿಫಲವಾಗಿದ್ದರೂ, ಎರಡನೇ ಪ್ರಯತ್ನದಲ್ಲಿ ಯಶಸ್ಸು ಸಿಗಬಹುದು. ಸೋಲೇ ಗೆಲುವಿನ ಮೆಟ್ಟಿಲು. ಹೀಗಾಗಿ ಧೃತಿಗೆಡದೆ ಏಕಾಗ್ರತೆಯಲ್ಲಿ ಅಧ್ಯಯನ ಮುಂದುವರೆಸಿ.